Read saamia 1 Abatuki 21 Bible Online

1 Abatuki 21 - saamia bible

1 Abatuki 21

¹Bulaanu, aambi neende edooho ly'Omutuki Ahabbu mu Yesireeli yaliyo endalo y'emisabbiibbu ey'omusaacha wuundi olaangwa mbwe Nabboti.

²Ludaalo luundi, Ahabbu yeecha yaboolera Nabboti ati, “Ewe leha ese mbukule endalo y'emisabbiibbu yao yino; koti lu yiri aambi muno neende edooho lyaange, haandi ese ndi ohudaha ohwehoonyera eloba lyeene lino ohulimamo elyaani. Mani mba njia ohuhuberesa endalo y'emisabbiibbu yiindi endai yihiraho eyeene yino, kata sa nooba ewe omweene noodaha, mba njia ohuhutuunga eseende enyiingi muno.”

³Nabboti nae yamukobolamo ati, “Ese yoobona, ndasihira sa endalo y'emisabbiibbu yino ohutula hu bakuuka yaange. Mani Omwaami ahoya yaanganyira ndaahaya ohukanya esyo!”

⁴Bulaanu Ahabbu yaakobola engo wae, niyeelalihiire haandi n'anyoleere hulw'ebiindu bi Nabboti yamuboleera. Yachia yeeyalisa hu buliri bwae, n'akaluhaane niyewuunjire ena sida, mani yaasira ohulya.

⁵Yesebbeeli omuhasi wae yeecha abuundu yi yaali yaamuteeba ati, “Siina syeene esikera ewe n'onyoolera otyo? Siina syeene esikera n'osira ohulya?”

⁶Nae yaakobolamo ati, “Ohweema hu biindu bi Nabboti yamboleere. Ese mbeere nindeyaanireyo ohukula endalo y'emisabbiibbu yae, haandi kata neende omweene naaba naadahire, ese mbeere njia ohumuberesamo endalo y'emisabbiibbu yiindi, nae yamboleere mbwe ati ese haba siinyala ndainyoola daawe!”

⁷Yesebbeeli nae yamukobolamo ati, “Ewe siingira otule mu buliri, wesangaase mani olye. Ese omweene niise ochia ohuhufunira endalo y'emisabbiibbu ya Nabboti eyo!”

⁸Omuhasi oyo yeehala aasi yachaaka ohwandiika ebbarwa nyiingi, haandi n'ataaho omuhono neende eliita lya Ahabbu, n'achisaanihira neende esisaanihiro syae, n'achituma eyiri abahoongo bomu dooho omwo alala neende abamenyi bomu Yesireeli abahoongo.

⁹Ebbarwa chino chaboolaanga chiti, “Laangirire oludaalo lw'ohusiibiraho, laange abaandu bebuuse alala, mani muberese Nabboti obweyaango bw'oluyaali.

¹⁰Mani mubukule abahalaki b'amalako banyale ohumuwabira bulai hulw'ohubwaaba Nasaae haandi neende omutuki. Nimumala mutyo muchie mumubukule mumutuse erwaanyi w'esiko, mani mumuhubbe amakia afwe.”

¹¹Abahoongo neende abamenyi bahoongo abomu Yesireeli beecha baanyala ohuhola sa koti lu Yesebbeeli yali n'alagiire.

¹²Balaangirira oludaalo lw''ohusiiba, haandi balaanga abaandu bebuusa, mani baaberesa Nabboti abuundu w'oluyaali.

¹³Abahalaki b'amalako babiri batulayo nibaabira Nabboti olw'ohubwaaba Nasaae alala neende omutuki, mani naamala naatuswa erwaanyi w'esiko esyo mani naahubbwa amakina naafwa.

¹⁴Emboosi eyo yaatumwa eyiri Yesebbeeli niyiboola yiti: “Nabboti amalire ohwiitwa.”

¹⁵Mani bwaangu bweene, Yesebbeeli niyamala ohwakaana emboosi echio, yatulaniramo ohuboolera Ahabbu ati, “Ngandi Nabboti amalire ohufwa. Bulaanu ewe chia sa obukule endalo y'emisabbiibbu eyo yi yali naahayire ohuhukusa.”

¹⁶Abweene ao, Ahabbu yesi yatulaniramo sa ohuchia eyiri endalo y'emisabbiibbu eyo mani n'ayibukula.

¹⁷Omwaami yaboolera Elija, omunabbi wali n'atula mu Tisiibbe ati,

¹⁸“Ewe chia eyiri Omutuki Ahabbu owa Samaria. Ochia ohumunyoola naali mu ndalo y'emisabbiibbu ya Nabboti, naali aambi ohuyibukula.”

¹⁹Chia omuboolere oti ese, Omwaami ndi ohumuboolera endi, “Hane luunyuma lw'ohuniega omusaacha oyo, bulaanu hwoochia ohubukula sa emyaandu kyae kyosi?” Muboolere oti mani sino nisyo siindi ohuboola: “Abuundu bweene yi mbwa chihombeere amabaanga ka Nabboti niwo abweene ao yi chichia ohuhoombera akao kosi!”

²⁰Mani Ahabbu niyeecha ohubona Elija, yaboola sa ati, “Hane ewe omusuku waange, omalire ohunjakaana?” Nae Elija yakobolamo ati, “Eee, ngandi malire”. Haandi yameedaho ati, “Ewe weweerayo elalira ohuholaanga sa ebitahoyera mu moni w'Omwaami.

²¹Mani sakira Omwaami ali ohuhuboolera ati, ‘Ese njia ohuhukwiisaho amasira. Ese njia ohuhumalao, haandi male sihirise buli muundu w'esisaacha mu daala lyao, omuyere kata omukofu sidubaanie.

²²Edaala lyao lichia ohufwaana koti edaala lyali elya Omutuki Yerobboamu omwaana wa Nebbati, haandi koti elyali edaala lya Omutuki Bbaasa omwaana wa Ahija, olwohuba ewe mweene omalire ohusaangulusa etima lyaange neende ohuyira Yisiraeli yoosi mu syonoono.’

²³Nae ebidiira hu Yesebbeeli, Omwaami aboola ati, embwa chichia ohuliira-buliira omulaambo kwae mu siko sya Yesireeli.

²⁴Buli otula mu beeho bao achia ohufwiraanga mu siko muno achia ohulibwaanga neende embwa, haandi oyo yeesi ochia ohufwiraanga mu syaalo sy'eyanjaala achia ohuliibwaanga neende engosya.”

²⁵(Yabulayo omuundu yeesi owali niyeyaanirayo elalira ohuholanga ebiindu bitahoyera mu moni w'Omwaami koti lu Ahabbu yali nga buli situla syatuliraanga huhuyiika hwa Yesebbeeli omuhasi wae.

²⁶Yaholaanga ebyonoono bihiramo ohuswaasa niyeenamiraanga ebiloongaloongwe, koti sa lu Abaamoori baholaanga, ba Omwaami yawuuyianga mu loba koti lu Baisiraeli bayiinduulaanga nibeengira).

²⁷Mani Elija niyamaliirisa sa ati ohulomaloma, Ahabbu yetaandulaho engubo chae, mani yachiefwaalulamo, mani yefwaala engubo ch'ebigunia. Yasira ebyohulya, yeyalisaanga mu ngubo ch'amagunia, mani naamala nakeendaana nabiyiriise haandi niyeelalihiriire.

²⁸Omwaami mani n'aboolera omunabbi Elija ati,

²⁹“Ewe omalire ohwehaliirisa koti lu Ahabbu yeloongoyaase mu moni waange? Mani koti lwaanyalire ohweehola atyo, haba siinjia humuleetera amasira daawe n'asisiiri omulamu; huchia ohubaao mu biha by'abaana bae, niinjia ohuleeta amasira hu daala ly'Ahabbu lyoosi.”