Read saamia 1 Abatuki 22 Bible Online

1 Abatuki 22 - saamia bible

1 Abatuki 22

¹Ohutula hu ludaalo olwo, yabaao omuleembe akatikaati wa Yisiraeli neende Siria hulw'embaka y'emyaaka kibiri,

²nae mu mwaaka kwa hadatu, Omutuki Yehosafati owa Yuda yachia ohubona Omutuki Ahabbu owa Yisiraeli.

³Ahabbu yeteeba hu bahoongo bae ati, “Siina syeene esikera nihutanyalaho ohuholaho esiindu syoosi ohwekobosera Ramooti esyomu Gileadi ohutula hu mutuki wa Siria wuno? Ngaandi ne syeefwe nisyo!”

⁴Ahabbu yateeba Yehosafati ati, “Onyala ohuchia naange mani hwaseeta Ramooti?” Nae Yehosafati yakobolamo ati, “Ese ndi sa omweetekefu ewe wesi nooba nooli omweetekefu, haandi kata neende abalwaani baange kata neende efaraasi chaange.”

⁵Nae kata katyo, lehe mberi hweteebeho hu Omwaami.

⁶Kata katyo, Ahabbu yalaanga abanabbi, aboola emia chine (400), mani yaabateeba ati, “ese mbwe njie seete Ramooti kose haba?” Nabo bamukobolamo bati, “Ewe chia buchia.” Haandi bameedaho bati, “Ngaandi Omwaami achia sa ohuhunyalira oyiingire.”

⁷Nae Yehosafati yateeba ati, “Mani siyiri hooyo omunabbi wuundi yeesi yi hunyala hweteeberamo hu Omwaami?”

⁸Nae Ahabbu yakobolamo ati, “Yisisiiriyo mulala owuundi, Mikaaya omwaana wa Yimila. Nae ese naange ndamusyuula muno, olwohuba oyo nae haba siyaandusiraangaho obunabbi bundiiraho obulai daawe; buli butula bubechaanga sa obudiira hu siindu sibi sa.” Yehosafati nae yakobolamo ati, “Ewe otaboolaho otyo daawe!”

⁹Ahabbu yalaanga omuhoongo w'esiina, yamuboolera ohuchia aleete Mikaaya bwaangu.

¹⁰Abatuki babiri abo, bali nibefwaalire amaganjuula k'obwaami, mani nibehaale hu bisaala by'obutuki byaabwe, eyiri olwaanyi lwobbakirwaangamo oluli erwaanyi w'esiruwa sya Samaria, mani haandi abanabbi baandi boosi nibali ohutusaanga obunabbi mu moni waabwe.

¹¹Mulala hu beene abo yali, Sedekia omwaana wa Kenaana, yachia mani yaahola enjika ch'esibya mani naamala n'aboolera Ahabbu ati, “Sino nisyo si Omwaami ali ohuboola: ‘Ewe niwehoonyera bino biti nilwo lwoochia ohulwaania Abasiria, mani omale onyale ohubayiingirira elalira.’”

¹²Mani Abanabbi baandi boosi nibeecha nibaboola bosi batyo. Baboola bati, “Ewe siingira ohuumbe ochie oseete Ramooti oyiingire.” Haandi bati, “Omwaami achia ohunyala ohuhunyalira oyiingire.”

¹³Nae ebiha byeene ebyo, omuhoongo wali n'achiire ohuleeta Mikaaya yamuboolera ati, “Abanabbi baandi boosi babeere nibatusiire omutuki obunabbi bw'ohuyiingira, mani wesi ohoyera ohuhola otyo.”

¹⁴Nae Mikaaya yakobolamo ati, “Ohubitira hu Omwaami mulamu, ese ndi ohubasuubisa endi ese njia sa ohuboola esyo si mweene achia ohumboolera sa!”

¹⁵Mani niyeecha niyeema mu moni w'Omutuki Ahabbu, omutuki oyo n'amuteeba ati, “Ewe Mikaaya, ese alala neende Omutuki Yehosafati, mani hunyala hwaachia hwaseeta Ramooti, kose haba?” Mikaaya nae yakobolamo ati, “Ohuseeta sa!” Haandi yameedaho ati, “Ngandi ewe oba ochia ohuyiingira sa. Omwaami achia ohuhunyalira ohuyiingira ataali ohukana-kana.”

¹⁶Nae Ahabbu yakobolamo ati, “Ewe nooba noolomaloma yiindi mu liita ly'Omwaami, mboolereenge sa obwadyeeri bweene! Amahabi kaanga ka ese njia ohunyala ohuloondaangamo nihuboolera endyo?”

¹⁷ Nae Mikaaya yakobolamo ati, “Ese ndi ohubona eye lya Yisiraeli nilisalaanire hu ngulu koti amakoondi akataaliho omwaayi. Omwaami yaboola ati, ‘Ngaandi abaandu bano mbano babulaho omwaayi kata mulala; leha beekobolere engo mu muleembe.’”

¹⁸Ahabbu yaboolera Yehosafati ati, “Ese haba simbeere nihuboleere endi oyo haba siyandusiraangaho obunabbi bulai bwoosi daawe? Buli siha sibechaanga sa esiindu sibi syoong'ene!”

¹⁹Mikaaya haandi yemeeda ohuboola ati, “Bulaanu mutekeerese muwulire esiindu si Omwaami aboola! Ese mbweene Omwaami niyehaale hu sisaala syae sy'obutuki muukulu, neende bamalaika bae boosi nibeemere nibamweekederaanie.”

²⁰Omwaami haandi yateeba ati, “Wiina mweene ochia ohubachirisa Ahabbu hwaanyale ohuchia anyale ohwiitirwa mu Ramooti?” Mani bamalaika baandi bachaaka ohuboola esiindu siindi nae abaandi bosi ohuboola esiindi,

²¹ohwoola lu mwooyo yeecha mani yeema mu moni, naasuda eyiri Omwaami, n'aboola ati, “Ese niise ochia ohumubachirisa.”

²²Nae Omwaami yamuteeba ati, “Onyala ohuhola otyo otye?” Nae mwooyo oyo yakobolamo ati, “Ese njicha ohuchia mani ngere abanabbi ba Ahabbu boosi baboole obubacha” Omwaami haandi yaboola ati, “Mani ewe chia mani omubache.” Chia ohunyala sa ohuhola otyo.

²³Mikaaya yamaliirisa n'aboola ati, “Sino nisyo esiholehaane. Omwaami niye oholere abanabbi bao bano boosi baahubacha. Nae omweene amalire ohuheengao ati ewe ochia ohunyoola amasira!”

²⁴Omunabbi Sedekia yasiingira yaachia eyiri Mikaaya, yamupaama mu bweeni, n'amuteeba ati, “Ni liina bweene lu Mwooyo w'Omwaami yanyala ohuundulaho mani yaanyala ohulomaloma eyiri ewe?”

²⁵Mikaaya nae yamukobolamo ati, “Ewe ochia ohumanya noonaba nootula noochia ohweekisa mu siseenge sy'ematyeelo.”

²⁶Bulaanu Omutuki Ahabbu yeecha yaalagira mulala hu bahoongo bae ati, “Diira Mikaaya bwaangu, mani omale omuyire eyiri Abaamooni, gafana w'esiko sihoongo esyo, haandi eyiri Joasi omwaana w'omwaami.

²⁷Baboolere bamusukune mu jeela, mani mumuliseenge omugaati neende amaachi byoong'ene ohwoola lu ndirikobola ni ndi omulamu.”

²⁸Mikaaya nae yesiinduha yaboola ati, “Ewe noochia mani waanyala ohukobola nooli omulamu, mani Omwaami wuno aba s'abeere niye ohunomanomeeremo!” Haandi yameedaho ati, “Mani buli muundu atekeerese amanyirise buli esiindu si nomanoome!”

²⁹Bulaanu, Omutuki Ahabbu owa Yisiraeli neende Omutuki Yehosafati owa Yuda, beecha baachia ohuseeta esiko sya Ramooti esyali mu Gileadi.

³⁰Ahabbu yaboolera Jehsofaati ati, “Bulaanu koti lu huli ohuchia ohulwaana ebiita, leha ese njie ndeebachirise hae ohufwaala engubo chaange ch'obutuki, naawe ewe fwaala ebifwaalo byao by'obwaami.” Omutuki wa Yisiraeli oyo yachia mu biita niyefwaniliise atyo.

³¹Nae omutuki wa Siria yali n'amalire ohulagira abeemirisi b'amaye kalwaaniraanga hu bigaari by'efaraasi ohuchooma omutuki wa Yisiraeli yeeng'ene otaaliho omulwaani yeesi daawe.

³²Mani nibabona sa bati Omutuki Yehsofaati, boosi babaasa sa bati, oyo niye owali omutuki wa Yisiraeli, boosi nibakaluuhana ohumuseeta. Nae n'ahubba wuuwi n'alira,

³³beecha mani baamanya bati hane haba siyali naali niye omutuki wa Yisiraeli daawe, mani nibaakamia ohumuchooma ohwo.

³⁴Mani koti sa ehabi, kata katyo, omulwaani wuundi Omusiria yanyala ohulasa olusaale mani nilunyala ohweyindikania mu mbakaanie y'engabo mani lwamunyaala mani yaalira n'aboola ati, “Ese malire ohunyaalwa!” Haandi yameedaho ati, “Ewe kata ekoona mani wuhweese wuunduse mu biita!”

³⁵Nae koti lu biita byemeeda ohulula, Omutuki Ahabbu yadoong'a sa nibamwihaase mu sigaari syae, niyewuunjire sa Abasiria. Amabaanga kae kadachaanga nikahulukusa nikatula mu sikoonjo syae nikadosa esigaari syae, mani yaamala yaafwa engoloobe.

³⁶Elyuuba nilyali niliri aambi ohukwa, esilagiro syasalaana nisitula mu bahoongo ba Abaisiraeli siti: “Buli muundu yeesi yekobolere engo mu syaalo syae, haandi mu siko syae!”

³⁷Mani ao Omutuki Ahabbu naafwa. Omubiri kwae kwayirwa mu Samaria mani nikusiihwa.

³⁸Esigaari syae syoserwa bulai mu sidiba sya Samaria, yi mbwa chahoombera amabaanga kae, haandi yi badaamba beeyokeraanga, koti sa lu Omwaami yali n'aboolere ati nilwo lu bichia ohuba.

³⁹Mani buli siindu syoosi si Omutuki Ahabbu yali niyahola, kata sa neende embaliirira yiboola yiti edooho lyae lyali nilyasaatwa neende ameeno k'enjofu, kata neende ebiko byoosi bi yali niyoombaha, nibyandiikwa mu esitabo sya Ebyaliwo eby'Abatuki ba Yisiraeli.

⁴⁰Mani niyamala ohufwa sa ati, Ahasia omwaana wae yamukerama akobola mu amakulu kae koti omutuki.

⁴¹Mani omwaaka kwa hane mu bwaami bwa Ahabbu omutuki wa Yisiraeli, Yehosafati omwaana wa Asa nikwo omwaaka ku yeehasirwa ohuba omutuki wa Yuda

⁴²niyali naali emyaaka ky'obuhuluundu amahumi kadatu neende kitaanu, mani yaanyala ohutukira Yerusalemu emyaaka amahumi kabiri neende kitaanu. Ng'ina yali niye Asubba, owali omuhaana wa Silihi.

⁴³Mani koti sa lu Asa laatang'ene yali hale omweene nataaba, yesi yaholaanga sa ebihoyera mu moni w'Omwaami; nae mubweyaango bw'ohwiinamiraangamo Nasaae, haba sibyalikulwa daawe, mani abaandu bemeeda sa ohuyaaniraangamo ebiyaanwa byaabwe, haandi neende ohuniooheseraangamo obubbaani.

⁴⁴Yekosafaati yataao omuleembe neende omutuki wa Yisiraeli.

⁴⁵Buli siindu syoosi si Yehosafati yaholaanga, koti obululu bwae bwoosi mu biita byae, byandiikwa mu sitabo sya Ebyaliwo eby'Abatuki ba Yuda.

⁴⁶Yanyala ohumalao abasaacha alala neende abahasi badaamba boosi abali nibachakaliraanga mu alutaari ch'obwiibulanwa abali nibasisiiri nibadoong'ao ohutula mu ndaalo chia Asa laatang'ene.

⁴⁷Esyaalo sya Edomu nasyo haba sisyalimo omutuki yeesi daawe; syali nisyatukwa neende obwaami bwali nibwateebwayo neende omutuki wa Yuda.

⁴⁸Omutuki Yehosafati niye owoombaha emeeri cheruhaanga hu nyaanja hoongo muno echa syaabalaanga nichiola mu syaalo sya Ofiri ohukula esaabbu; nae cheebiraanga nichiolaanga mu Esionigebberi mani nichaakama ohusyabalaanga.

⁴⁹Mani Omutuki Ahasia owa Yisiraeli yeetusayo ohufukiirira abasaacha bae ohusyabaliraanga alala neende abasaacha ba Yehosafati, nae Yehosafati yaahaya ohufukiirira esiholwa esyo.

⁵⁰Yehosafati yaafwa, yaasiihwa mu biriindwa by'abaami ebyali mu siko sya Daudi, mani Yehoramu omwaana wae yaamukerama yaakobola mu sireenge syae koti omutuki.

⁵¹Mu mwaaka kwa ehumi neende kitaanu-na-kibiri eky'obutuki bwa Yehosafati owa Yuda, Ahasia omwaana wa Ahabbu yeehaswa ohuba omutuki wa Yisiraeli, mani yaanyala ohutuka Samaria ohumala embaka y'emyaaka kibiri.

⁵²Nae yonoona mu moni w'Omwaami niyaanula ehola embi ya Ahabbu laatang'ene, neende Yesebbeeli ng'ina, haandi neende Omutuki Yerobboamu, owayiraho Abaisiraeli baakwa mu syonoono.

⁵³Yeenamiraanga, haandi yahalaabaniraanga Bbaali, haandi koti sa laatang'ene owaliwo hale omweene oyo natabaao, yoola yasaangulusa etima ly'Omwaami, Nasaae wa Yisiraeli.