Read saamia 1 Abatuki 5 Bible Online

1 Abatuki 5 - saamia bible

1 Abatuki 5

¹Omutuki Hiramu owa Tiire yabechaanga naali omwiicha wa Daudi, niyawulira ati Solomooni amalire ohukerama Daudi laatang'ene koti omutuki, yatuma bawamwaanda bachie yaali.

²Solomooni yeesi yayerekesa emboosi yae eyiri Hiramu eyiboola yiti:

³“Ewe omanyire oti ohweema hu biita bya buli siha bi Daudi laata yaange yalwaania ebyaalo bisuku ebyali nibimwebodoohaanie, haba siyanyala ohwoombaha Enyuumba ya Nasaae ey'ohwiinamiraangamo Omwaami Nasaae wae ohwoolera elalira lu Omwaami yamunyalira ohuyiingira abasuku bae boosi.”

⁴Nae bulaanu, Omwaami Nasaae waange mbano yambereese omuleembe hu njaho chaange choosi. Haba siindiho neende omusuku yeesi, haandi abulao ohutya hwoosi ohwohuseetwa daawe.

⁵Omwaami wuno, yasuubisa laata yaange Daudi ati, “Omwaana wao, yi ndahahole yaaba omutuki luunyuma lwao, niye ochia ohuunyoombahira Enyuumba ya Nasaae.” Mani ese bulaanu mbano malire ohuheengao ohwoombaha Enyuumba ya Nasaae ey'ohwiinamiraangamo Omwaami Nasaae waange.

⁶Mani tuma abasaacha bao beeche mu Lebbanooni ohuundemera emituumba. Abasaacha baange bachia ohuhoonyanaanga nabo, nae ese njia ohutuunga abasaacha bao esyo syoosi syoochia ohuheengao. Koti sa ewe lwoomanyire bulai bweene, abasaacha baange bano haba sibamanyire ohutema emisaala bulai koti abao.

⁷Hiramu yasangaala yabitiirira niyanyoola emboosi ya Solomooni eyo, mani yaboola ati, “Omwaami apaakwe enyaanga yino hu lwoohuberesa Daudi omwaana mukesi waaka ao ohumukerama koti omutuki w'esyaalo sihunuufu esyo!”

⁸Bulaanu Hiramu yeemao mani yaatumira Solomooni emboosi yino yiti: “Ese mbano malire ohunyoola emboosi yao mani ndi omweetekefu ohuhola byosabire. Njia ohutusa emiseengese alala neende emisaala mikaratuusi.

⁹Abasaacha baange bachia ohwiisa emiguulo ohutula mu Lebbanooni ohwoolera elalira aasi hu nyaanja, mani bamale bakiboye alala mu mikaanda mani kibeenge nikiihirira hu ndulo w'enyaanja, ohwoolera elalira abuundu y'onabe omweene nodoolere. Ao haandi abasaacha baange bachia ohukiboya alala mani abasaacha bao banyale ohukiholaho. Hu lwaande lwao, ese ndahadahire ewe otuse sa ebyohulya by'abasaacha baange.”

¹⁰Mani Hiramu yaleetera Solomooni emiseengese kyoosi, neende emiguulo kyemikaratuusi ki yali naadahire,

¹¹haandi Solomooni yesi yaberesa Hiramu etaani elifu chibiri (2,000) enaamba ech'engaano, neende elita elifu emia chine (400,000) ech'amafuta k'emiseituuni machweenufu buli mwaaka ohuliisaanga abasaacha bae.

¹²Omwaami wuno yooseresa esisuubise syae mani yaaberesa Solomooni amakesi. Omuleembe kweecha kwaabaao akatikaati wa Hiramu neende Solomooni, mani baahola endagaano akati waabwe boombi yaaba endai.

¹³Omutuki Solomooni yatekeha abasaacha elifu amahumi kadatu (30,000) amalaamba abahola emirimo ky'ohuyiikwa ohutula mu Yisiraeli mwoosi,

¹⁴mani yaamala yaata Adoniramu ohubatuka. Yabakabuhaniamo mu mikaanda kidatu eky'abasaacha elifu ehumi (10,000) abalaamba, mani buli mukaanda kwaamala omwoosi omulaamba nibali mu Lebbanooni, haandi neende emyoosi kibiri nibakoboole engo.

¹⁵Solomooni yeesi yeecha yanyoola abasaacha elifu amahumi munaane (80,000), abali mu syaalo sy'ebigulu mu siroombe sy'amakina, neende abasaacha elifu amahumi kataanu-na-kabiri (70,000) amalaamba aboohukiinga

¹⁶mani naata abasaacha abeemeresi elifu chidatu neende emia chidatu (3,300) abalaamba ohubatuka nibahubbirisa emirimo kyaabwe ekyo.

¹⁷Ohweema hu silagiro sy'Omutuki Solomooni, banyala ohubaacha amakina mahoongo bulai akali nikachia ohuhola olwaalo lw'Enyuumba ya Nasaae.

¹⁸Mani abasaacha bahalaabani aba Solomooni neende Hiramu, haandi neende abasaacha ohutula mu siko sya Bbibbuloosi baanyala ohutekeha amakina ako, haandi neende embaao echio ohwoombahira Enyuumba ya Nasaae.