Read saamia 2 Abatuki 1 Bible Online

2 Abatuki 1 - saamia bible

2 Abatuki 1

¹Luunyuma lw'ohufwa hwa Ahabbu omutuki wa Yisiraeli esyaalo sya Moabbu syajeemera Yisiraeli.

²Bulaanu Ahasia owa Yisiraeli yaanuha ohutula hu lubburaanda lw'enyuumba yae y'egoroofa ya Samaria mani yaakwa aasi, yanyaaliha muno. Yatuma bawamwaanda naababoolera ati, “Muchie mweteebe hu Bbaali-sebbubbu, nasaae wa Ekironi, niinjia ohuwona ndule mu bulwaae buno oba haba.”

³Nae Malaika w'Omwaami yaboolera omunabbi Elija Omutisibbiti ati, “Siingira ochie obukaanane neende bawamwaanda b'omutuki wa Samaria, obaboolere oti, ‘Muchia ohweteeba hu Bbaali-sebbubbu nasaae wa Ekironi, olwohuba haba sihuli neende Nasaae mu Yisiraeli, kose haba?’

⁴Mani sakira sino nisyo si Omwaami aboola, ‘Haba soochia husiingira otule hu buliri bwao, nae mubyadyeeri bweene, ochia ohufwa.’ ” Elija mani naachia.

⁵Bawamwaanda bano bakobola eyiri omutuki mani yabateeba ati, “Lwasiina mukoboole?”

⁶Nabo bamuboolera bati, “Aliwo omusaacha yihubukanaane nae yaatuboolera ati, Mukobole eyiri omutuki obatumire, mani mumuboolere muti, Omwaami aboola ati, ‘Abulao Nasaae mu Yisiraeli hu wemeeo ochie weteebe hu Bbelisebbuubbu, nasaae wa Ekironi? Mani sakira haba soochia husiingira otule hu buliri bwao, nae mubwadyeeri bweene, ochia ohufwa.’ ”

⁷Nae omutuki yabateeba ati, “Omusaacha abukanaane naang'we mani yaababoolera emboosi chino abeere afwaana atye?”

⁸Nabo bamukobolamo bati, “Abeere yefwaalire engubo y'eseero ly'obwooya, haandi niyeboyere oluhoba mu sibuno.” Mani omutuki yaboola ati, “Niye Elija Omutisibiti.”

⁹Mani omutuki naatuma omusikaari ohuyira omukaanda kw'abasikaari amahumi kataanu achie neende abasikaari amahumi kataanu aleete Elija. Omusikaari oyo yachia yakaana Elija niyehaale aakulu wa sigulu niyamuboolera ati, “Ewe omuundu wa Nasaae, omutuki aboola ati, ‘Chaayo.’ ”

¹⁰Nae Elija yamukobolamo ati, “Nikali mbwe ndi omuundu wa Nasaae, leha omuliro kwaaduhe ohutula Muukulu mani kuhusihirise alala neende abasikaari bao amahumi kataanu.” Mani omuliro kwaatula Muukulu kwaamusihirisa alala neende abasaacha bae amahumi kataanu.

¹¹Haandi omutuki yatuma omusikaari wuundi ohuyira abasikaari amahumi kataanu. Mani yachia eyiri Elija yamuboolera ati, “Ewe omuundu wa Nasaae, omutuki alagira ati, ‘Chaayo bwaangu!’ ”

¹²Nae Elija yamukobolamo ati, Nikali mbwe ndi omuundu wa Nasaae, leha omuliro kwaaduhe nikutula Muukulu mani kuhusihirise alala neende abasikaari bao amahumi kataanu. Mani omuliro kwa Nasaae kwaatula Muukulu mani kwaamusihisira alala neende abasaacha bae amahumi kataanu.

¹³Haandi omutuki yatuma ehabi lyohudatu omusikaari ohuyira abasikaari amahumi kataanu. Omusikaari wohudatu wuno, ohulira abasikaari amahumi kataanu, yachia mani yasigama mu moni wa Elija, mani yamwekweeda n'aboola ati, “Ewe omuundu wa Nasaae, husaba wuungwiire esisa, ese alala neende abahalaabani bao amahumi kataanu bano, wonia obulamu bweefwe.

¹⁴Bona, omuliro kutulire Muukulu kwasihirisa emikaanda kira kibiri eky'abasikaari bahulira abasikaari amahumi kataanu alala neende abasaacha baabwe amahumi kataanu-kataanu; nae husaba owonie obulamu bweefwe nooba nookanya.”

¹⁵Mani Malaika w'Omwaami yaboolera Elija ati, “Yihirira ochie nae, otamutya daawe.” Mani Elija yasiingira yaachia nae eyiri omutuki,

¹⁶niyamuboolera ati, “Omwaami aboola ati ‘Olwohuba otumire bawamwaanda ohuchia ohweteeba hu Bbalisebbubbu, nasaae w'Ekironi, sino syeekesa siti abulao Nasaae mu Yisiraeli yoonyala ohweteebaho mani sakira haba soochia ohutula hu buliri bwao, ochia ohufwa.’ ”

¹⁷Mani omutuki oyo yafwa ohuchianakana neende Emboosi y'Omwaami yi Elija yalomaloma. Mani Yehoramu mwaanang'ina Ahasia yamusihira ohuba omutuki mu mwaaka kw'ohubiri okw'obutuki bwa Yehoramu omwaana wa Yehosafati, omutuki wa Yuda, olwohuba Ahasia haba siyali neende omwaana musyaani.

¹⁸Bulaanu ebiindu biindi bi Ahasia yahola byaandiikwa mu sitabo sya Ebyaliwo by'Abatuki ba Yisiraeli.