Read saamia 2 Abatuki 11 Bible Online

2 Abatuki 11 - saamia bible

2 Abatuki 11

¹Bulaanu Atalia, ng'ina omutuki Ahasia niyabona ati beetere omwaana wae, yalagira ati basihirise edaala ly'obutuki lyoosi.

²Nae Yehosebba, omuhaana w'omutuki Yoramu, haandi mboochoong'ene Ahasia, yabukula Yoasi, omwaana wa Ahasia, yamwiiba yaamutusa eyiri abaana basyaani b'omutuki abali nibali aambi ohwiitwa, yamukisa mu siseenge si bakonamo, mani yamuwonia, Atalia yaahaya ohumwiita.

³Yehoseba naaba nae n'akisirwe mu nyuumba y'Omwaami ohumala emyaaka kisaasaba, ebiha ebyo Atalia niye owali naatuka esyaalo esyo.

⁴Nae mu mwaaka kwa kitaanu-na-kibiri, omulaamisi Yehoyaada yatuma abeemeresi b'amaye abalaangwa bati, Abakali neende abaliindi b'edooho, mani naabalaanga beeche yaali mu nyuumba y'Omwaami. Yahola nabo endagaano, mani beechubira mu nyuumba y'Omwaami, n'abeekesa omwaana w'omutuki Yoasi.

⁵Mani n'alagira ati, “Sino nisyo si munaaholeenge: esituundu silala esyohudatu hweeng'we nimuchia hu mulimo kweeng'we hu Sabbaato, muliindeenge enyuumba y'omutuki.

⁶(Esituundu silala syohudatu siindi sinaliindeenge hu siruwa Suuri, haandi esituundu silala syohudatu siindi sinaabecheenge hu siruwa siri emukoongo w'abaliindi), muchia ohuliindaanga edooho.

⁷Emikaanda kibiri hweeng'we abanaabecheenge nibamalire omulimo kwaabwe kw'ohuhola hu Sabbaato, kinaachicheenge ohuliinda Enyuumba y'Omwaami

⁸nimweebodohaanie omutuki, buli muundu naali neende ebilwaaniso mu mahono kae. Buli muundu oneengireenge mu nyiriri cheeng'we achia ohwiitwaangwa sa. Mubecheenge alala neende omutuki buli yi achiira.”

⁹Abeemeresi b'amaye banaholaanga buli siindu koti lu omulaamisi Yehoyaada anaabalagireenge. Buli muhoongo onayiraanga abasikaari bae abanabechaanga nibawuluuhire hu Sabbaato neende abanabechaanga nibachia hu mirimo hu Sabbaato, banachichaange eyiri omulaamisi Yehoyaada.

¹⁰Omulaamisi Yehoyaada anaberesaanga abeemeresi amafumo neende engabo ebyali eby'omutuki Daudi; ebyalichiingi mu nyuumba y'Omwaami.

¹¹Mani abaliindi banasiingiraanga beema, buli muundu n'adiirire ebilwaaniso byae mu mahono, ohutulira emwaalo w'enyuumba ohwoolera elalira emukulu w'enyuumba, ohwebodoohania alutaari neende enyuumba yeene.

¹²Yehoyaada yatusa erwaanyi Yoasi omwaana w'omutuki, mani yaamufwaasa ekofia y'obutuki, mani naamudiisa esyandiiko syalimo amalako; bamubaha amafuta mani abamuhola omutuki. Abaandu boobba mu mayu, nibaboola bati, “Omutuki ayiindire!”

¹³Nae Atalia niyawulira esiyoka sy'abaliindi neende esy'abaandu, yaachia mu nyuumba y'Omwaami yi baandu bali nibebuusire.

¹⁴Nae niyolayo sa ati, yabona omutuki yi bali ni bahataao niyeemere aambi neende omusiiro, ohuchianakana neende emiduunga kyaabwe, haandi abeemeresi neende abahubbi b'eturumbete nibali aambi neende omutuki, haandi abaandu bomu syaalo boosi nibasangaalire haandi niboobba eturumbete. Mani Atalia yataandula engubo chae yaboola ati, “Muuhobere! Muuhobere!”

¹⁵Omulaamisi Yehoyaada yalagira abeemeresi abali nibeemiriire amaye ati, “Mumutuse erwaanyi nimumubisira akatikaati w'enyiriri; mumwiite neende engaanga buli muundu omuloondaho.” Olwohuba omulaamisi yali n'aboolere ati, “Mutamwiitira mu nyuumba y'Omwaami haba daawe.”

¹⁶Mani nibadiira Atalia nibamuyira, nibabitira mu siruwa sy'efaraasi nibachia ena nyuumba y'omutuki, mani nibamwiitira eyo.

¹⁷Yehoyaada yahola endagaano akatikaati w'Omwaami neende omutuki neende abaandu ati, banaabecheenge abaandu b'Omwaami; haandi neende akatikaati w'omutuki neende abaandu.

¹⁸Mani abaandu bomu syaalo boosi nibachia ena nyuumba ya Bbaali nibayilikula-likula; mani nibafunakira elalira alutaari chae neende ebiloongaloongwe bya Bbaali byoosi, haandi nibeetera Matani, omulaamisi wa Bbaali, mu moni w'alutaari. Yehoyaada yata abaliindi ohuliinda enyuumba y'Omwaami.

¹⁹Yabukula abeemeresi b'abasikaari, abahiingakiriri, abaliindi, neende abaandu bomu syaalo boosi; mani nibatusa omutuki mu nyuumba y'Omwaami, nibahuumba nibabitira mu siruwa sy'abaliindi nibachia ena nyuumba y'omutuki. Yoasi niyeemao niyeehala hu sisaala sy'obutuki.

²⁰Abaandu bomu syaalo boosi basaangaala; Mani esiko syayenjeera chi, Atalia naamalire ohwiitirwa ena nyuumba y'omutuki neende olugaanga.

²¹Yoasi yeehaswa ohuba omutuki wa Yuda naali neende emyaaka kitaanu-na-kibiri eky'obuhuluundu.