Read saamia 2 Abatuki 12 Bible Online

2 Abatuki 12 - saamia bible

2 Abatuki 12

¹Mu mwaaka kwa hataanu-na-habiri okw'obutuki bwa Yehu omutuki wa Yisiraeli, Yoasi yeehaswa ohuba omutuki wa Yuda, mani yaatukira mu Yerusalemu ohumala emyaaka amahumi kane. Ng'ina Yoasi yali Sibbia, omuhaana ohutula mu Bberisebba.

²Yoasi wuno yahola ebiindu bilai mu moni w'Omwaami mu bulamu bwae bwoosi, olwohuba omulaamisi Yehoyaada yamukerakiraanga.

³Ohumalaho, ebyeembeho by'amasabo mahoongo k'abakafiiri sibyamalwao daawe; abaandu bemeeda sa ohuyaaniraangayo ebiyaanwa neende ohunioohesera obubbaani.

⁴Mani Yehoasi n'aboolera abalaamisi ati, “Eseende choosi echitula mu biindu byoolerefu ebileetwa mu nyuumba y'Omwaami, neende eseende choosi chi buli muundu akererwa ohutusa eseende chitula mu bikero by'abaandu, neende eseende chi muundu omweene yeeyamire ohuleeta mu nyuumba y'Omwaami,

⁵lehe abalaamisi bachiyire, buli mulaamisi ayire eseende ch'abaandu baahalaabanira; mani lehe bachehoonyere ohutereesa enyuumba y'Omwaami nibabona bati siyiri mu mbeera ndai.”

⁶Nae ohwoola mu mwaaka kw'amahumi kabiri-na-chidatu ech'obutuki bwa Yoasi, abalaamisi haba sibadabirisaho enyuumba y'Omwaami daawe.

⁷Mani sakira omutuki Yoasi yalaanga Yehoyaada omulaamisi alala neende abalaamisi baandi mani n'abateeba ati, “Lwasiina haba si muli ohutereesa enyuumba y'Omwaami?” Mani ohutula bulaanu, mutatusaho hu baandu bamuhalaabanira eseende ohuchehoonyera hulweeng'we, nae eseende echo muchiyaane chehoonyerwe ohutereesa enyuumba y'Omwaami.

⁸Abalaamisi bafukiirisania bati haba sibachia ohwemeeda ohutusaanga hu baandu eseende, haandi bati, haba sibacha ohutereesa enyuumba y'Omwaami.

⁹Yehoyaada yeemao yaabukula esanduuku hoongo, yaalidomolamo eliina hu sifuuniho syahwo, yaalita hu ndulo w'alutaari, hu muhono muluungi, omuundu naali ohwiingira mu nyuumba y'Omwaami. Mani abalaamisi babechaanga abaliindi bohu siruwa balakasaangamo eseende chaleetwaanga mu nyuumba y'Omwaami.

¹⁰Nae nibabonaanga bati esanduuku elyo liyereremo eseende, omwaandiiki w'omutuki neende omulaamisi muhuluundu beechaanga mani babala eseende echo baachita mu magunia kalichiingi mu nyuumba y'Omwaami.

¹¹Nibamalaanga ohuboya eseende echomu magunia, bachiidisaanga abaandu bahulira omulimo kw'ohutereesa enyuumba y'Omwaami; mani abo nibatuunga ababaachi neende aboombahi abali nibatereesa enyuumba y'Omwaami,

¹²neende aboombahira amakina alala neende abo abakabaacha. Bakula embao alala neende ohuyaba amakina k'ohutereesera enyuumba y'Omwaami.

¹³Nae eseende echo haba sichehoonyerwaangaho ohukula ebiindu bidahibwa mu nyuumba y'Omwaami koti: ekaraayi ch'efeesa, ebbakuli, eturumbete, ebiteeni bigeeng'waho amataara, oba ebikoombe by'esaabbu, oba eby'efeesa.

¹⁴Olwohuba eseende echo chabereswaanga abahalaabani abali nibatereesa enyuumba y'Omwaami.

¹⁵Haandi abaandu babadisaanga eseende haba sibabateebaanga engeri y'ohuchehoonyeramo, olwohuba abaandu abo bachehoonyeraanga neende obweesikwa.

¹⁶Eseende chayaanwaangayo ohutula hu biyaanwa by'emisaango, neende ech'ebiyaanwa by'ebyonoono, haba sibyaletwaanga mu nyuumba y'Omwaami; nae chabechaanga ech'abalaamisi.

¹⁷Mu biha ebyo, Hasaeli omutuki wa Siria yachia yaaseeta esiko sya Gaati, mani n'asiwaamba. Nae Hasaeli nakaluuhanira Yerusalemu ohusilwaania.

¹⁸Yoasi, omutuki wa Yuda, nae yabukula ebiindu byoosi bi Yehosafati, Yehoramu, neende bi Ahasia bakuukaang'ene, bali beeyama koti ebiyaanwa eyiri Omwaami neende ebiyaanwa bi Yoasi mweene yeeyama ohuyaanira Omwaami, neende esaabbu yoosi eyali niyiri mu bibiihiro byomu nyuumba y'Omwaami, neende mu dooho ly'omutuki, Yoasi mani yaabiberesa Hasaeli omutuki wa Siria. Mani Hasaeli naalehera ao ohuseeta Yerusalemu, naawaao.

¹⁹Bulaanu ebiholwa bya Yoasi biindi byoosi neende buli siindu si yahola byoosi byaandiikwa mu sitabo sya Ebyaliwo by'abatuki ba Yuda

²⁰Mani abahalaabani bae nibasiingira nibahola olukwe, nibeetera Yoasi mu nyuumba yilaangwa yiti, Milo eyiri hu ngira yiihirira Sila.

²¹Yosakaari omwaana wa Simeyaati, neende Yehosabbadi omwaana wa Someri, abahalaabani ba Yoasi nibo abamufumita, mani yaafwa. Yoasi oyo yasiihwa alala neende bakuukaang'ene mu siko sya Daudi, mani Amasia omwaana wae yaakaluha mu makulu kae koti omutuki.