Read saamia 2 Abatuki 14 Bible Online

2 Abatuki 14 - saamia bible

2 Abatuki 14

¹Mu mwaaka kw'ohubiri kw'obutuki bwa Yehoasi, omwaana wa Yehoahasi, omutuki wa Yuda, Amasia omwaana wa Yehoasi, omutuki wa Yuda, yachaaka ohutuka.

²Amasia n'achaaka ohutuka, yali neende emyaaka amahumi kabiri-na-chitaanu echo'buhuluundu, mani yatuka ohumala embaka y'emyaaka amahumi kabiri-neende-chitaanu-na-chine naali mu Yerusalemu. Eliita lya ng'ina lyali Yehoyadini ohutula Yerusalemu.

³Amasia yahola ebiindu bilai mu moni w'Omwaami. Kata katyo haba siyali koti Daudi kuukaang'ene, ohutusaho yahola ebiindu byoosi bi Yehoasi laatang'ene yaholaanga.

⁴Amasia haba siyamalao ebyeembeho bihoongo by'abakafiiri bi baandu beenamiraangamo; nae abaandu bemeeda sa ohuyaaniraangamo ebiyaanwa neende ohuniooheseraangamo obubbaani.

⁵Mani Amasia niyamala ohwomiiswa mu bunyala bw'obutuki sa ati, yeeta abahalaabani bae abali nibeeta laatang'ene.

⁶Nae Amasia haba siyeeta abaana b'abeeti abo; ohuchianakana neende ebyaandiikwa mu sitabo sy'amalako ka Musa, koti lu Omwaami yalagira ati, “Abeebusi haba sibaneteengwe ohweema hu musaango kw'abaana baabwe, noomba abaana beetwa ohweema hu musaango kw'abeebusi baabwe; nae buli muundu aneetweenge ohweema hu syonoono syae syeene.”

⁷Amasia yeetera mu hooho ly'Omuunyu abasikaari b'Edomu elifu ehumi, mani yaawaambira esiko sya Sela mu biita, yasilaanga ati, Yokuteeli, eliita lisisilaangwa ohwoola bulaanu buti.

⁸Mani Amasia naatuma bawamwaanda eyiri Yehoasi omwaana wa Yehoahasi, omwiichuhulu wa Yehu omutuki wa Yisiraeli, n'aboola ati, “Yiicha, leha hubonane emoni-hu-moni.”

⁹Mani Yehoasi omutuki wa Yisiraeli naatuma emboosi eyiri Amasia omutuki wa Yuda n'aboola ati, “Ahasaala h'amawa ha Lebbanooni hatumira omuseengese kwa Lebbanooni emboosi nihaboola hati, ‘Leha omwaana waange adeehye omuhaana wao’; mani esolo ndeende ya Lebbanooni niyibitao, niyiseenakira ahasaala h'amawa aho.

¹⁰Mubwadyeeri bweene oyingiire Edomu, esyo nisihuleetera ohwehuduumbasa. Leha oluyaali lwao luhumale, mani odoong'e mu ngo wao. Lwasiina wekoonyera ebidinyu by'ohusihirisa Yuda alala naawe mweene?”

¹¹Nae Amasia naahaya ohuwulira. Mani Yehoasi omutuki wa Yisiraeli naamuseeta. Yehoasi neende Amasia omutuki wa Yuda nibakwiichanamo ohulwaanira Bbeeti Semesi mu Buyudaaya.

¹²Mani Yisiraeli nisiyiingira Yuda, buli musikaari wa Yuda niyeeruha ohukobolayo engo wae.

¹³Yehoasi omutuki wa Yisiraeli yawaambira Amasia omutuki wa Yuda, omwaana wa Ahasia Bbeeti Semesi, mani yaamuleeta mu Yerusalemu. Mani Yehoasi naalikula esiko sya Yerusalemu ohutula hu Siruwa sya Efuraimu ohwoola hu Siruwa siri hu Soonda, obuleeyi bwaaka koti emiita emia chibiri (200).

¹⁴Yehoasi yayaaya esaabbu yoosi neende efeesa yoosi, neende ebiindu byoosi bi yanyoola mu nyuumba y'Omwaami, neende mu bibiihiro byomu nyuumba y'omutuki, neende abaandu ba yadiira koti abawaambe, mani yaakobola Samaria.

¹⁵Bulaanu ebiholwa bya Yehoasi biindi bi yahola, neende obunyala bwae, neende koti lu yalwaania Amasia omutuki wa Yuda, byaandiikwa mu Sitabo sya Ebibi by'Abatuki ba Yisiraeli.

¹⁶Yehoasi yaafwa, mani bamusiiha mu Samaria alala neende abatuki ba Yisiraeli; mani Yerobboamu omwaana wae naamukobola mu makulu koti omutuki.

¹⁷Amasia omwaana wa Yoasi, omutuki wa Yuda yayiindira ohumala emyaaka ehumi-na-kitaanu, Yehoasi omwaana wa Yehoahasi omutuki wa Yisiraeli naamalire ohufwa.

¹⁸Bulaanu ebiholwa bya Amasia biindi byaandiikwa mu Sitabo sya Ebyaliwo by'Abatuki ba Yuda.

¹⁹Abaandu beehoba mu Yerusalemu ohwiita Amasia. Mani Amasia niyeeruhira mu Lakisi. Nae batuma abaandu ohumuloondaho mu Lakisi, mani baamwiitira eyo.

²⁰Omulaambo kwae bakuleetera hu faraasi, baamusiiha mu Yerusalemu alala neende bakuukaang'ene mu siko sya Daudi.

²¹Abaandu bomu Buyudaaya boosi beemao baadoola Wusia owali neende emyaaka ehumi-na-kisaasaba, ohukobola mu makulu k'Amasia laatang'ene koti omutuki.

²²Wusia yoombaha buyaaha esiko sy'Elaati, mani yaasikobosa mu Buyudaaya, laatang'ene n'afwiire.

²³Mu mwaaka kw'ehumi neende hataanu okw'obutuki bwa Amasia omwaana wa Yoasi, omutuki wa Yuda, Yerobboamu omwaana wa Yehoasi, omutuki wa Yisiraeli yachaaka ohutukira mu Samaria, mani naatuka Yisiraeli ohumala emyaaka amahumi kane neende mulala.

²⁴Yerobboamu wuno yonoona muno mu moni w'Omwaami. Haba siyalehanaho neende ebyonoono by'omutuki Yerobboamu wamutaangirira, omwaana wa Nebbati, ebyakera Yisiraeli syonoona.

²⁵Yerobboamu wa habiri wuno yakobosao olwaaho lwa Yisiraeli ohutulira lwaaho lwa Hamati ohwoolera elalira hu Mwaalo kwa Arabba, ohuchianakana neende Emboosi yi Omwaami, Nasaae wa Yisiraeli, yalomalomera mu muhalaabani wae Yona omwaana wa Amitaayi, omunabbi owa Gaatiheferi.

²⁶Olwohuba Omwaami yali naabweene ohusaanda hw'Abaisiraeli ohwali ohubi muno ohwo. Olwohuba yabulahoo omuundu kata mulala owubahoonya.

²⁷Nae Omwaami haba siyali naadaha Abaisiraeli basihiriswe bawe hu syaalo daawe. Mani Omwaami naabawonia niyehoonyera Yerobboamu omwaana wa Yehoasi.

²⁸Bulaanu ebiholwa bya Yerobboamu biindi, alala neende ebiindu bi yahola, neende obunyala bwae, koti lu yalwaana, haandi yaakobosera Yisiraeli Damasiko neende Hamati, ebyali ebya Yuda, byaandiikwa mu sitabo sya Ebyaliwo by'Abatuki ba Yisiraeli.

²⁹Yerobboamu yafwa mani baamusiiha mu ng'ani ch'abatuki ba Yisiraeli, Sakaria omwaana wae niye owamukobola mu makulu koti omutuki.