Read saamia 2 Abatuki 15 Bible Online

2 Abatuki 15 - saamia bible

2 Abatuki 15

¹Mu mwaaka kw'amahumi kabiri neende hataanu-na-habiri okw'obutuki bwa Yerobboamu omutuki wa Yisiraeli, Wusia omwaana wa Amasia, omutuki wa Yuda, yachaaka ohutuka.

²Wusia yachaaka ohutuka naali neende emyaaka ehumi neende kisaasaba eky'obuhuluundu, mani yaatukira mu Yerusalemu ohumala emyaaka amahumi kataanu neende kibiri. Eliita lya ng'ina lyali Yekoliya omuhaana ohutula Yerusalemu.

³Wusia yahola ebiindu bilai bisaangaasa Omwaami muno, ebifwaanana neende bi Amasia laatang'ene yahola.

⁴Kata katyo, ebyeembeho bihoongo by'abakafiiri by'ohwiinamirangamo sibyamalwao haba. Abaandu bachiiririra sa ohuyaaniraanga mu syaalo omwo ebiyaanwa bisaambwa haandi neende ohuniooheseramo obubbaani.

⁵Omwaami sakira yayaambya Wusia obulwaae; mani omutuki yaaba omugeenge ohwoola lu yafwiira. Yabechaanga mu nyuumba yae yeeng'ene. Omusyaani wae Yotamu niye owabechaanga mu dooho, naatuka abaandu bomu syaalo esyo.

⁶Bulaanu ebiholwa bya Wusia, neende ebiindu byoosi bi yahola byaandiikwa mu sitabo sya Ebyaliwo by'abatuki ba Yuda

⁷Mani Wusia naafwa, nibamusiiha alala neende bakuukaang'ene mu siko sya Daudi. Yotamu omwaana wae niye owamukaluha mu makulu koti omutuki.

⁸Mu mwaaka kw'amahumi kadatu neende hataanu-na-hadatu okw'obutuki bwa Wusia omutuki wa Yuda, nilwo lu Sakaria omwaana wa Yerobboamu wa habiri, yachaakiraho ohutuka Yisiraeli, mani yatukira mu Samaria ohumala emyoosi kisaasaba.

⁹Sakaria yahola ebiindu bibi muno mu moni w'Omwaami, koti lu laatang'ene yesi yahola. Haba siyalehanaho neende ebyonoono bya Yerobboamu omwaana wa Nebbati, ebyakera Yisiraeli syonoona.

¹⁰Saluumu omwaana wa Yabbesi, yamulyaamo olukwe, yaamufumita abaandu nibabona, yaamwiitira Yibbuleamu, mani yaatuka mu bweyaango bwae.

¹¹Bulaanu ebiholwa biindi ebya Sakaria, bone, byaandiikwa mu sitabo sya Ebyaliwo by'abatuki ba Yisiraeli.

¹² (Sino syali esisuubise sy'Omwaami si yaberesa Yehu ati, “Ab'olwiibulo lwao bahabe abatuki ba Yisiraeli ohwoola hu lwiibulo lwa hane.” Mani syolerera sityo.)

¹³Saluumu omwaana wa Yabbesi yachaaka ohutuka mu mwaaka kw'amahumi kadatu neende hataanu-na-hane okw'obutuki bwa Wusia omutuki wa Yuda, mani yaatukira mu Samaria ohumala embaka y'omwoosi mulala.

¹⁴Ao mani Menahemu omwaana wa Gaadi naatula Tirisa niyeecha Samaria, mani naafumitira Saluumu omwaana wa Yabbesi mu Samaria naamwiita, mani naatuka mu bweyaango bwae.

¹⁵Bulaanu ebiholwa bya Saluumu biindi, neende olukwe lu yahola, bone, byaandiikwa mu sitabo sya Ebyaliwo by'abatuki ba Yisiraeli.

¹⁶Mu biha ebyo, Menahemu yasihirisira elalira esiko sya Tapuuya alala neende abaandu basyo boosi, neende ebituundu byasyo bisyebodoohaanie, ohutulira elalira Tirisa ohwemeeda mu moni; olwohuba haba sibeeyama ohuba mu bunyala bwae. Mani sakira yasisihirisa, yaabosyoola enda ch'abahasi bali aasito.

¹⁷Mu mwaaka kw'amahumi kadatu neende hataanu-na-hane okw'obutuki bwa Wusia omutuki wa Yuda, Menahemu omwaana wa Gaadi yachaaka ohutuka Yuda, mani n'atukira mu Samaria ohumala emyaaka ehumi.

¹⁸Menahemu yahola ebiindu bibi muno mu moni w'Omwaami. Mu bulamu bwae bwoosi, haba siyalehanaho neende ebyonoono bya Yerobboamu omwaana wa Nebbati byoosi, ebyakera Yisiraeli syonoona.

¹⁹Puuli, omutuki wa Asiria yaseeta Yisiraeli, mani Menahemu yaamuberesa etaani amahumi kadatu neende chine ech'efeesa, ohukula Puuli ati anyale ohumuhoonya ohwomiisa obunyala bwae mu butuki.

²⁰Menahemu yasolosa eseende ch'ohuberesa Puuli omutuki wa Asiria echo ohutula hu basaacha bayiinda bomu Yisiraeli, buli muundu naatusa ebituundu amahumi kataanu eby'efeesa. Mani omutuki w'Asiiria naakobolayo, naahaya ohudoong'a mu syaalo sya Yisiraeli.

²¹Bulaanu ebiholwa bya Menahemu biindi, neende ebiindu bi yahola byoosi byaandiikwa mu sitabo sya Ebyaliwo by'abatuki ba Yisiraeli.

²²Menahemu yafwa baamusiiha alala neende bakuukaang'ene mani omwaana wae yi balaanga bati Pekahia naamukobola mu makulu koti omutuki.

²³Mu mwaaka kw'amahumi kataanu okw'obutuki bwa Wusia omutuki wa Yuda, Pekahia omwaana wa Menahemu yachaaka ohutuka Yisiraeli, mani naatukira mu Samaria ohumala emyaaka kibiri.

²⁴Pekahia yahola ebiindu bibi muno mu moni w'Omwaami, mani yesi yaahaya ohulehanaho neende ebiholwa bibi bya Yerobboamu omwaana wa Nebbati, ebyakera Yisiraeli syonoona.

²⁵Mani omuhoongo w'eye lyae olaangwa ati Peeka omwaana wa Remalia, naahola olukwe neende abasaacha amahumi kataanu ohutula mu Gileadi, naamufumitira mu Samaria, abuundu woomu w'ohweliindira mu dooho ly'omutuki, n'amwiita mani n'achaaka ohutuka mu bweyaango bwae.

²⁶Bulaanu ebiholwa bya Pekahia biindi, neende ebiindu biindi bi yahola byoosi, bone, byaandiikwa mu sitabo sya Ebiha by'abatuki ba Yisiraeli.

²⁷Mu mwaaka kw'amahumi kataanu-na-habiri okw'obutuki bwa Wusia omutuki wa Yuda, Peeka omwaana wa Remalia yachaaka ohutuka Yisiraeli naali mu Samaria, mani yaatuka ohumala emyaaka amahumi kabiri.

²⁸Peeka yonoona muno mu moni w'Omwaami. Yesi haba siyalehanaho neende ebyonoono bya Yerobboamu omwaana wa Nebbati, ebyakera Yisiraeli syonoona.

²⁹Mu ndaalo cha Peeka omutuki wa Yisiraeli, Tigilati-Pileseri, omutuki wa Asiria yawaamba ebiko bya Yijoni, Abbelibbeetimaaka, Yanoa, Kedesi, Hasoori, Gileadi, neende Galilaaya, neende esyaalo sya Nafutaali syoosi; mani naayira abaandu mu jeela mu Asiria.

³⁰Mu mwaaka kw'amahumi kabiri okw'obutuki bwa Yotamu omwaana wa Wusia naali omutuki wa Yuda, Hosea omwaana wa Ela, yahola olukwe, mani yaafumita Peeka omwaana wa Remalia, yaamwiita, mani yaachaaka ohutuka mu bweyaango bwae.

³¹Bulaanu ebiholwa bya Peeka, neende ebiindu biindi bi yahola byoosi, bone, byaandiikwa mu Sitabo sya Ebyebyaliwo eby'Abatuki ba Yisiraeli.

³²Mu mwaaka kwa habiri kw'obutuki bwa Peeka omwaana wa Remalia, omutuki wa Yisiraeli, Yotamu omwaana wa Wusia, omutuki wa Yuda, yachaaka ohutuka.

³³Yotamu yachaaka ohutuka naali neende emyaaka amahumi kabiri neende kitaanu eky'obuhuluundu, mani yaatukira mu Yerusalemu ohumala emyaaka ehumi-na-kisaasaba. Eliita lya ng'ina lyali Yerusa, omuhaana wa Sadoki.

³⁴Yotamu yahola ebiindu bilai mu moni w'Omwaani, ohuchianakana neende ebiindu bilai bi Wusia laatang'ene yahola.

³⁵Kata katyo, Yotamu haba siyamalayo ebyeembeho by'ohwiinamiramo eby'esikafiiri. Sakira abaandu bemeeda sa ohuyaaniraanga neende ohuniooheseraanga obubbaani mu syaalo omwo. Yotamu niye owoombaha esiruwa sy'emukulu syohu nyuumba y'Omwaami.

³⁶Bulaanu ebiholwa bya Yotamu, neende ebiindu biindi byoosi bi yahola, byaandiikwa mu sitabo sya Ebyaliwo by'abatuki ba Yuda.

³⁷Mu ndaalo ch'obutuki bwa Yotamu nimwo mu Omwaami yachaakira ohutuma Resini omutuki wa Siria neende Peeka omwaana wa Remalia ohuseeta Yuda.

³⁸Yotamu yafwa nibamusiiha alala neende bakuukaang'ene mu siko sya Daudi kuuka yae; mani Ahasi omwaana wae naamukobola mu makulu koti omutuki.