Read saamia 2 Abatuki 17 Bible Online

2 Abatuki 17 - saamia bible

2 Abatuki 17

¹Mu mwaaka kw'ehumi-na-habiri okw'obutuki bw'Ahasi omutuki wa Yuda, Hosea omwaana wa Ela yachaaka ohutuka Yisiraeli, mani n'atukira mu Samaria ohumala embaka y'emyaaka kitaanu-na-kine.

²Hosea yahola ebiindu bibi mu moni w'Omwaami, nae haba siyali omubi muno koti abatuki ba Yisiraeli abamutaangirira.

³Salimanesa, omutuki wa Asiria yaseeta Hosea ohumulwaania. Yayiingira Hosea, mani yaamuhola yaachaaka ohumutoosaanga omusolo.

⁴Nae omutuki wa Asiria niyafuumbula ati Hosea achia ohumulyaamo olukwe; olwohuba Hosea yali naatumire bawamwaanda eyiri So, omutuki wa Misiri, mani niyaakama ohutooyaanga omusolo eyiri omutuki wa Asiria koti lu yali naaholaanga buli mwaaka; sakira omutuki wa Asiria yamudiira yaamwiikalira mu jeela.

⁵Omutuki wa Asiria yeemao yaaseeta esyaalo sya Yisiraeli syoosi, yeekalira esiko sya Samaria ohumala embaka y'emyaaka kidatu.

⁶Mu mwaaka kwa chitaanu-na-chine okw'obutuki bwa Hosea, omutuki wa Asiria yawaamba esiko sya Samaria, yaayira Abaisiraeli mu Asiria koti abawaambe, mani yaata abaandi mu siko sya Hala, abaandi mu situundu sya Habbori, abaandi aambi neende omwaalo kwa Gosani, haandi abaandi mu biko by'Abamedia.

⁷Sino syali sityo, olwohuba Abaisiraeli bali nibonoonere mu moni w'Omwaami Nasaae waabwe, owabatusa mu syaalo sya Misiri, mu mahono ka omutuki wa Misiri, yi beenamiraanga banasaae baandi,

⁸haandi nibakeenderaanga mu miduunga ky'abaandu baandi. Omwaami yatusamo abaandu baandi abo, Abaisiraeli nibali aambi ohwoola, nibaloonda emiduunga ki batuki ba Yisiraeli bataao.

⁹Mani Abaisiraeli nibahola mu bweekisi ebiindu bitaali ebilai eyiri Omwaami Nasaae waabwe. Abeene beeyoombahira mu biko byaabwe byoosi ebyeembeho bihoongo by'ohwiinamiramo, ohutula mu biko bihiramo obudiidi ohwoola mu biko bihiramo obuhoongo.

¹⁰Mani niboombahaho hu buli sigulu neende buli aasi wa buli musaala muhoongo esiiro ch'amakina.

¹¹Mani nibanioohesera obubbaani mu buli esyeembeho, koti abaandu baandi baholaanga, ba Omwaami yatusao Abaisiraeli nibali aambi ohwoola. Mani nibahola ebiindu bibi ebyasiingisa etima ly'Omwaami,

¹²nibeenamira ebiloongaloongwe, bi Omwaami yababoolera ati, “Haba simubinamiraanga.”

¹³Mani Omwaami n'alabula Yisiraeli neende Yuda n'abitira mu buli munabbi neende mu buli mutingaali n'aboola ati, “Mukaluuhane mulehane neende engira cheeng'we embi, mudiire ebilagiro byaange neende amalako kaange, ohuloondakana neende amalako ka ndalagira bakuuka yeeng'we, neende ka ndabatumira niimbitira mu bahalaabani baange abanabbi.”

¹⁴Nae nimuhaya ohuwulira, mani mwaaba ab'emitwe myoomu, koti lu bakuuka yeeng'we bali, abahaya ohuwulirira mu Omwaami Nasaae waabwe.

¹⁵Bahaya ohudiira amalako kae, neende endagaano yi yahola neende bakuuka yaabwe, neende ohulabula hu yabalabulamo. Baloondakirira ebiloongaloongwe, beehola ababacha, baloondakanaanga neende esaambo ch'ebyaalo bibebodohaanie, bi Omwaami yali n'ablagiire ohuhaya ohweyira koti abomu byaalo ebyo.

¹⁶Mani nibalehana neende ebilagiro by'Omwaami Nasaae waabwe byoosi, nibasaangulusa ebyuuma, nibeeholera abeene ebiloongaloongwe bibanenamireenge eby'esurusi njere bibiri; neende esifwaanani sya nasaae muhasi olaangwa ati Asera, mani beenamira eng'ining'ini chomuukulu choosi, nibeehola abahalaabani ba Bbaali.

¹⁷Mani nibayaanayo abaana baabwe basyaani neende abahaana koti ebiyaanwa bisaambwa. Nibalakulaanga haandi nibahola eby'eloko, mani nibeweerayo elalira ohuhola ebiindu bibi mu moni w'Omwaami, ebyanyoolesa Omwaami.

¹⁸Sakira Omwaami yanyoolerera Yisiraeli muno, mani yaabeerusa mu moni wae; naatadoong'ao kata mulala ohutusaho abomu Buyudaaya boong'ene.

¹⁹Abayudaaya bosi haba sibadiira ebilagiro by'Omwaami Nasaae waabwe, nae baloondakanaanga neende emiduunga ki Yisiraeli syeteerao.

²⁰Mani Omwaami naahaya abeechuhulu ba Yisiraeli boosi, naabasaandya, haandi naabadiisa mu mahono k'abasuku, ohwoola lu yabeerusira ohutula mu moni wae.

²¹Omwaami niyakabula Yisiraeli ohutula hu nyuumba ya Daudi, Abaisiraeli bahola Yerobboamu omwaana wa Nabbati ohuba omutuki. Yerobboamu yakera Abaisiraeli baatula hu Omwaami mani yaakera bonoona muno.

²²Abaisiraeli baloondakana neende ebyonoono bi Yerobboamu yahola byoosi; baahaya ohulehana nabyo,

²³ohwoola lu Omwaami yabatusira mu moni wae, koti lu yali naabalabuule ohubitira mu banabbi bae boosi. Abaisiraeli nibatuswa mu syaalo syaabwe syeene, nibayirwa mu Asiria koti abakulwa, yi basisiiri ohwoola buti.

²⁴Omutuki wa Asiria yaleeta abaandu ohutula mu Bbabbilooni, Kuuti, Awa, Hamati, neende Sefarifaimu, yaabata mu biko bya Samaria, abuundu yi Abaisiraeli bali nibeeruhira. Mani abaandu abo nibatuka esyaalo sya Samaria, nibamenya mu biko byasyo.

²⁵Nibali hu bahachaaka ohumenyamo, haba sibeesa oluyaali mu Omwaami, mani sakira Omwaami yabasiindihamo edalang'i nichitaho abaandu baandi.

²⁶Mani nibaboolera omutuki wa Asiria bati, “Abaandu ba wayira waabata mu biko bya Samaria haba sibamanyire amalako ka nasaae womu syaalo esyo; sakira abasiindihemo edalang'i, bona, chiri ohubeeta, olwohuba haba sibamanyire amalako ka nasaae womu syaalo esyo.”

²⁷Omutuki wa Asiria yeemao yaalagira ati, “Mutumeyo mulala hu balaamisi ba mwatusayo, achie abe eyo abeekese amalako ka nasaae womu syaalo esyo.”

²⁸Mulala hu balaamisi ba batusa mu Samaria yeecha yaamenya mu Bbeteli, yaabeekesa koti lu bahoyere ohwiisa oluyaali mu Omwaami.

²⁹Nae abaandu ba buli syaalo babaleeta mu Samaria bemeeda ohweholera ebiloongaloongwe byaabwe beene, nibabita abuundu w'ohwiinamiraangamo banasaae, ebyali mu biko bi bamenyamo.

³⁰Abasaacha batula mu Bbabbilooni nibahola esiloongaloongwe sya nasaae waabwe olaangwa Sukootibbenooti. Abasaacha batula Kuuti mani nibahola Nerigaali, abasaacha ba Hamati nabo nibahola Asima,

³¹abaandu batula mu Awa nabo nibahola Nibbihaasi neende Taritaaki; nae Abasefafaimu nibasaambira abaana baabwe mu muliro nibabayaanira Adirameleki neende Anameleki, banasaae ba Sefarifaimu.

³²Abaandu bano bosi beenamiraanga Omwaami, mani nibeedooleraanga abeene abalaamisi yi bayaanireenge abuundu awaabwe ebiyaanwa.

³³Mani beesaanga mu Omwaami oluyaali, nae haandi bahalaabanira banasaae baabwe beene, ohuloondakana neende emiduunga kyomu byaalo bi batulamo.

³⁴Ohwoola buti, basiiholaanga koti lu baholaanga hale. Sibeesaanga oluyaali mu Omwaami haandi sibadiiraanga bi abalagira haandi haba sibabyoseresaanga daawe, kata ohuloondakana neende amalako neende ebilagiro bi Omwaami yalagiraanga abaana ba Yakobbo yalaanga ohuba Abaisiraeli.

³⁵Omwaami yahola endagaano nabo mani yaabalagira ati, “Haba simwiisaangaho oluyaali mu banasaae baandi oba mwabeenamira, oba mwabahalaabaniraanga, oba mwabayaaniraanga ebiyaanwa;

³⁶nae muchia ohwisaanga oluyaali mu Omwaami, owabatusa ohutula mu syaalo sya Misiri neende obunyala bw'amaani neende amaani maangi. Muchia ohumwiinamiraanga haandi mu muyaanireenge ebiyaanwa.

³⁷Mani amalako neende ebilagiro neende amalako ka Musa yabandiikira, mukatecheengeho omwooyo ohukadiira. Haba simwisaanga oluyaali mu banasaae baandi,

³⁸haandi haba simwibiriraanga endagaano yi ndahola naang'we. Haba simwisaanga oluyaali mu banasaae baandi,

³⁹nae muneseenge oluyaali mu Omwaami Nasaae weeng'we, ochia ohubanunula ohutula mu bunyala bw'abasuku beeng'we.”

⁴⁰Nae abaandu abo nibahaya ohuwulira, nae nibadoong'a nibasiiloondakanaanga neende emiduunga kyaabwe mihale.

⁴¹Mani abaandu bomu byaalo ebyo besaanga oluyaali mu Omwaami, nae haandi bahalaabaniraanga ebiloongaloongwe byaabwe; abaana baabwe bosi baholaanga sa nasilala batyo, kata sa neende abeechuhulu baabwe bahola koti lu balaata yaabwe bahola, mani basiihola sa batyo ohwoola buti.