Read saamia 2 Abatuki 18 Bible Online

2 Abatuki 18 - saamia bible

2 Abatuki 18

¹Mu mwaaka kwohudatu okw'obutuki bwa Hosea omwaana wa Ela, omutuki wa Yisiraeli, Hesekia omwaana wa Ahasi, omutuki wa Yuda, yachaaka ohutuka.

²Hesekia yachaaka ohutuka naali neende emyaaka amahumi kabiri neende kitaanu oky'obuhuluundu, mani yaatuka Yerusalemu ohumala embaka y'emyaaka amahumi kabiri neende kitaanu-na-kine. Eliita lya ng'ina lyali Abbi omuhaana wa Sakaria.

³Hesekia yahola ebiindu bilai mu moni w'Omwaami, ohuloondakana neende ebyo byoosi bi Daudi kuukaang'ene yahola.

⁴ Hesekia yamalao abuundu ahoongo aw'ohwiinamiraangamo banasaae, mani yaalikula esiiro haandi yaafunaka-funaka ebiloongaloongwe bya Asera, nasaae muhasi. Haandi yanyoonyobola enjuha y'omugasa yi Musa yali naaholere, olwohuba ohwoola ebiha ebyo, Abaisiraeli bali nibasiyiniooheseraanga obubbaani; enjuha eyo yali yilaangwa Nehusutaani.

⁵Hesekia yeesika Omwaami Nasaae wa Yisiraeli; mani yaabulao omutuki wuundi kata mulala hu batuki ba Yuda boosi owaliho koti niye, hu batuki bamutaangira oba abamuloondaho.

⁶Olwohuba Hesekia yomiirira hu Omwaami, naatamutulaho nabudiidi, haandi yadiira sa amalako ka Omwaami yalagira Musa.

⁷Omwaami yali nae; buli yi yachiraanga, yabechaanga neende ehabi. Hesekia yajeemera omutuki wa Asiria, mani yaahaya ohumuhalaabaniraangaho kata nabudiidi.

⁸Yayiingira Abafilisiti mani yaabaseeta obumenyo bwaabwe bwoosi ohwoola hu Gasa neende ebituundu bisyebodohaanie, omuli ebiko bihoongo neende ebidiidi.

⁹Mu mwaaka kwa hane okw'obutuki bwa Hesekia, okwo nikwo okwali omwaaka kwa hataanu-na-habiri okw'obutuki bwa Hosea omwaana wa Ela, omutuki wa Yisiraeli Salimanesa omutuki wa Asiria ku yaseeteraho esiko sya Samaria mani yaasyeebodoohania.

¹⁰Nae emyaaka kidatu nikyabitao, yasiwaamba. Mu mwaaka kwa hasaasaba okw'obutuki bwa Hesekia, okwo nikwo okwali omwaaka kwa kitaanu-na-kine eky'obutuki bwa Hosea omutuki wa Yisiraeli, esiko sya Samaria syawaambwa.

¹¹Mani omutuki wa Asiria yaayira Abaisiraeli mu Asiria, mani abaandi yaabata mu siko sya Hala, abaandi yaabata mu bituundu bya Gosani aambi neende omwaalo kwa Habbori, nae abaandi yaabata mu biko by'Abamedia.

¹²Samaria syayiingirwa olwohuba Abaisiraeli haba sibawuliraho ekono ly'Omwaami Nasaae waabwe, nae baahalaka sa endagaano yae, mani baajeemera ebyo byoosi bi Musa omuhalaabani w'Omwaami yabalagira; mani baahaya ohubiwulira noomba ohubidiira.

¹³Mu mwaaka kw'ehumi neende kine okw'obutuki by'omutuki Hesekia, Senakeribbu omutuki wa Asiria yaseeta ebiko bya Yuda byoosi ebyasitwa olukaka, mani yaabiwaamba.

¹⁴Hesekia omutuki wa Yuda yatumira omutuki wa Asiria owali naali Lakisi emboosi n'aboola ati, “Ese nyonoonere, mani ewe kobolayo engo olehe ohutuseeta; njia ohufukiirira buli siindu syoonandagire ohuola.” Mani omutuki wa Asiria n'asaba Hesekia omutuki wa Yuda etaani ehumi ech'efeesa neende etaani ndala ey'esaabbu.

¹⁵Hesekia yamuberesa efeesa yoosi eyali niyiri mu nyuumba y'Omwaami, neende eyali niyiri mu bibiihiro byomu nyuumba y'omutuki.

¹⁶Mu biha ebyo, Hesekia yaalakata esaabbu yoosi, kata eyali huu njiki ch'enyuumba y'Omwaami, neende ohutula hu misiiro ki Hesekia omutuki wa Yuda yi yali naayibwiihireho naayikisire, mani n'achiberesa omutuki wa Asiria.

¹⁷Mani omutuki wa Asiria owali naali Lakisi yatuma abeemeresi b'amaye bae bahunuufu badatu: Tarutaani, Rabbisarisi neende Rabbusake ohuchia neende eye ehoongo ohuseeta Hesekia mu Yerusalemu. Nae niboola Yerusalemu, beecha beema hu muhoosi kw'esidiba sy'emukulu, okuli hu ngira hoongo eyichia ena Mukuunda Kw'omwoosi W'engubo.

¹⁸Mani nibalaangira omutuki, abahunuufu badatu ab'omutuki Hesekia: Eliakimu omwaana wa Hilikia, owali naahulira edooho, neende Sebbina, omuwandiiki, neende Yoya omwaana w'Asafu, owali omuliindi w'ebyaandiiko, batulayo beecha ohubabukaanira.

¹⁹Rabbusake yababoolera ati, “Muboolere Hesekia muti, Omutuki muhunuufu, omutuki wa Asiria ateeba ati: Obweesikwa bwao obwo bweema hu siina?

²⁰Obaasa oti emboosi buboosi choong'ene nicho echinaakobole mu bweyaango bw'amakesi neende amaani k'ohulwaana, kose? Bulaanu weesika naanu mweene, okera niwuunjeemera?

²¹Bona, bulaanu oli ohweesika Misiri, ekada ly'omudiiro lyafuniha hale elyo, elichia ohufumita sa buli muundu olyediiraho. Olwo nilwo lu omutuki wa Misiri lwaali eyiri buli muundu omweesika.”

²²Nae nimumuboolera muti, “Hweesika Omwaami Nasaae weefwe,” oyo haba siniye yi Hesekia amaliireho obweyaango buhunuufu bw'ohwiinamiramo Nasaae neende alutaari, n'aboolera Yuda neende Yerusalemu ati, “Eng'we munenamiraanga mu moni w'alutaari yino mu Yerusalemu”?

²³Bulaanu yicha, njia ohuhwoosanira neende omwaami waange, omutuki wa Asiria endi: njia ohuhuberesa efaraasi elifu chibiri, ewe hulwao noonyala ohunyoola abasaacha bachiirusa.

²⁴Ewe onaanyale otye kata sa ohulwaanisa omuhoongo wa bahalaabani b'omwaami waange ohiramo obudiidi, niweesika ebigaari bya Misiri neende abeerusi b'efaraasi basyo?

²⁵Obaasa oti haba simbeere neende Omwaami niinjicha ohuseeta abuundu ano ohubasihirisa? Omwaami mweene niye owamboolere ati, Chia oseete esyaalo sino osisihirise.

²⁶Ao mani Eliakimu omwaana wa Hilikia, neende Sebbina, neende Yoya, nibaboolera Rabbusake bati, “Huhusaba, lomalomeho naafwe abahalaabani bao mu Luaramaiki, olwohuba hulumanyire bulai muno, nae otalomalomaho naafwe mu Luibburania abaandu bali hu sida nibawulira.”

²⁷Nae Rabbusake yababoolera ati, “Mubaasa muti omwaami waange yaandumire ohulomaloma emboosi chino neende omwaami weeng'we alala neende eng'we mweeng'ene? Nae haba si yaandumire ohuboolera emboosi chino neende abasaacha baandi beehaale hu sida abo bosi, abanoole ohulya obunyaka bwaabwe bweene neende ohung'wa amaanyi kaabwe keene?”

²⁸Ao mani Rabbusake yeema mani yalaangira mu Luibburania muu kono ly'aakulu n'aboola ati, “Muwulire emboosi ch'omutuki muhunuufu, omutuki wa Asiria!

²⁹Omutuki abalabula n'aboola ati, Mutakanyaho Hesekia yaababachirisa, olwohuba haba saachia ohubawonia abatuse mu mahono kaange.

³⁰Mutakanyaho Hesekia yaakera mweesika Omwaami naababoolera ati, ‘Mubwadyeeri bweene, Omwaami achia ohutuwonia, haandi esiko sino haba sisichia hukwa mu bunyala bw'omutuki wa Asiria.’

³¹Mutatekeeresaho ebya Hesekia daawe; olwohuba omutuki wa Asiria aboola ati, ‘Muhole obwiicha naange, mani mutule mweyaaneyo yiindi; buli muundu hweeng'we achia ohulya hu misabbiibbu kyae kyeene, haandi buli muundu achia ohulya hu mituli kyae kyeene, haandi buli muundu achia ohung'wa amaachi akomu sulo yae yeene;

³²ohwoola lu ndaheeche mani mbayire mu syaalo siri koti esyeeng'we syeene, esyaalo sirimo engaano neende efiini, esyaalo sirimo emigaati neende endalo ch'emisabbiibbu, esyaalo sirimo emiseituuni neende obuuhi, mani mumenyemo mube abalamu muhaye ohufwa.’ Mani mutatekeeresaho ebya Hesekia naabakosa-kosa n'aboola ati, Omwaami achia ohutuwonia.

³³Aliwo nasaae w'esyaalo yesi owaliho n'anunuuleho esyaalo syae ohutula mu mahono k'omutuki wa Asiria?

³⁴Banasaae ba Hamati neende Aripaadi bali yeena? Banasaae ba Sefarifaimu, Hena neende Yifa bali yeena, baanunulaho Samaria, baandusaho mu mahono kaange?

³⁵Wiina hu banasaae bomu byaalo abanunulaho ebyaalo byaabwe ohutula mu mahono kaange, hu Omwaami anyale ohuununulaho Yerusalemu ohutula mu mahono kaange?”

³⁶Nae abaandu nibawuleera batyo, buwuleera sa chi, baahaya ohukobolahoomo kata emboosi ndala, olwohuba omutuki yali n'alagiire ati, “Haba simumukobolamo daawe!”

³⁷Mani Eliakimu omwaana wa Hilikia, owali omuliindi w'edooho, neende Sebbina omuwandiiki, neende Yoya omwaana wa Asafu, omubiihi w'ebyandiiko, nibachia eyiri Hesekia nibatanduule-tanduulemo engubo chaabwe, nibamuboolera emboosi cha Rabbusake.