Read saamia 2 Abatuki 19 Bible Online

2 Abatuki 19 - saamia bible

2 Abatuki 19

¹Omutuki Hesekia niyawulira emboosi echo, yataandula engubo chae hulw'engisa, yefwaala ebigunia, mani yaachia mu nyuumba y'Omwaami.

²Yatuma Eliakimu, owali omuliindi w'edooho, neende Sebbina omwaandiiki, neende abalaamisi bahuluundu, nibefwaalire ebigunia, ohuchia eyiri omunabbi Yisaaya omwaana wa Amosi.

³Mani nibaboolera Yisaaya bati, “Hesekia aboola ati, ‘Oludaalo luno, ludaalo lw'ohusaanda, lw'ohweyolobya, haandi lw'esoni; luli koti omuhasi olumwa engasi nae abula amaani k'ohusiindiha omwaana.

⁴Siinyala ohuba siti, Omwaami Nasaae wao awuliire emboosi cha Rabbusake, yi mwaami wae, omutuki wa Asiria atumire ohwiicha ohudyaabuhira Nasaae mulamu, haandi ohuchia ohwoolobya emboosi chi Omwaami Nasaae wao awuliire, sakira sabiraho abaandu badoong'ereo.’ ”

⁵Nae abahalaabani b'omutuki Hesekia nibeecha eyiri Yisaaya,

⁶Yisaaya naababoolera ati, “Muboolere omwaami weeng'we muti, ‘Omwaami aboola ati, Mutatya hulw'emboosi chi muwuliire, chi bahalaabani b'omutuki wa Asiria badyaabuhiire.

⁷Bona, njia ohumutaamo omwooyo, ohudaha ohuwulira sa emboosi ch'obubacha mani akoboleyo mu syaalo syae syeene; haandi njia ohukera yeeterwe mu syaalo syae syeene.’ ”

⁸Rebbusake niyakobola, yanyoola omutuki wa Asiria nalwanisa Libbina; olwohuba yali naawuliire ati omutuki yali naatulire Lakisi.

⁹Nae omutuki wa Asiria yawulira ebidiira hu Tiraka omutuki wa Etiopia biti, “Bone, nguyo yeechere ohuhulwanisa,” nae yemeeda sa ohutumira Hesekia emboosi n'aboola ati,

¹⁰“Muchie muboolere Hesekia omutuki wa Yuda muti: ‘Otakanya Nasaae wao yi weesika, yaahubacha n'ahusuubisa ati Yerusalemu haba sisichia hukwa mu mahono k'omutuki wa Asiria.

¹¹Bona, wamala ohuwulira bi batuki ba Asiria bahola ebyaalo byoosi, koti lu byasihirisirwa elalira. Nae mani niiwe onaawoneo?

¹²Banasaae b'ebyaalo ebyo baba babawoniaho, ebyaalo bi bakuuka yaange, Gosani, Harani, Resefu, neende abaandu b'Edeni abali mu Telasaari basihiriswa?

¹³Omutuki wa Hamati, omutuki wa Aripaadi, omutuki w'esiko sya Sefarifaimu, omutuki wa Hena, oba omutuki wa Yifa, bali yeena?’”

¹⁴Omutuki Hesekia yanyoola ebbarwa ohutula mu mahono ka bawamwaanda, yayisoma; mani Hesekia n'achia mu nyuumba y'Omwaami, n'ayibaambula, naayita mu moni w'Omwaami.

¹⁵Hesekia yasabira mu moni w'Omwaami, n'aboola ati, Ewe Omwaami Nasaae wa Yisiraeli, owihaale hu Kerubbimu, niiwe Nasaae weeng'ene, ewe weeng'ene niiwe otuka obwaami bwohu syaalo; niiwe owaloonga Ekulu neende esyaalo.

¹⁶Ewe Omwaami tekeeresa owulire, Ewe Omwaami, tingaala mani obone; haandi wulira emboosi cha Senakeribbu, chaatumire ohudyabuhira Nasaae mulamu.

¹⁷Syadyeeri, ewe Omwaami, abatuki ba Asiria basihiriise ebyaalo biingi muno, haandi bahola ebyaalo byaabwe byaaba koti ekuunda.

¹⁸Haandi basukuna banasaae baabwe mu muliro; olwohuba haba sibali banasaae badyeeri, nae ebyaloongwa-loongwa sa mu misaala neende amakina, haandi ebyaholwa sa neende amahono k'abaandu; sakira babinyaasa.

¹⁹Nae bulaanu ewe Omwaami Nasaae weefwe, huhwekweeda, tuwonie, ohutula mu mahono kae, hu obwaami bwohu syaalo bumanye buti ewe Omwaami, niiwe Nasaae mweene weeng'ene.

²⁰Yisaaya omwaana wa Amosi yatumira Hesekia emboosi n'aboola ati, Omwaami Nasaae wa Yisiraeli aboola ati, Ohusaba hwao ohudiira hu Senakeribbu omutuki wa Asiria, huwuliirwe.

²¹Yino niyo emboosi yi Omwaami alomalome eyimudiiraho: Esiko sya Siyooni Sihulekeeresa haandi sihubisamo emoni, ewe Senakeribbu; Esiko sya Yerusalemu sihuloondaho nisihubairaho sa.

²²Obaasa oti naanu mweene yodyabuuhire haandi waalekeresa? Naanu mweene yoohabuhiire haandi waamyuulira emoni otyo? Ngaandi oholeere sa ese Omwoolerefu Mweene wa Yisiraeli!

²³Otumire bawamwaanda bao ohudyabuhira Omwaami, haandi oboolere oti, “Ese ndehoonyera sa ebigaari byaange biingi mani ninyiingira engulu ndeeyi muno, ohwoolera elalira huu njakamo ya Lebbanooni; ndakwiisa emituumba kihiramo obuleeyi, emisaala kyacho ekihiramo obulai; ndeengirira elalira mu bituundu by'ohweekisamo, mu bichaha ebyasitirirwa elalira.

²⁴Mwayaba esulo nae mwaang'wa amaachi k'abateende, haandi amakulu k'abasikaari bao kaseenakira kaahamia Omwaalo Naili kwoomerera.”

²⁵Haba siwawuliraho oti ndatekeha hale muno ebyo byoosi? Ndatekeha mu ndaalo cha hale ebiindu biri ohukwaao buti, ndahuberesa obunyala ohukaluuhania ebiko bisitirire ohuba ebituuli by'ebikoha,

²⁶sakira abaandu bamwo, bawaamo amaani, baaba abati haandi abadangaafu, mani beehola koti emisaala mu siino, haandi koti obunyaasi bw'omuboka, koti obunyasi bwamera hu sirama sy'enyuumba; obuhooha nibutaaduuha.

²⁷Nae manyire nga wihalaanga aasi haandi nootula erwaanyi haandi niwiingira mukati, haandi manyire koti lu waasinyihira.

²⁸Olwohuba waasinyihira haandi malire ohuwulira koti lu wahudumbala, njia ohuta elobo lyaange mu moolu kao haandi njia ohuta esidiiri syaange muhanwa mwao, mani njia ohuhukoboserayo hu ngira yahuleeta.

²⁹Yisaaya yeemao yaaboolera omutuki Hesekia ati, hano niho ahachia ohuba ahalolero yooli: mu mwaaka kuno muchia ohulya ebyohulya bihula ebyeene, haandi mu mwaaka kuloondaho, muchia ohulya ebyohulya bimera ebyeene; mu mwaaka kwohudatu, muchia ohutaaka emere, mukese, haandi muchia ohutaaka emisabbiibbu, mani mulye ebyaamo byakyo.

³⁰Mani abadiidi bahawoneo, abomu nyuumba ya Yuda bahayiindire baaba koti emisaala kyayira emisi kyacho aasi mu loba, haandi ekyaamaho ebyaamo aakulu;

³¹olwohuba baliwo abachia ohuwona ohutula mu Yerusaleemu, neende abaandi ohutula hu lugulu Siyooni. Amaani k'Omwaami kachia ohubyooseresa.

³²Sakira Omwaami aboola ebidiira hu mutuki wa Asiria ati, Haba saachia hwiingira mu siko sino, noomba ohulasayo olusaale lwoosi, noomba ohusiseetaho neende engabo noomba ohutahoowo ebituuli by'eloba bisyebodohaanie.

³³Omwaami aboola ati, engira yamuleeta niyo eyahamukoboseyo, mani saachia hwiingira mu siko sino.

³⁴Olwohuba njia ohukayirira esiko sino, hulw'oluyaali lwaange omweene, neende hulw'oluyaali lwa Daudi omuhalaabani waange.

³⁵Mani mu siro esyo, malaika w'Omwaami yeecha yeeta mu kaambi ya Abasiria abasikaari elifu emia ndala neende amahumi kataanu-na-kadatu-na-chitaanu (185,000); nae abaandu nibasimuha mu chuli-chuli, bone, kino kyoosi kyali emilaambo.

³⁶Mani Senakeribbu, omutuki wa Asiria yatulao, yaachia engo, mani yaamenya Ninefe.

³⁷Nae niyali niyeenamira nasaae wae wa Nisiroki, abaana bae, Adurameleki neende Sareseeri bamwiita neende olugaanga, mani beeyiba beeruhira mu syaalo sya Araraati. Omwaana wae yi balaanga Esaradooni naamukobola mu makulu kae koti omutuki.