Read saamia 2 Abatuki 2 Bible Online

2 Abatuki 2 - saamia bible

2 Abatuki 2

¹Bulaanu Omwaami niyali ali aambi ohuyira Elija Muukulu n'achiira mu muyaka kweesifuusye, Elija neende Elisa bali hu lukeendo lwaabwe ohutula Giligaali.

²Mani Elija n'aboolera Elisa ati, “Hwekweeda, odoong'e ano. Olw'ohuba Omwaami yaandagiire ati njie Bbeteli.” Nae Elisa yamukobolamo ati, “Mubwadyeeri bweene, ndeechuba eyiri Omwaami mulamu neende eyiri ewe n'osisiiri omulamu endi, ese haba siinjia huhuleha kata nabudiidi.” Mani boombi bamala beehirira baachia Bbeteli.

³Mani omukaanda kw'abanabbi abali nibamenya Bbeteli nibeecha eyiri Elisa nibamuteeba bati, “Omanyireho koti Omwaami achia ohuhutusaho omwaami wao enyaanga yino?” Nae Elisa yabakobolamo ati, “Eee, manyire; mani mubuleere.”

⁴Mani Elija yaboolera Elisa ati, “Hwekweeda, odoong'e ano, olwohuba Omwaami yaahutiire njie Yeriko.” Nae Elisa yamukobolamo ati, Mubwadyeeri bweene, ndeechuba eyiri Omwaami mulamu neende eyiri ewe n'osisiiri omulamu endi, ese haba siinja huhuleha kata nabudiidi. Mani boombi bemeeda sa baachia Yeriko.

⁵Omukaanda kw'abanabbi abali nibamenya Yeriko beecha eyiri Elisa mani bamuteeba bati, “Omanyireho koti Omwaami achia ohuhutusaho omwaami wao enyaanga yino?” Nae Elisa yabakobolamo ati, “Eee, manyire; mani mubuleere.”

⁶Elija yaboolera Elisa ati, “Hwekweeda doong'a ano; olwohuba Omwaami yandagiire ati njie Yorodaani.” Nae Elisa yamukobolamo ati “Mubwadyeeri bweene, ndeechuba eyiri Nasaae mulamu neende eyiri ewe n'osisiiri omulamu endi haba siinjia ohuhuleha kata nabudiidi.” Mani boombi bemeedayo baachia mu moni.

⁷Omukaanda kw'abanabbi amahumi kataanu okwo kwosi kwabaloondaho baachia Yorodaani, bano beemaho eyale hooho, Elija neende Elisa nibeema hu Yorodaani.

⁸Elija mani niyefwaalula ekaanju lyae, n'alifuumba alala, nalyehoonyera ohuhuya hu maachi, amaachi nikakabuhanamo olwaande-n'olwaande, boombi baambuha omwaalo nibakeendera hu loba lyoomu.

⁹Nae nibaambuha, Elija yateeba Elisa ati, “Saba esiindu si mba huholere nisisiiri ohuhutuswaho.” Elisa yakobolamo ati, “Hwekweeda, leha nyoole omukabo kw'amaani kao amahabi kabiri.”

¹⁰Mani Elija naamuboolera ati, “Esiindu sy'osabire sidinyu nisyo; nae niwuumbona nihutuswaho, oba ochia ohusinyoola; nae notaambona, haba s'onasinyoola.”

¹¹Mani nibali nibasyemeeda ohukeenda haandi nibasiilomalomaanga, bone, esigaari sy'omuliro neende efaraasi ch'omuliro cheecha chaabakabulamo boombi. Elija yaayirwa Muukulu neende omuyaka kw'esifuusye.

¹²Elisa niyasibona yahuumula ati, “Laata, laata! ow'Amaani haandi omukayi wa Yisiraeli! Mbao oweereo!” Mani haba siyabonaho Elija ehabi liindi daawe. Elisa yabukula ebyefwaalo byae yaabitaandulamo ebituundu bibiri.

¹³Mani yaabukula ekaanju elyali nililakaahe ohutula hu Elija, yaakobolayo hu lwaasi ly'omwaalo kwa Yorodaani.

¹⁴Yabukula ekaanju lyali nilikwiire ohutula hu Elija, yaalihuyira hu maachi ako n'aboola ati, “Omwaami Nasaae wa Elija ali yeena?” Nae niyamala ohuhuya hu amaachi ako, kakabuhanamo amahabi kabiri, olwaande-n'olwaande; mani Elisa yaambuha yaachia engereha w'omwaalo.

¹⁵Bulaanu omukaanda kw'abanabbi amahumi kataanu abali nibali Yeriko bamubona mani baaboola bati, “Obunyala bwa Elija buli hu Elisa.” Beecha ohumwakaanira, baasigama mu moni wae.

¹⁶Bamuboolera bati, “Bulaanu bona, ano mbao aliwo abasaacha b'amaani amahumi kataanu, huhusaba, olehe bachie bakoonye omwaami wao; awuundi Mwooyo w'Omwaami amukiingire mani yaamuleha hu lugulu luundi oba mu hooho liindi.”

¹⁷Nae bemeeda sa ohumusaba ohwoola lu soni chamudiira, mani yaababoolera ati, “Batume.” Batuma abasaacha amahumi kataanu; baakoonyeresa Elija ohumala endaalo chidatu, baahaya ohumunyoola.

¹⁸Nibakobola eyiri Elisa, bamunyoola naabaliindiire mu Yeriko, mani yaabateeba ati, “Haba simbakaniiseho endi, mutachia daawe?”

¹⁹Bulaanu abasaacha baandi abomu siko sya Yeriko bachia eyiri Elisa baamuboolera bati, “Bona, esiko sino silai nisyo, koti lu mweene obona; nae amaachi kasyo mabi niko, haandi eloba lyasyo silimesa emere.”

²⁰Mani Elisa naababoolera ati, “Mute omuunyu mu bbakuli njaaha, mukundeetere.” Mani nibamuleetera ebbakuli yirimo omuunyu eyo.

²¹Elisa yeemao yaachia hu sulo y'amaachi ako yaasukunamo omuunyu, n'aboola ati, “Omwaami aboola ati, amaachi kano kabe amalai; ohutula buti. Amaachi kano haba sikanaatuleengemo oluumbe oba kaahaya ohumesa emere.”

²²Mani amaachi ako malai niko ohwoola buti, ohuchianakana neende emboosi chi Elisa yalomaloma.

²³Elisa yatula ao yaachia Bbeteli; nae niyali nasikeendaanga hu ngira, abaana baraaga baandi batula mu siko esyo baamunyohoolesa nibaboola bati, “Ewe omusaacha w'esyoole, chia era, tula ano ewe omusaacha w'esyoole ewe!”

²⁴Elisa yakaluuhana yatiingaala enyuma, nae niyababona, yababwaaba mu liita ly'Omwaami. Mani amaaka mahasi kabiri nikafuduha ohutula mu sichaha nichibosyoola abasyaani amahumi kane-na-babiri.

²⁵Elisa yatula ao yaachia hu lugulu lwa Karimeeli, mani luunyuma yaakobola Samaria.