Read saamia 2 Abatuki 20 Bible Online

2 Abatuki 20 - saamia bible

2 Abatuki 20

¹Mu ndaalo echo, omutuki Hesekia yalwaala muno yaaba aambi ohufwa. Omunabbi Yisaaya, omwaana w'Amosi yeecha yaali ohumubona, mani yaaboolera Hesekia ati, “Omwaami aboola ati, ‘Tereesa edaala lyao; olwohuba oli aambi ohufwa, haba soochia ohuwona.’ ”

²Hesekia niyawulira atyo, yakaluuhana yewuunja ena sida, mani yekweeda Omwaami, n'aboola ati,

³Ewe Omwaami, hwekweeda, bulaanu yichulisa koti mbeere ningeendera mu moni wao neende obweesikwa haandi neende omwooyo mulala, haandi koti lu ndahola ebiindu bilai mu moni wao. Mani Hesekia naalira muno neende esibeera.

⁴Yisaaya yatula ao yaachaaka olukeendo naawaao. Nae niyali naataabita akatikaati w'olwaanyi lw'edooho elyo, Emboosi y'Omwaami yamwiichira niyiboola yiti,

⁵“Kobolayo oboolere Hesekia omutuki w'abaandu baange oti, Omwaami, Nasaae wa kuukaao Daudi aboola ati, Mbuliire ohusaba hwao, haandi mbweene amasika kao; mani bona, njia ohuhuwonia. Hu nyaanga y'ahadatu ohutula nyaanga yino, ochia ohuchia mu nyuumba y'Omwaami yohwiinamiramo.

⁶Mani njia ohuhumeeda emyaaka kiindi ehumi-na-kitaanu hu bulamu bwao. Njia ohuhuwonia, ewe neende esiko sino ohutula mu bunyala bw'omutuki wa Asiria, haandi njia ohukayirira esiko sino hulw'oluyaali lwaange neende hulw'oluyaali lwa Daudi omuhalaabani waange.”

⁷Mani Yisaaya n'aboola ati, “Muleete ebyaamo by'enduli biswaake, mani mubite hu sifwiimba sya Hesekia, anyale ohuwona.”

⁸Hesekia yateeba Yisaaya ati, “Halolero siina ahaneekese hati Omwaami achia ohuumbonia, haandi hati njia ohuchia mu Nyuumba y'Omwaami hu nyaanga y'ahadatu ohutula nyaanga yino?”

⁹Yisaaya yaboola ati, “Hano niho ahalolero yooli ohutula eyiri Omwaami, mbwe Omwaami achia ohuhola ebiindu byasuubiise. Bulaanu odaha esiiniha sisude mu moni amakulu ehumi, noomba sisude enyuma amakulu ehumi?”

¹⁰Hesekia yakobolamo ati, “Syaangu muno esiiniha ohusuda mu moni amakulu ehumi; sakira leha sikaluhe enyuma amakulu ehumi.”

¹¹Omunabbi Yisaaya yasaba Omwaami, mani Omwaami yaakobosa esiiniha enyuma amakulu ehumi, olwohuba yi lyuuba lyali, esiiniha syali nisibitire enyuumba y'Ahasi neende amakulu ehumi.

¹²Mu siha syeene esyo, omutuki wa Bbabbilooni, Merodaki-bbaladaani, omwaana wa Bbaladani, yatuma bawamwaanda ohuyirira Hesekia Ebbarwa neende esiyaanwa; olwohuba yali nawuliire ati Hesekia mulwaae niye.

¹³Hesekia yaakaanira ababileeta, yabeekesa enyuumba y'esibiihiro yae yoosi, eyalimo efeesa, esaabbu, ebiindu by'esing'aari, amafuta k'engaanga, neendee ebilwaaniso byae. Hesekia yabeekesa buli siindu syali mu bibiihiro byae neende mu bwaami bwae.

¹⁴Omunabbi Yisaaya yeemao yeecha eyiri omutuki Hesekia, yaamuteeba ati, “Abasaacha bano bahuboolera siina? Haandi batulire yeena hu beecha yooli?” Hesekia yakobolamo ati, “Batulire mu syaalo sy'eyale, sya Bbabbilooni.”

¹⁵Haandi Yisaaya yamuteeba ati, “Babweene siina mu dooho lyao?” Hesekia yakobolamo ati, “Babweene buli siindu siri mu dooho lyaange; mbeekeese buli siindu siri mu bibiihiro byaange.”

¹⁶Yisaaya yaboolera Hesekia ati, “Sino nisyo si Omwaami w'Obunyala aboola:

¹⁷Bona, esiha sichia ohwoola, buli siindi siri mu dooho lyao, neende ebyo bi bakuukaao babiiha ohwoola buti, biyirwe mu Bbabbilooni, abulao esiindu sichia ohudoong'a.

¹⁸Haandi hu baana bao beene, abeebulanwa bao beene, bachia ohuyirwa; bahalaabanire mu dooho ly'omutuki wa Bbabbilooni koti abalooye.”

¹⁹Hesekia yaboolera Yisaaya ati, “Emboosi y'Omwaami y'olomalome ndai niyo” Olwohuba Hesekia yabaasa ati, “Silai omuleembe neende ohuhaya ohulwaana bibeeo mu ndaalo chaange.”

²⁰Mani ebiholwa bya Hesekia biindi, neende obunyala bwae, neende koti lu yayaba esidiba neende omutaro yaaleeta amaachi mu siko, byaandiikwa mu sitabo sya Ebyaliwo by'abatuki ba Yuda.

²¹Hesekia yeemao yaafwa, mani Manaase omwaana wae yaamukaluha mu makulu koti omutuki.