Read saamia 2 Abatuki 22 Bible Online

2 Abatuki 22 - saamia bible

2 Abatuki 22

¹Yosia yachaaka ohutuka Yuda naali neende emyaaka kitanu-na-kidatu eky'obuhuluundu yatuka emyaaka amahumi kadatu neende mulala naali mu Yerusalemu. Eliita lya ng'ina lyali Yedida, omuhaana wa Adaya ohutula Bbosikaati.

²Mani Yosia yahola ebiindu bilai mu moni w'Omwaami, n'aloondakana neende esaambo ndai cha Daudi kukaang'ene, n'adiira bulai amalako ka Nasaae.

³Mu mwaaka kw'ehumi neende hataanu-na-hadatu okw'obutuki Yosia, omutuki Yosia yatuma omwaandiiki w'esiina olwaangwa Safani, omwaana wa Asalia, haandi omwiichuhulu wa Mesulamu, ohuchia mu Nyuumba y'Omwaami naamulagira ati,

⁴“Chia eyiri Hilikia omulaamisi muhuluundu, omuboolere abale obuungi bw'eseende chileeterwe mu Nyuumba y'Omwaami, chi baliindi basoloose ohutula mu baandu.

⁵Mani leha bachiberese abasaacha bahulira omulimo kw'ohutereesa Enyuumba y'Omwaami; leha bachiberese abasaacha bali ohuhola omulimo kw'ohutereesa Enyuumba y'Omwaami. Leha batuunge

⁶ababaachi, aboombahi, neende ababaachi b'amakina, haandi bakule embaao neende amakina mabaache ohutereesera Enyuumba y'Omwaami.

⁷Nae sisihoyerwa ohubaliirira obuungi bw'eseende chi bababereese, olwohuba bahola omulimo neende obweesikwa.”

⁸Hilikia, omulaamisi muhuluundu yaboolera Safani omwaandiiki ati, “Nduhaane Esitabo sy'Amalako mu Nyuumba y'Omwaami.” Hilikia yaberesa Safani esitabo esyo, mani yaasisoma.

⁹Safani omwaandiiki yakobola eyiri omutuki, mani yeekesa omutuki oyo n'aboola ati, “Abahalaabani bao batusireyo eseende choosi chibaduhaane mu Nyuumba y'Omwaami, baachidiisa abasaacha bahulira omulimo kw'ohutereesa enyuumba y'Omwaami.”

¹⁰Mani Safani n'aboolera omutuki ati, “Hilikia omulaamisi yaambereese esitabo sira.” Safani yasisomera mu kono ly'aakulu mu moni w'omutuki.

¹¹Nae omutuki niyawulira emboosi chomu Sitabo sy'Amalako esyo, engisa yamudiira muno mani yaataandula ebyefwaalo byae.

¹²Mani omutuki oyo yaalagira omulaamisi Hilikia, neende Ahikamu omwaana wa Safani, neende Akibbori omwaana wa Mikaaya, neende Safani omwaandiiki, neende Asaiya omuhalaabani w'omutuki n'aboola ati,

¹³“Muchie, mweteebe eyiri Omwaami hulwaange, neende hulw'abaandu, neende hulw'abaandu boosi abomu Buyudaaya, ebiindu bidiira hu mboosi chomu sitabo si baduhaane sino; olwohuba etima ly'Omwaami liingi muno litusiingiriireho, olwohuba bakuuka yeefwe haba sibaloondakana neende emboosi chomu sitabo sino, ebyo ebyandiikwa biti hubihole.”

¹⁴Hilikia omulaamisi, neende Ahikamu, neende Akibbori, neende Safani, neende Asaia bachia eyiri Hulida omunabbi muhasi, omuhasi wa Saluumu omwaana wa Tikufa, haandi omwiichuhulu wa Hauhasi, omuliindi w'esibiihiro sy'ebyefwaalo (omuhasi oyo yali niyamenya mu Yerusalemu, mu situundu siyaaha); mani nibalomaloma nae hu mboosi eyo.

¹⁵Omuhasi oyo yababoolera ati, Omwaami Nasaae wa Yisiraeli aboola ati: Boolere omuundu obatumire yi ndi muti,

¹⁶Omwaami aboola ati, “Bona, njia ohukwiisa amasira abuundu ano, neende hu baandu baliwo, emboosi choosi echiri mu sitabo chi omutuki wa Yuda asomere.

¹⁷Olwohuba abaandu bano baandeebwaabire haandi baniooheseere banasaae baandi obubbaani, mani baasaangulusa etima lyaange neende ebiindu byoosi bi bahola neende amahono kaabwe, sakira etima lyaange lichia ohusaanguluhirira abuundu ano, haandi siacha ohuyenjeera daawe.”

¹⁸Nae ebidiira hu omutuki wa Yuda obatumire ohweteeba hu Omwaami, muchia ohumuboolera muti, Ese Omwaami Nasaae wa Yisiraeli mboola endi: ewe watekeeresa ebyo ebyali nibyandiikwa mu sitabo esyo.

¹⁹Mani weeyolobya haandi weeyisa aasi mu moni waange, notaandula engubo chao haandi noolira, niwawulira koti lu ndatiisa-tiisa ohusaandya Yerusalemu alala neende abaandu basyo boosi. Bulaanu njia ohuhola abuundu ao abe ow'amatiichasi, haandi abuundu yi baandu bachia ohwehoonyeraanga koti esibwaabo. Nae mbuliire ohusaba hwao

²⁰mani sakira, bona, njia ohuhuyira eyiri bakuukaao, osiihwe bulai, haandi soocha ohubonaho amasira ka ndahakwiise abuundu ano. Mani nibakobolayo, baboolera omutuki emboosi echo choosi.