Read saamia 2 Abatuki 23 Bible Online

2 Abatuki 23 - saamia bible

2 Abatuki 23

¹Omutuki Yosia yalaanga abeemirisi ba Yuda neende aba Yerusalemu boosi beebuusira yaali.

²Omutuki yachia mu Nyuumba y'Omwaami alala neende abaandu bamenya mu Yerusalemu boosi, neende abalaamisi neende abanabbi, neende abaandu baandi boosi, abahuluundu neende abayere. Mani naasoma nibawulira emboosi ch'esitabo sy'endagaano si baduuhana mu Nyuumba y'Omwaami.

³Omutuki yeema aambi neende esiiro mani yaahola endagaano mu moni w'Omwaami, ohumuwuliraanga neende ohudiiraanga amalako kae neende ebilagiro byae byoosi niyeechuba ati, anabidiiraanga neende omwooyo kwae kwoosi, neende obulamu bwae bwoosi, haandi ati anooseresaanga emboosi ch'endagaano eyo, echandiikwa mu sitabo esyo. Mani abaandu boosi nibasiingira nibeema ohwomiisa koti lu banaadiireenge endagaano eyo.

⁴Omutuki Yosia yalaka Hilikia omulaamisi muhuluundu, neende abalaamisi bamuloondereraho, neende abaliindi abali nibali hu mulimo kw'ohuliinda hu siruwa sy'Enyuumba y'Omwaami, ohutusa mu Nyuumba y'Omwaami ebiindu byoosi ebyehoonyerwaanga ohwiinamira Bbaali, neende nasaae muhasi olaangwa ati, Asera, neende ohwiinamira eng'ining'ini. Mani omutuki naabisaambira erwaanyi wa Yerusalemu, mu hooho lya Kidironi, ekohe lyaabyo nibaliyooya nibaliyira Bbeteli.

⁵Omutuki yamalao abalaamisi b'ebiloongaloongwe b'abatuki ba Yuda bali nibaawuulwe ohuniooheseraanga obubbaani mu bweyaango buhunuufu bu beenamiraangamo mu biko bya Yuda neende ebyali nibyebodoohaanie Yerusalemu. Abalaamisi boosi abaniooheseraanga obubbaani eyiri Bbaali, eyiri elyuuba, eyiri omwoosi, eyiri eng'ining'ini, neende ebiindu by'amaani byoosi ebiri muukulu, byosi babisaamba.

⁶Omutuki yatusa mu Nyuumba y'Omwaami esifwanaani sy'Asera, yaasiyira erwaanyi wa Yerusalemu, mu hooho lya Kidironi, mani yaasisaambira hu haalo ha Kidironi, yaasinyonyobola syeehola olufu, mani yaawaanya olufu olwo hu biriindwa bi basiihamo abaandu bataali neende oluyaali.

⁷Omutuki oyo haandi yafunakira elalira enyuumba chi basaacha bayiraniraangamo neende abasaacha baasyaabwe, echali mu Nyuumba y'Omwaami, haandi mu bahasi baluhiraanga ebisaatirwa hu nasaae muhasi olaangwa ati, Asera.

⁸Omutuki chana haandi yaleeta mu Yerusalemu abalaamisi boosi abali mu biko bya Yuda, mani yaanyaasa abuundu ahunuufu yi balaamisi baniooheseraanga obubbaani, ohutulira elalira Gebba ohwoola Bberisebba. Haandi yafunaka-funaka yaanyaasa alutaari chi beenamiraangamo echalichiingi aambi neende ebiruwa byohu mulyaango kw'esiruwa sya Yosua, gafana w'esiko, syali hu muhono muhasi omuundu niyeengira mu siko sya Yerusalemu.

⁹Nae kata katyo, abalaamisi bakafiiri abo haba sibafukiirirwaanga ohuchia hu alutaari y'Omwaami yali mu Yerusalemu ohumuhalaabanira, nae balichaanga emigaati kitaali emibbaahe ki baberesaanga abalaamisi baasyaabwe.

¹⁰Omutuki Yosia haandi yanyaasa Tofeti, esyali mu hooho ly'abaana ba Hinoomu, yaabulao omuundu yeesi owanyalaanga ohusaamba omwaana wae musyaani oba omuhaana koti esiyaanwa eyiri Moleki.

¹¹Haandi yatusao efaraasi chi batuki ba Yuda bali nibayaaniire ohwiinamira elyuuba, echali hu mulyaango kw'Enyuumba y'Omwaami, aambi neende esiruwa haandi ataali eyale neende esiseenge sya Natanimeleki omulade, mani n'asaamba ebigaari byae neende omuliro.

¹²Haandi alutaari chi batuki ba Yuda bali niboombaahe aakulu w'egorofa y'Ahabbu, neende alutaari chi Manaase yali niyoombaahe mu nyanyi chibiri echomu Nyuumba Nasaae, Yosia yachilikula mani yaachifunaka-funakamo mu bituundu-tuundu yaawaanya olufu lwacho mu haalo ha Kidironi.

¹³Omutuki Yosia yanyaasa ebituundu bihunuufu bibeenamiraangamo ebyali ebukwe wa Yerusalemu, olwaande lw'emwaalo woolugulu lulaangwa luti, “Olugulu Lwobulyaanga,” bi Solomooni omutuki wa Yisiraeli yali niyoombahiire Asutoreti, nasaae muhasi, esy'omusiro eyiri Abasidoni, neende esya Kemosi, esy'omusiro eyiri Abamoabbu, neende esya Moleki esy'omusiro eyiri Abaamooni.

¹⁴Omutuki Yosia yafunaka-funakamo esiiro mu bituundu-tuundu, haandi yaakwiisa aasi esifwaanani sya Aserimu, mani esitundu esyo nasichusamo amakuumba k'abafu.

¹⁵Omutuki Yosia yanyaasa ebyeembeho byali mu Bbeteli, bi Yerobboamu omwaana wa Nebati yali yoombaha, owakwiisa Abaisiraeli mu syonoono. Yosia yanyaasa ebyeembeho ebyo yaabikwiisa aasi mani yaaswaakaswaaka amakina kabyo mu bituundu-tuundu, yakanyoonyobola keehola olufu; haandi yaasaamba esifwaanani sya Asera.

¹⁶Nae Yosia niyakaluuhana ati, yabona ebiriindwa byali ao hu lugulu; mani yaalagira baabitusamo amakuumba, baakasaambira hu alutaari, nibichinyaasa, ohuchianakana neende Emboosi y'Omwaami, yi muundu w'Omwaami yayaala, yalaangirira ebyahakweeo.

¹⁷Omutuki yateeba ati, “Siriindwa sya wiina esyo si ndi ohubona?” Nae abasaacha bomu siko nibamuboolera bati, “Siriindwa sy'omuundu wa Nasaae watula mu Yuda mani yaalaangirira ebiindu by'oholere bino hu alutaari yino mu Bbeteli.”

¹⁸Omutuki Yosia yaboola ati, “Oyo, mumulehe; lehe abuleo omuundu yeesi owusiihula amakuumba kae.” Mani beemao baaleha ohusiihula amakuumba kae, alala neende amakuumba k'omunabbi watula Samaria.

¹⁹Mu buli siko sya Yisiraeli, omutuki Yosia yalikulalikulaangamo ebyeembeho byoosi ebyali nibyoombahwa neende abatuki ba Yisiraeli baandi, ba biholwa byaabwe byasaangulusaanga etima ly'Omwaami. Yahola esiholwa esyo esifwaanana neende si yahola hu byeembeho byali mu Bbeteli.

²⁰Yeetera abalaamisi bakafiiri abo boosi hu byeembeho ebyo, yi bahalaabaniraanga, naasaambira amakuumba kaabwe hu buli syeembeho. Niyamala atyo yeemao yaakobola mu Yerusalemu.

²¹Omutuki Yosia yeemao yaalaka abaandu boosi n'aboola ati, “Muholere Omwaami Nasaae weeng'we esidyaalo sya Paasaka, koti lu syaandiikwa mu sitabo sy'endagaano.”

²²Olwohuba esidyaalo sifwaana siti haba sisibechaangao hooho ohutulira elalira mu ndaalo ch'abatuki ba Yisiraeli, oba mu ndaalo ch'abatuki ba Yuda.

²³Nae mu mwaaka kw'ehumi neende hataanu-na-hadatu okw'omutuki Yosia, esidyaalo sino syeemao syaaholerwa Omwaami mu Yerusalemu.

²⁴Yosia haandi yatusa elako ohumalao abalakusi, abalosi neende banasaae bomu lwaanyi neende ebiloongaloongwe neende eby'omusiro byoosi ebyanyoolehanaanga mu syaalo sya Yuda neende mu Yerusalemu, hu anyale ohwomiisa emboosi ch'Amalako chali mu sitabo si omulaamisi Hilikia yaduuhana mu Nyuumba ya Nasaae.

²⁵Abulao hoo omutuki wuundi hu batuki bataangira ohubaao owali koti Yosia, owahalaabaniraanga Omwaami neende omwooyo kwae kwoosi, neende obulamu bwae bwoosi, neende amaani kae koosi, ohuloondakana neende amalako ka Musa koosi; haandi mu batuki bamuloondaho, abulao hoo owaliho koti Yosia.

²⁶Nae kata katyo, Omwaami haba siyaakama ohunyoolerera Yuda, ohweema hubi Manaase yahola n'asaangulusa etima ly'Omwaami, olwohuba ebiindu bi Manaase yahola byanyoolesa Omwaami muno.

²⁷Mani Omwaami n'aboola ati, “Njia ohumalao mu moni waange Yuda syosi, koti lu ndamalao Yisiraeli, haandi njia ohwebwaaba esiko sya Yerusalemu si mweene ndedoolera, haandi neende Enyuumba yi ndaboola endi, Omwo nimwo mu bachia ohunyinamiraanga nibeesa mu liita lyaange oluyaali.”

²⁸Bulaanu ebiholwa bya Yosia biindi, neende ebiindu byoosi bi yahola, byaandiikwa mu sitabo sya Ebyaliwo by'abatuki ba Yuda.

²⁹Mu biha byae, omutuki wa Misiri Neko, omutuki wa Misiri yeecha neende eye ohuhoonya omutuki wa Asiria hu mwaalo kwa Ewufuraate. Omutuki Yosia yachia ohumulwaania; mani omutuki wa Misiri Neko, omutuki wa Misiri naamwiitira Magido, mu biita.

³⁰Abahalaabani bae bamuta mu sigaari naamalire ohufwa, baamutusa Magido, baamuleeta Yerusalemu, baamusiiha mu ng'ani yae yeene. Mani abaandu bomu syaalo nibabukula Yehoahasi omwaana wa Yosia, nibamubaha amafuta, haandi nibamuhola omutuki ohukobola mu makulu ka laatang'ene.

³¹Yehoahasi yachaaka ohutuka Yuda naali neende emyaaka amahumi kabiri neende kidatu eky'obuhuluundu, mani yaatukira mu Yerusalemu ohumala embaka y'emyoosi kidatu. Eliita lya ng'ina lyali, Hamutaali omuhaana wa Yeremia ohutula mu Libbina.

³²Yehoahasi yahola ebiindu bibi muno mu moni w'Omwaami, ebichianakana neende bi bakuukaang'ene bahola.

³³Mani Neko, omutuki wa Misiri naamuboyera Ribbila mu syaalo sya Hamati, hwaahaye ohutukira mu Yerusalemu. Neko yaheengera esyaalo sy'Abayudaaya omusolo kw'efeesa ekiloguraamu elifu chidatu neende emia chidatu neende ekiloguraamu amahumi kadatu neende chine ech'esaabbu.

³⁴Neko omutuki wa Misiri, yahola Eliakimu, omwaana w'omutuki Yosia ohukobola mu makulu ka Yosia laatang'ene, mani naakaluuhania eliita lya Eliakimu n'amukuliha ati, Yehoyakimu. Nae Neko yayira Yehoahasi e Misiri, mani Yehoahasi yaafwiira eyo.

³⁵Yehoyakimu yaberesa omutuki wa Misiri Neko efeesa neende esaabbu, yaakereha hu baandu bomu syaalo esyo omusolo ohuchianakana neende amalako k'omutuki wa Misiri. Yehoyakimu yasolosa hu baandu bomu syaalo syae efeesa neende esaabbu, buli muudu namutooyia omusolo ohuchianakana neende bi bamukereehe, ohuchiberesa Neko, omutuki wa Misiri.

³⁶Yehoyakimu yachaaka ohutuka naali neende emyaaka amahumi kabiri neende kitaanu eky'obuhuluundu, mani naatukira mu Yerusalemu ohumala embaka y'emyaaka kitaanu-na-kibiri. Eliita lya ng'ina lyali Sebida omuhaana wa Pedaaya ohutula mu siko sya Ruma.

³⁷Yehoyakimu yahola ebiindu bibi muno mu moni w'Omwaami, ohuchianakana neende omukwoobo kw'abakuukang'ene.