Read saamia 2 Abatuki 24 Bible Online

2 Abatuki 24 - saamia bible

2 Abatuki 24

¹Mu ndaalo ch'obutuki bwa Yehoyakimu, Nebukadineesa omutuki wa Bbabbilooni yaseeta esyaalo sya Buyudaaya, mani Yehoyakimu niyeehola omuhalaabani wae ohumala embaka y'emyaaka kidatu; mani naamujeemera.

²Omwaami yeemao yaamutumira emikaanda ky'Abakalidaaya kidatu ohumulwaania, neende emikaanda ky'Abasiiria, neende emikaanda ky'Abamoabbu, neende emikaanda ky'Abaamooni, naakituma ohulwaania Yehoyakimu neende ohusihirisa Yuda, ohuchianakana neende emboosi ch'Omwaami chi bahalaabani bae, abanabbi balomaloma.

³Mubwadyeeri bweene, Omwaami mweene niye owakera sino syeeholeha hu baandu bomu Yuda, ohubatusa mu moni wae, hulw'ebyonoono bya Manaase, ohuchianakana neende ebiindu byoosi bi yahola,

⁴haandi neende amabaanga kabulaho omusaango ka yediisa; olwohuba yeechusa mu Yerusalemu amabaanga kabulaho omusaango, mani Omwaami haba siyamukwiiraho esisa.

⁵Bulaanu ebiholwa bya Yehoyakimu biindi, neende ebiindu biindi bi yahola byoosi byaandiikwa mu sitabo sya Ebyaliwo by'abatuki ba Yuda.

⁶Mani Yehoyakimu naafwa, naaba alala neende bakuukaang'ene. Yehoyakini omwaana wae naamukobola mu makulu koti omutuki.

⁷Omutuki wa Misiri haba siyatulaho mu syaalo syae ohwiicha ohuseeta, olwohuba omutuki wa Bbabbilooni yali n'ayaayire buli siindu syoosi esyali esy'omutuki wa Misiri, ohutulira elalira hu lwaaho lw'emukulu wa Misiri ohwoola hu mwaalo kwa Ewufuraate.

⁸Yehoyakini yachaaka ohutuka Yuda naali neende emyaaka ehumi neende kitaanu-na-kidatu eky'obuhuluundu, mani n'atukira mu Yerusalemu ohumala embaka y'emyoosi kidatu. Eliita lya ng'ina lyali Nehusuta, omuhaana wa Elinatani ohutula Yerusalemu.

⁹Mani Yehoyakini naahola ebiindu bibi mu moni w'Omwaami, ohuchianakana neende ebiindu bi laatang'ene yali naaholere.

¹⁰Mu biha ebyo, abahalaabani ba Nebukadineesa omutuki wa Bbabbilooni baseeta Yerusalemu, mani eye lyae nilisyeebodoohania.

¹¹Nebukadineesa, omutuki wa Bbabbilooni mweene yeengira mu siko, abahalaabani bae bali nibebodoohanie Yerusalemu;

¹²Yehoyakini omutuki wa Yuda, omweene alala neende ng'ina, neende abahalaabani bae, neende abaana bae basyaani, neende abahunuufu bomu dooho lyae, nibatulayo mani nibeyaanayo mu bunyala bw'omutuki wa Bbabbilooni. Omutuki wa Bbabbilooni naamuyira koti omuwaambe wae mu mwaaka kwa hataanu-na-hadatu okw'obutuki bwae.

¹³Mani Nebukadineesa nakiinga eby'obuyiinda byoosi ebyali mu Nyuumba y'Omwaami, neende eby'obuyiinda byali mu dooho ly'omutuki, mani naadonyola-donyolamo ebiindu by'esaabbu byoosi ebyali mu Nyuumba y'Omwaami, bi Solomooni omutuki wa Yisiraeli yali n'ateere mu Nyuumba y'Omwaami, koti lu Omwaami yali niyaboola hale.

¹⁴Nebukadineesa yayira abaandu bomu Yerusalemu boosi koti abawaambe, neende abaana basyaani boosi ab'abatuki, abasaacha bahunuufu ab'amaani boosi, abawaambe elifu ehumi, neende abaandu betaanyi boosi aba buli ngeri; abulao owadoong'ao, ohumalaho abamanani bomu syaalo esyo.

¹⁵Mani omutuki wa Bbabbilooni n'ayira Yehoyakini Bbabbilooni, alala neende ng'ina, neende abahasi bae, neende abeemeresi bae, neende abaami bomu syaalo omwo. Omutuki wa Bbabbilooni yabatusa mu Yerusalemu yaabayira Bbabbilooni koti abawaambe.

¹⁶Omutuki wa Bbabbilooni oyo yaleeta mu Bbabbilooni abasaacha b'amaani boosi. Alala boosi bali elifu chitaanu-na-chibiri (7,000), omuli abeemeresi ba buli ngeri neende abetaanyi elifu ndala (1,000), abaandu bano boosi ab'amaani haandi abanyala ohulwaana mu maye.

¹⁷Mani omutuki wa Bbabbilooni n'adoola Matania, laatang'ene Yehoyakini muyere, naamuhola omutuki mu bweyaango bwa Yehoyakini, mani Nebukadineesa naakaluuhania eliita lyae, n'amukuliha Sedekia.

¹⁸Sedekia yachaaka ohutuka naali neende emyaaka amahumi kabiri neende mulala eky'obuhuluundu, mani naatukira mu Yerusalemu ohumala embaka y'emyaaka ehumi neende mulala. Eliita lya ng'ina lyali Hamutaali omuhaana wa Yeremia ohutula Libbina.

¹⁹Omutuki Sedekia yonoona muno mu moni w'Omwaami, ohuchianakana neende byoosi bi Yehoyakimu yahola.

²⁰Sakira Omwaami yanyoolera muno, mani esiha syoola yeerusa abaandu bomu Yerusalemu neende abomu Buyudaaya ohutula mu moni wae. Sedekia nae yeemao yajeemera omutuki wa Bbabbilooni.