Read saamia 2 Abatuki 25 Bible Online

2 Abatuki 25 - saamia bible

2 Abatuki 25

¹Mu mwaaka kwa hataanu-na-hane okw'obutuki bwa Sedekia, mu mwoosi kw'ehumi, hu ludaalo lw'ehumi lw'omwoosi, Nebukadineesa omutuki wa Bbabbilooni, yeecha neende eye lyae lyoosi yaseeta Yerusalemu, yasyeebodoohania syoosi; yaasiyabaho obuko enyaande choosi ohusyebodoohania.

²Esiko esyo nisyebodoohanwa sa sityo ohwoola mu mwaaka kw'ehumi neende mulala okw'obutuki bwa Sedekia.

³Nae hu ludaalo lwa hataanu-na-hane, olw'omwoosi kwoohune, enjala embitiirifu yakwaao mu siko omwo, ebyohulya byaawa hu baandu bomu syaalo omwo.

⁴Abaandu badomola ebituli mu sida sy'esiko esyo. Mani omutuki alala neende abasikaari boosi nibeeruha nibeeyiba esiro nibabitira hu ngira y'esiruwa, akatikaati w'ebida bibiri, hu ndulo w'endalo y'omutuki, kata Abakalidaaya bali nibebodoohania esiko hu nyaande choosi, mani nibeeruha nibachoomere olwaande lw'ehooho lya Yorodaani.

⁵Nae eye ly'Abakalidaaya nilyoonga hu mutuki Sedekia, mani nibamwoolaho naali mu sipaapi sya Yeriko. Abasikaari bae boosi bamusalaanaho, mani nibamuleha yeeng'ene.

⁶Mani nibawaamba omutuki Sedekia, nibamuyira Ribbila eyiri omutuki wa Bbabbilooni, owamuheengera omusaango.

⁷Nibeetera abaana ba Sedekia abaana babiri mu moni wae naabona. Mani nibachomola emoni mu Sedekia, nibamuboya enyororo, nibamuyira Bbabbilooni.

⁸Mu mwoosi kwa hataanu, hu ludaalo lwa hataanu-na-habiri olw'omwoosi, mu mwaaka kw'ehumi neende kitaanu-na-kine okw'obutuki bw'omutuki Nebukadineesa, omutuki wa Bbabbilooni, Nebbusaradaani, omuhoongo muhuluundu w'abaliindi b'omutuki Nebukadineesa, haandi omuhalaabani wae, yeecha yeengira mu Yerusalemu.

⁹Yasaamba Enyuumba y'Omwaami, neende edooho ly'omutuki neende enyuumba choosi echomu Yerusalemu; buli nyuumba hoongo yoosi yasaambwa yaakwa aasi.

¹⁰Mani eye ly'Abakalidaaya, elyaali neende omuhuluundu w'abaliindi, nilirikula ebida byoosi, ohwebodoohania esiko sya Yerusalemu.

¹¹Abaandu baandi abali nibadoong'ere mu siko neende abo abali nibajeemere nibakwiire hu lwaande lw'omutuki wa Bbabbilooni, alala neende abaandu baandi boosi, Nebbusaradaani omuhuluundu w'abaliindi yabayira mu Bbabbilooni koti abakulwa.

¹²Mani omuhuluundu w'abaliindi naaleha mu Buyudaaya abaandu bahiramo obumanani, abo abataaliho neende esiindu syoosi, nibo ba baleha ohulimaanga neende ohuliindaanga endalo ch'emisabbiibbu.

¹³Abakalidaaya nibafunaka-funaka esiiro ky'emigasa ekyali mu Nyuumba y'Omwaami mu bituundu-tuundu, mani nibakiinga emigasa nibakiyira mu Bbabbilooni.

¹⁴Bakiinga neende endamu, neende ebitiiyo, neende ebiindu biyooya ekohe, neende ediisi ch'obubbaani neende buli siindu sy'emigasa sibali nibeehoonyeraanga mu Nyuumba y'Omwaami,

¹⁵neende ebifulya by'ohudeeheramo, neende ebbakuli. Ebiindu byaholwa mu saabbu, omuhuluundu w'abaliindi yabikiinga yaabiyira koti saabbu, haandi ebyaholwa mu feesa, yabiyira koti efeesa.

¹⁶Nae esiiro chibiri, okutaangi kuhoongo, neende ebiteeni, bi omutuki Solomooni yaholera Enyuumba y'Omwaami, emigasa kyamwo kyali emisito kitanyala ohupiimwa huu latiri.

¹⁷Obuleeyi bw'esiiro ndala bwali emiita amahumi kabiri neende chitaanu-na-chidatu, n'obaliiraho omutwe kw'emigasa; obuleeyi b'omutwe kw'emigasa kwali emiita ndala neende otutoonyese tudatu. Hu buli mutwe kwaliho emigasa byasaatwa bulai muno. Haandi esiiro ypohubiri yosi yaliho ebiindu nasilala bityo, neende ohusatwa nasilala hutyo.

¹⁸Nebbusaradaani yadiira Seraaya omulaamisi muhuluundu, neende Sefania omuloondereraho, neende abaliindi b'olwaanyi lw'Enyuumba y'Omwaami badatu.

¹⁹Nae mu siko omwo, yatusamo omweemeresi mulala owali niyeemerera basaacha b'amaye, neende abasaacha bataanu ab'oluhiiho lw'omutuki babanyoola mu siko omwo; neende omwaandiiki w'omuhuluundu w'amaye owandiikaanga abaandu mu ye ly'esyaalo; neende abasaacha amahumi kasaasaba abahunuufu b'esyaalo babanyoola mu siko omwo.

²⁰Nebbusaradaani, omuhuluundu w'abaliindi yabukula, yaayira Ribbila, eyiri omutuki wa Bbabbilooni.

²¹Omutuki wa Bbabbilooni oyo yahola baabatoocha, baabeetera mu Ribbila mu syaalo sya Hamaati. Mani Abayudaaya baayirwa batyo mu jeela, nibabatusa mu syaalo syaabwe.

²²Mani Nebukadineesa, omutuki wa Bbabbilooni, n'ataao Gedalia, omwaana wa Ahikamu, omwiichuhulu wa Safani gafana w'abaandu bali nibadoong'ere mu syaalo sya Buyudaaya.

²³Bulaanu abahoongo b'amaye k'Abayudaaya abateebwayo abali mu syaalo, neende abaandu baabwe nibawulira bati omutuki wa Bbabbilooni yali n'adoolere Gedalia ohuba gafana, beecha neende abaandu baabwe Misipa eyiri Gedalia. Abeecha nibo bano: Yisimaeli omwaana wa Netania, neende Yohanani omwaana wa Kareya, neende Seraya omwaana wa Tanuhumeti owa Netofa, neende Yasania omwaana w'omusaacha ohutula Maaka.

²⁴Mani Gedalia n'abechubira neende abasaacha baabwe n'ababoolera ati, “Mutatya abeemeresi b'Abakalidaaya; mudoong'e sa mu syaalo muno, mani muhalaabanire omutuki wa Bbabbilooni, mani buli siindu sinaabachiire bulai.”

²⁵Nae mu mwoosi kwa hataanu-na-habiri, Yisimaeli omwaana wa Netania, omwiichuhulu wa Elisama, ow'olwiibulo lw'abatuki, yachia Misipa neende abasaacha ehumi mani nibaseeta haandi nibeeta Gedalia alala neende Abayudaaya neende Abakalidaaya abali nae mu Misipa.

²⁶Mani abaandu boosi, abayere neende abahuluundu, neende abahuluundu b'amaye nibasiingira, nibachia Misiri; olwohuba bali nibatiire Abakalidaaya.

²⁷Mu mwaaka ku Efilimerodaki yeehasirwaho ohuba omutuki wa Bbabbilooni, yeekesa esisa eyiri Omutuki Yehoyakini owa Yuda mu humulehuula ohutula mu jeela. Sino syeeholehera hu ludaalo lw'amahumi kabiri-na-hataanu-na-habiri mu mwoosi kw'ehumi-na-kibiri okw'omwaaka kw'amahumi kadatu-na-kitaanu-na-kibiri luunyuma lwa Yehoyakini n'amalire ohubukulwa koti omuboye.

²⁸Efilimerodaki yayira Yehoyakini bulai muno, yaamuberesa oluyaali luungi muno ohuhiraho abatuki baandi abali nae mu Bbabbilooni.

²⁹Yehoyakini yeemao yeefwaalulamo ebyefwaalo byae by'ejeela. Mani ohutula hu ludaalo olwo, Yehoyakini yaliiraanga hu meesa y'omutuki obulamu bwae bwoosi.

³⁰Omutuki yalagira ati bamubecheenge omukabo kwa buli ludaalo, endaalo ch'obulamu bwae bwoosi.