Read saamia 2 Abatuki 3 Bible Online

2 Abatuki 3 - saamia bible

2 Abatuki 3

¹Mu mwaaka kw'ehumi neende kitaanu-na-kidatu, eky'obutuki bwa Yehosafati, omutuki wa Yuda, Yehoramu omwaana wa Ahabbu yeehaswa ohuba omutuki wa Yisiraeli mu Samaria, mani yaatuka ohumala emyaaka ehumi neende kibiri.

²Yahola ebiindu bibi mu moni w'Omwaami, nae haba siyaliho omubi koti laatang'ene neende Yesebbeeli, ng'ina; olwohuba yafunaka-funaka esiiro cha Bbaali chi laatang'ene yali niyombaahe.

³Kata katyo, Yehoramu yoomiirira hu syonoono sya Yerobboamu, omwaana wa Nebbati, mani yaakera Yisaraeli syonoona, haandi syaahayira sa mu bwonooni.

⁴Nae bulaanu, Mesa, omutuki wa Moabbu yali omutuki w'amakoondi; mani buli mwaaka yatuungaanga omutuki wa Yisiraeli amakoondi madoto elifu emia ndala (100,000) neende obwooya bw'amakoondi mamiiku akoola elifu emia ndala (100,000).

⁵Nae Ahabbu, omutuki wa Yisiraeli niyafwa, Mesa, omutuki wa Moabbu yajeemera omutuki wa Yisiraeli.

⁶Omutuki Yehoramu yatula Samaria yahung'aanisira eye lyae mu Yisiraeli mwoosi.

⁷Yatumira Yehosafati, omutuki wa Yuda emboosi n'aboola ati, “Omutuki wa Moabbu yaanjemeere; ochia ohwiicha alala naange humulwaanie?” Mani Yehosafati yaakobolamo ati, “Njia ohwiicha alala nawe; olwohuba ese naawe huli esiindu silala, abaandu baange nabao nibo, haandi efaraasi chaange nechao nichio.”

⁸Yamuteeba ati, “Hunaabitire hu ngira siina nihumuseeta?” Yehoramu yakobolamo ati, “Hu ngira yomu sichiimi sy'Edomu.”

⁹Omutuki wa Yisiraeli yachia neende omutuki wa Yuda alala neende omutuki wa Edomu. Nae nibamala endaalo chitaanu-na-chibiri nibahuumba nibebodoohania, amaachi kabawaaho; mani ab'amaye neende ebisolo bi bali nabyo byaahaywa esyohung'wa.

¹⁰Mani omutuki wa Yisiraeli yahuumula ati, “Wuuwi! Omwaami abuusire alala abatuki badatu bano, ohubadiisa mu mahono ka Moabbu.”

¹¹Mani Yehosafati n'ateeba ati, “Ano abulao hoo omunabbi w'Omwaami yi hunyala ohubitiraho hweteeba hu Omwaami?” Mani mulala hu bahalaabani b'omutuki wa Yisiraeli n'akobolamo ati, “Elisa, omwaana wa Safati ali ano, oyo owali omuhalaabani wa Elija.”

¹²Yehosafati yaboola ati, “Oyo ali neende Emboosi y'Omwaami.” Mani omutuki wa Yisiraeli neende Yehosafati alala neende omutuki wa Moabbu nibachia eyiri Elisa.

¹³Elisa yabateeba ati, “Ndi neende endagaano siina naang'we? Bakuuka eyiri abanabbi ba balaata yeeng'we neende aba bang'ineeng'we mani mubeteebeho.” Nae omutuki wa Yisiraeli yamukobolamo ati, “Haba”, Omwaami niye olaangire abatuki badatu bano ohubata mu mahono ka Moabbu.

¹⁴Nae Elisa yakobolamo n'aboola ati, “Mubwadyeeri bweene, Omwaami w'amaye haandi omulamu, oyo yi halaabanira, mba niteesa oluyaali mu Yehosafati, omutuki wa Yuda, sindahahudeebereho, oba ndaahubonaho.

¹⁵Nae bulaanu, ndeetereho omuhubbi w'obuhana.” Mani omuhubbi w'obuhana niyahubba, amaani k'Omwaami keeha hu Elisa.

¹⁶Mani yaaboola ati, “Omwaami aboola ati, ‘Njia ohuhola ehooho lyoomu lino liichulemo esulo ch'amaachi.’

¹⁷Olwohuba Omwaami aboola ati, Haba simuchia ohubonaho omuyaka oba efula, nae ehooho elyo lichia ohwiichulamo amaachi, mani munyale ohung'wa, eng'we, neende eng'oombe cheeng'we neende ebyaayo byeeng'we.”

¹⁸Mani sino siindu syaangu muno mu moni w'Omwaami; haandi achia ohudiisa Abamoabbu mu mahono keeng'we,

¹⁹mani muchia ohuwaamba ebiko byasitwaho olukaka byoosi. Muchia ohutema emisaala kyaabwe ky'ebyaamo kyoosi, haandi mwiikale esulo chaabwe choosi, mani musihirise endalo chaabwe ndai nimuchiichusamo amakina.

²⁰Nae nibwahya echuli, mu biha by'ohuyaaniramo ebiyaanwa, amaachi kachaaka ohuhulukusa nikatulira olwaande lw'Edomu, ohwoola lu syaalo syoosi syeechulamo amaachi.

²¹Nae Abamoabbu nibawulira bati abatuki badatu bali nibeechere ohubalwaania, abaandu boosi abali nibanyala ohukiinga ebilwaaniso, ohuchaakira elalira hu muyere ohiramo ohwoola hu muhuluundu ohiramo, bebuusa alala baachia beema hu lwaaho.

²²Nae nibwahya echuli mu mabwiibwi, esulwe yahosa hu maachi, mani Abamoabbu baabona amaachi kali engereha nikaahaanye nikafwaana koti amabaanga.

²³Mani nibaboola bati, “Mubwadyeeri bweene, abatuki bahuyaane, mani beetana. Mani lehe huchie huyaaye ekaambi yaabwe.”

²⁴Nae niboola hu kaambi y'Abaisiraeli, Abaisiraeli basiingira baaseeta Abamoabbu babayiingira; baboongaho manu baabeeta.

²⁵Abaisiraeli basihirisa ebiko byaabwe, mani buli muundu yaasukuna amakina mu ndalo chaabwe ohwoola lu cheechuliramo amakina. Beekala buli sulo y'amaachi, haandi baatema buli musaala mulai. Amakina kong'eene niko akadoong'a mu Kirihareseeti, mani ab'esimulo nibasyebodoohania nibasiwaamba.

²⁶Nae omutuki wa Moabbu niyabona ati bali ohumuyiingira, yabukula abasaacha emia chitaanu-na-chibiri (700) abalwaanira engaanga, babalwaanie ohwoola lu boolera hu mutuki w'Edomu; nae haba sibanyala daawe.

²⁷Yeemao bulaanu yaabukula omwaana wae muhuluundu, owali owohumukobola mu makulu k'obutuki, yaamuyaanayo koti esiyaanwa sisaambe hu sida sy'esiko esyo. Abaisiraeli banyoolera muno; mani baakamira ao ohulwaana, baakobolayo mu syaalo syaabwe syeene.