Read saamia 2 Abatuki 5 Bible Online

2 Abatuki 5 - saamia bible

2 Abatuki 5

¹Namani, omuhoongo w'eye ly'omutuki wa Siria, yali omusaacha w'oluyaali, haandi owaheerwa muno neende omwaami wae, olwohuba Namani oyo, Omwaami yakera eye lya Siria lyaanyiingira. Namani yali omusaacha w'amaani muno, nae yali omulwaae w'ebigeenge.

²Bulaanu Abasiria mu huyaaya hwaabwe huundi, bali nibawaambire omuhaana muraaga ohutula mu syaalo sya Yisiraeli, oweehola omuhalaabani wa muha Namani.

³Omuhaana oyo yaboolera omuhuluundu wae ati, “Omwaami waange aba n'achiaho eyiri omunabbi oli mu Samaria! Yahamuwoniisye ebigeenge byae.”

⁴Mani Namani naachia eyiri omwaami wae niyamuboolera ati, “Omuhaana owayaambwa mu syaalo sya Yisiraeli aboolere ati.”

⁵Mani omutuki wa Siria n'aboola ati, “Chia bulaanu buti, njia ohutuma ebbarwa eyiri omutuki wa Yisiraeli.” Mani Namani naachia n'akiingire ebituundu by'efeesa elifu amahumi kadatu, (30,000) ebituundu by'esaabbu elifu chisaasaba, (6,000) neende engubo ch'ohwekaluuhania endai cheene ehumi.

⁶Mani naayirira ebbarwa eyo omutuki wa Yisiraeli, eyisoma yiti, “Ebbarwa yino niyihwoolera, manya oti ndumire yooli Namani omuhalaabani waange, anyale ohuwoniswa ebigeenge byae.”

⁷Nae omutuki wa Yisiraeli niyayisoma, yataandula engubo chae mani yaboola ati, “Obaasa oti ese ndi Nasaae, owiita haandi yaaberesa obulamu, hu musaacha wuno yaandumire emboosi yohuwonia wuno ebigeenge byae? Muchwichwiise mubone muti bino sibindeetera obusoolo daawe.”

⁸Nae Elisa, omuundu wa Nasaae niyawulira ati omutuki wa Yisiraeli atanduule engubo chae, yatumira omutuki wa Yisiraeli n'aboola ati, “Lwasiina otanduule engubo chao? Leha bulaanu yeeche yiindi, anyale ohumanya koti mu Yisiraeli mulimo omunabbi.”

⁹Namani niyeecha neende efaraasi chae neende ebigaari, niyeema hu mulyaangiro kw'enyuumba ya Elisa.

¹⁰Mani Elisa naatuma wamwaanda eyiri Namani niyamuboolera ati, “Chia weyoke amahabi kataanu-na-kabiri mu mwaalo kwa Yorodaani, oba ochia ohuwonera elalira obulwaae bwao bw'ebigeenge.”

¹¹Namani yanyoolera muno, yeeweerao n'aboola ati, “Bone, ese mbeere mbaasa sa endi anaatuleo yeeme yiindi, mani asabe Omwaami Nasaae wae, mani ababaase omuhono kwae aali ebigeenge, yaamonie.

¹²Emyaalo ky'Abbana neende Faripaari kya Damasiko, haba sikirimo amaachi maangi ohuhira ekya Yisiraeli kyoosi? Haba sindahanyalire ohweyoka omwo, mani ndaalabiswa?” Mani yakaluuhana yeeweero naali neende etima liingi.

¹³Nae abahalaabani bae basuda aambi nae nibamuboolera bati, “Laata yaange, omunabbi aba n'ahulagiire ohuhola esiindu sidinyu, haba siwahasiholere? Lwasiina haba siweyoka koti lu ahuboolere, mani walabiswa?”

¹⁴Namani yachia yeeyiniha amahabi kataanu-na-kabiri mu mwaalo kwa Yorodaani, ohuchianakana neende emboosi chi muundu wa Nasaae yamuboolera; yawonera elalira, omubiri kwae kwaanyirira kwaadotaadota kwaaba koti okw'omwaana mudoto.

¹⁵Namani yakobolayo eyiri omuundu wa Nasaae, alala neende omukaanda kw'abaandu boosi ba yali nabo, mani beema mu moni wae, yaboola ati, “Bona, bulaanu manyire endi abulao Nasaae yeesi hu syaalo syoosi, ohutusaho mu Yisiraeli; bulaanu fukiirira esiyaanwa si muhalaabani wao ahuleteere.”

¹⁶Nae Elisa yamukolamo ati, “Mubwadyeeri bweene, koti lu Omwaami yi halaabaniraanga ali omulamu, abulao esiindu kata silala siinjia ohuhutusaho.” Nae Namani yamwekweeda ati afukiirire, nae Elisa yaahayira elalira.

¹⁷Mani Namani n'aboola ati, n'ohayire, hwekweeda, leha omuhalaabani wae ayire eloba li suhiri chibiri chinyala ohukiinga ndiyire eweefwe; olwohuba omuhalaabani wao haandi saacha ohuyaana ebiyaanwa bisaambwa, oba ohuyaaniraho nasaae wuundi ohutusaho Omwaami.

¹⁸Mu ngeri yino, Omwaami anaandeheremo ese omuhalaabani wao: omwaami waange, omutuki wa Siria, naanachicheenge mu sabo lya Rimoni ohwiinamira eyo, naanandegeeng'engeho, mani nyinama mu sabo lya Rimoni, Omwaami aleheremo omuhalaabani wao mu ngeri yino.

¹⁹Elisa yeemao yaamuboolera ati, “Chia neende muleembe.” Nae Namani ni yahawaao sa ati, niyahakeendaho olukeendo ludiidi sa,

²⁰Gehaasi, omuhalaabani wa Elisa, omuundu wa Nasaae yaboola ati, “Bona, omwaami waange koti lwaalehere Namani Omusiiria yawaao n'atamutusireho ebiindu bi yali n'aleetere, kata silala. Mubwadyeeri, koti lu Omwaami ali omulamu, njia ohwiiruha muloondeho mbeeho neende siimutusaho.”

²¹Mani Gehaasi n'aloonda hu Namani. Nae Namani niyabona omuundu niyeeruha naamuloondaho, yeeha hu sigaari yamwaakaanira, yamuteeba ati, “Aluwo obudinyu bwoosi kose?”

²²Nae Gehaasi yakobolamo ati, “Abulao obudinyu bwoosi, ohutusaho omwaami waange yahaanduma huboolere endi, ‘Ebiha bino, abaraaga babiri ohutula mu mukaanda kw'abanabbi, bali bahoola ohutula mu syaalo sy'engulu sya Efuraimu. Hwekweeda obaberese etalaata ndala y'efeesa, neende ebifuruusi bibiri eby'engubo choohu sidyaalo.’ ”

²³Nae Namani yaboola ati, “Nookanya fukiirira oyire etalaata chibiri.” Mani naamwekweeda, nibamuboere etalaata ch'efeesa mu magunia kabiri, neende ebifuruusi bibiri eby'engubo choohu sidyaalo, baabidiisa abahalaabani bae babiri, baabikiinga baaloonda hu Gehaasi.

²⁴Nae niboola hu sigulu yi Elisa yali, Gehaasi yabatusaho ebiindu ebyo, yaabibiiha mu nyuumba, mani yaseebula abahalaabani ba Namani bawaao.

²⁵Gehaasi niyeengira mu nyuumba, Elisa yamuteeba ati, “Gehaasi, otula yeena?” Nae yakomubolamo ati, “Abulao abuundu yoosi yi muhalaabani wao achiireho.”

²⁶Nae Elisa yamuteeba ati, “Obaasa oti simbeere naawe mu mwooyo, koti lu musaacha oyo yeehere hu sigaari syae yaahubukaanira? Buno nibwo obweyaango bw'ohunyooleramo eseende neende ebyefwaalo, neende endalo ch'emiseituuni neende ech'emisaabbiibbu, neende amakoondi neende eng'oombe, neende abahalaabani basaacha neende abahalaabani bahasi?

²⁷Mani sakira ebigeenge bya Namani bichia ohuhudiira, haandi binabecheenge hu beechuhulu bao endaalo choosi.” Gehaasi yatula eyiri Elisa naali omugeenge, omubiri kwae nikubburuuhire koti ekohe.