Read saamia 2 Abatuki 7 Bible Online

2 Abatuki 7 - saamia bible

2 Abatuki 7

¹Nae Elisa yakobolamo ati, “Tekeeresa Emboosi y'Omwaami; Omwaami aboola ati: ‘Muchuli ebiha koti bino, ekiloguraamu chidatu ech'obusye buchuunge chinakulwa esituundu sy'efeesa silala, haandi ekiloguraamu chisaasaba ech'amabere masuungu nabyo binaba nibikuswa esituundu esy'efeesa silala, hu siruwa sya Samaria.’ ”

²Mani omuhoongo w'eye yi mutuki yeesika n'aboolera omuundu wa Nasaae oyo ati, “Kata Omwaami mweene niyeekulao Ekulu, esiindu koti sino haba sisinyalihana?” Nae Elisa yamuboolera ati, “Omweene ochia ohweeboneraho neende emoni chao, nae haba soocha ohubilyaaho.”

³Bulaanu waliwo abasaacha bane abebigeenge hu siruwa, mani baboolerana bati, “Lwasiina hwiihala ano ohwoola lu hwahafwe?

⁴Nihuboola huti, ‘Lehe hwiingire mu siko,’ enjala nayo yirimo, mani huba huchia ohufwiira eyo; nae nihwiihala ano, lwoosi huchia ohufwa-bufwa. Mani bulaanu mwiiche, lehe huchie mu kaambi ya Abasiria. Niwiichuhana baatuleha nihuli abalamu, hu hunaabe abalamu, nae nibatwiita, huba hunaafwe.”

⁵Mani nibasiingira mu mabwiibwi nibachia mu kaambi ya Abasiria, nae bone, haba siyali hoomo omuundu yeesi.

⁶Olwohuba Omwaami yali naakerere eye ly'Abasiiria niliwuliire amakono k'ebigaari, neende ak'efaraasi, neende ak'eye ly'amaani, mani nibaboolaniire bati, “Bone, omutuki wa Yisiraeli apangiise abatuki b'Abahiiti neende abatuki b'Abamisiri ohwiicha ohutulwaania.”

⁷Mani nibeeruha mu mabwiibwi, nibaleha amayeema kaabwe, efaraasi chaabwe, neende esuhiri chaabwe, haandi nibaleha ekaambi yaabwe koti lu yiri, mani nibeeruha ohuwonia obulamu bwaabwe.

⁸Nae abageenge bano niboola hu ndulo w'ekaambi, beengira mu yeema, baalya haandi baang'wa, mani baayaaya efeesa neende esaabbu neende engubo, baachia baabikisa. Mani nibakobola haandi nibeengira mu yeema liindi, nibayaayamo ebiindu, haandi nibachia babikisa.

⁹Mani abageenge abo nibaboolanira bati, “Esiindu si huli ohuhola sino haba sisilai nisyo. Enyaanga yino ludaalo lw'emboosi ndai; nae nihuwuleera ohwoola lu bunaahyeere, mumanye muti huba huchia ohusaandisibwa; sakira mwiiche, lehe huchie huboolere abomu nyuumba y'omutuki.”

¹⁰Beemao baakaluha baalaanga abaliindi b'esiko, baababoolera bati, “Hwiichire hweengira mu kaambi ly'Abasiiria, nae bone, haba sihubweenehoomo oba kata ohuwuliraho ekono ly'omuundu kata mulala. Sibulao sihubweenehoomo ohutusaho efaraasi neende esuhiri chiboyerwe, neende amayeema kaleherwe ao koti lu kali.”

¹¹Abaliindi b'esiko abo balaangirira esiilango esyo, basioosa mu nyuumba y'omutuki.

¹²Obwiire bwali busisiiri ohuhya, mani omutuki naasimuha, naaboolera abahalaabani bae ati, “Njia ohubaboolera esiindu si Abasiria beetekeehe ohutuhola. Bamanyire bati enjala yituluma; sakira batulire mu kaambi yaabwe ohweekisa mu sipaapi, nibabaasa bati, ‘Abaisiraeli nibatula mu siko, huchia ohubawaamba nibali abalamu mani hwiingire mu siko’ ”

¹³Nae mulala hu bahalaabani bae yaboola ati, “Lehe abasaacha baandi babukule efaraasi chitaanu hu chidoong'ereo mu siko echo. Nibamala batyo, banaabe esiindu silala neende Abaisiraeli badoong'ereo abamala ohusihirira. Lehe hubatume mani hubone.”

¹⁴Mani nibaleeta ebigaari bibiri ebihweehweeswa neende efaraasi, omutuki naabatuma ohuloonda hu eye lya Abasiria, n'aboola ati, “Bakuuka mani mubone.”

¹⁵Abasaacha abo babaloondaho ohwoolera elalira hu mwaalo kwa Yorodaani; mani bone, engira choosi chali nichiichuuleho engubo neende ebiindu bi Abasiria bali nibasukuuneenge nibeeruha. Mani bawamwaanda nibakobola, nibaboolera omutuki.

¹⁶Abaandu ba Samaria bachia baayaaya ekaambi y'Abasiiria. Mani koti lu Omwaami yali n'aboolere, ekiloguraamu chidatu ech'obusye buchuungirwe bwaakulwa esituundu sy'efeesa silala, haandi ekiloguraamu chisaasaba ch'amabere masuungu, byakulwa esituundu silala sy'efeesa.

¹⁷Bulaanu omutuki yali naadoolere omuhoongo w'eye yi yeesika muno ohuliinda esiruwa; mani abaandu nibamuseenakirira mu siruwa, naafwa, koti lu muundu wa Nasaae yali n'aboolere omutuki niyeechere ohumubona.

¹⁸Olwohuba esiindu si omuundu wa Nasaae yali n'abooleere omutuki ati, “Ebiha koti bino muchuli, mu siruwa sya Samaria, ekiloguraamu chisaasaba ech'amabere masuungu bichia ohuba nibikulwa esituundu sy'efeesa silala, haandi esikono sy'obusye buchuunge silala sichia ohuba nisikulwa esituundu sy'efeesa silala.”

¹⁹Mani omuhoongo w'eye naakobola mu muundu wa Nasaae ati, “Kata sa Omwaami niyeekulao ekulu, esiindu siri sityo haba sisyahanyalihana” Mani n'aboola ati, “Ochia ohusibona omweene neende emoni chao, nae haba soochia ohusilyaaho daawe.”

²⁰Mani esyo nisimukwaaho, olwohuba abaandu bamuseenakirira mu siruwa paka yaafwa.