Read saamia 2 Abatuki 8 Bible Online

2 Abatuki 8 - saamia bible

2 Abatuki 8

¹Bulaanu Elisa yali naabooleere omuhasi yi yali niyalamusa omwaana wae musyaani ati, “Siingira, oweeo neende abomu daala lyao, muchie mweemenyereho abuundu waandi; olwohuba Omwaami achia ohusiindiha enjala yibe hu syaalo sino ohumala emyaaka kitaanu-na-kibiri.”

²Omuhasi oyo yasiingira, yaahola ohuchianakana neende emboosi y'omuundu wa Nasaae; yaachia neende abomu daala lyae, mani yaamenya mu syaalo sy'Abafilisiti ohumala emyaaka kitaanu-na-kibiri.

³Nae emyaaka kitaanu-na-kibiri nikyawa omuhasi oyo yatula mu syaalo sy'Abafilisiti, yaakobola mu syaalo sya Yisiraeli. Mani yaachia eyiri omutuki ohumusaba bamukobosere enyuumba yae neende eloba lyae.

⁴Omuhasi oyo yanyoola omutuki naalomalomaanga neende Gehaasi, omuhalaabani wa Elisa omuundu wa Nasaae, n'aboolaanga ati, “Husaba, mboolereho ebiindu bihunuufu bi Elisa yahola.”

⁵Nae niyali naasibooleraanga omutuki koti lu Elisa yalamusa omuundu mufu, bone, omuhasi yi mwaana wae musyaani yalamuswa oyo yasaba omutuki ati amukobosere enyuumba yae neende eloba lyae. Mani Gehaasi n'aboola ati, “Ewe omutuki, omwaami waange, omuhasi chana yi mwaana wae musyaani yalamuswa ngaandi nguno ano haandi wuno niye omwaana wae musyaani yi Elisa yalamusa.”

⁶Nae omutuki niyateeba omuhasi oyo koti lu byali, omuhasi oyo yamuboolera ebiindu byoosi. Mani omutuki naamulaangira omuhunuufu mulala, niyamuboolera ati, “Kobosera omuhasi wuno ebiindu byae byoosi, alala neende ohweema hu bukusi bwebyaamo byomu ndalo chae choosi ohutula hu ludaalo lu yalehera eloba lyae ohwoola buti.”

⁷Bulaanu Elisa yeemao yeecha mu Damasiko. Bbenihadadi, omutuki wa Siria yali naalwaalire; mani nibamuboolera bati, “Omuundu wa Nasaae nguno yeechere ali ano.”

⁸Omutuki yaboolera Hasaeli ati, “Yira esiyaanwa ochie obukaanane neende omuundu wa Nasaae, mani weteebe hu Omwaami noomubitiramo, oti, ‘Njia ohuwona obulwaae buno kose?’ ”

⁹Hasaeli yachia yaamubukaanira, yaamuyirira esiyaanwa, neende ebiindu bilai byoosi ohutula mu syaalo sa Damasiko, ebikiingiirwe hu ngamia. Nae niyoola eyiri Elisa, yemanyisa n'aboola ati, “Omwaana wao Bbenihadadi omutuki wa Siria yaandumire yooli, n'ateeba ati, ‘Njia ohuwona obulwaae buno kose?’ ”

¹⁰Elisa yamukobolamo ati, “Chia omuboolere oti, ‘Mubwadyeeri bweene ochia ohuwona obulwaae bwao’; nae Omwaami yaanjekeese ati achia ohufwa.”

¹¹Elisa yamwoomiisiraho emoni, ohwoola lu soni chamudiirira. Mani Elisa omuundu wa Nasaae naatuunduha ohulira.

¹²Nae Hasaeli yamuteeba ati, “Lwasiina omwaami waange alira?” Nae Elisa naakobolamo ati, “Olwohuba manyire esyonoono syoochia ohuhola Abaisiraeli; ochia ohusaamba ebiko byaabwe by'amaani, haandi ochia ohwiita abasaacha baraaga baabwe neende engaanga, haandi osasakule abaana bayere baabwe, nae abahasi baabwe bali asito, ochia ohubaboosyoolaangaamo.”

¹³Nae Hasaeli yateeba ati, “Ese omuhalaabani wao, otaaliho neende obunyala bwoosi, oli sa koti embwa, nyala endye ohuhola esiindu sy'amaani koti esyo?” Nae Elisa yakobolamo ati, “Omwaami yanjekeese ati, ewe ochia ohuba omutuki wa Siria.”

¹⁴Mani Hasaeli niyeemao naatula eyiri Elisa, naachia eyiri omwaami wae, owamuteeba ati, “Elisa ahubooleereho siina?” Nae yakobolamo ati, “Elisa yamboleere ati, ochia ohuwona obulwaae obwo.”

¹⁵Nae nibwahya, Hasaeli yabukula esyebwiiho syae yasiiniha mu maachi, mani nasimufuunihaho mu bweeni, ohwoola lu mutuki lu yafwiira. Mani Hasaeli naakobola mu makulu ka Bbenihadadi koti omutuki wa Siria.

¹⁶Mu mwaaka kwohutaanu, Yoramu omwaana w'Ahabbu naali omutuki wa Yisiraeli, nae Yehosafati naali omutuki wa Yuda, mu biha ebyo nibyo bi Yoramu omwaana wa Yehosafati, yeehasirwamo ohuba omutuki wa Yuda.

¹⁷Yehoramu yachaaka ohutuka Yuda naali neende emyaaka amahumi kadatu na chibiri eky'obuhuluundu, mani yaatukira mu Yerusalemu ohumala emyaaka kitaanu-na-kidatu.

¹⁸Yoramu yeemao yaaloondakana neende ebiima bibi by'abatuki ba Yisiraeli, koti lu nyuumba ya Ahabbu yahola, olwohuba Yoramu yali niyadeehya omuhaana w'Ahabbu. Yoramu yonoona muno mu moni w'Omwaami.

¹⁹Kata katyo, Omwaami haba siyasihirisa Yuda, hulwa Daudi omuhalaabani wae, yi yasuubisa ohuberesa obutuki alala neende ebeechuhulu bae endaalo choosi.

²⁰Mu ndaalo cha Yoramu, Abaedomu bajeemera obutuki bwa Yuda, beteerao abeene omutuki waabwe.

²¹Yoramu yachia neende ebigaari byae byoosi mu Sairi. Nae mu siro yasiingira alala neende abeemeresi b'amaye ohulwaania Abaedomu abali nibamwebodoohaanie, yaabayiingira; mani abasikaari bae nibeeruha, buli muundu naakobolayo engo wae.

²²Mani Edomu niyijeemera Buyudaaya ohwoola buti. Haandi mu biha byeene ebyo, esiko sya Libbina syosi nisijeema.

²³Bulaanu ebiholwa bya Yehoramu bidoong'ere, neende ebiindu byoosi bi yahola, byaandiikwa mu sitabo sya Ebyaliwo by'abatuki ba Yuda

²⁴Yoramu yeemao yaafwa mani baamusiiha alala neende bakuukaang'ene mu siko sya Daudi; mani Ahasia omwaana wae naamukobola mu makulu koti omutuki wa Yuda.

²⁵Mu mwaaka kw'ehumi-na-habiri okw'obutuki bwa Yoramu omwaana wa Ahabbu, omutuki wa Yisiraeli, nimwo mu Ahasia omwaana wa Yehoramu, omutuki wa Yuda yeehasirwamo ohuba omutuki.

²⁶Ahasia yeehaswa ohuba omutuki naali neende emyaaka amahumi kabiri-na-kibiri, mani yaatukira mu Yerusalemu embaka y'omwaaka mulala. Ng'ina Ahasia yali Atalia, omwiichuhulu wa Omuri omutuki wa Yisiraeli.

²⁷Ahasia yesi yaloondakana neende ebiima byomu nyuumba ya ahabbu, mani yonoona mu moni w'Omwaami muno, koti lu nyuumba ya Ahabbu yahola; olwohuba yali niyadeehya omuhaana ohutula mu daala ly'Ahabbu.

²⁸Omutuki Ahasia yachia neende Yoramu omwaana wa Ahabbu ohulwaania Hasaeli omutuki wa Siria Ramotigileedi, yi Abasiria banyayaalira Yoramu.

²⁹Omutuki Yoramu yakobola mu Yesireeli ohulerwa ebikoonjo bi Abasiria bamunyaalira mu Rama, naalwania Hasaeli omutuki wa Siria. Mani Ahasia omwaana wa Yehoramu omutuki wa Yuda niyeehirira ohuchia ohubona Ahabbu mu Yesireeli, olwohuba yali omulwae.