Read saamia 2 Abatuki 9 Bible Online

2 Abatuki 9 - saamia bible

2 Abatuki 9

¹Elisa yalaanga mulala hu b'omukaanda kw'abanabbi yaamuboolera ati, “Weetekehe obukule echupa y'amafuta yino, ochie Ramoti-Gileadi.

²Nae niwolayo, koonya Yehu omwaana wa Yehosafati, omwiichuhulu wa Nimusi. Mani wiingire mu nyuumba yi alimo omutuse eyiri abaasye, omwiingise mu sisenge syomuukati.

³Obukule echupa y'amafuta, okachuhe hu mutwe kwae, mani oboole oti, ‘Omwaami aboolere ati, huchuheho amafuta obe omutuki wa Yisiraeli.’ Mani wiikuleo olwiiki wiiruhe, otulemo bwaangu oweewo.”

⁴Mani omunabbi muraaga n'achia Ramoti-Gileadi.

⁵Nae niyolayo, bone, abahuluundu b'eye bali nibali muluhiiho; mani n'aboola ati, “Ewe omuhuluundu, ndumirwe yooli.” Yehu n'ateeba ati, “Eyiri wiina mweene hweefwe fweesi?” Mani n'akobolamo ati, “Eyiri ewe, ewe omuhuluundu.”

⁶Mani naamala n'asiingira, nibeengira mu nyuumba; omunabbi muraaga naachuha amafuta hu mutwe kwa Yehu, naamuboolera ati, “Omwaami Nasaae wa Yisiraeli aboola ati, ese hubaha amafuta obe omutuki w'abaandu b'Omwaami, Abaisiraeli.

⁷Mani ochia ohwiita abomu nyuumba y'omwaami wao Ahabbu, mani onyale ohwetuungira hu Yesebbeeli amabaanga k'abanabbi abahalaabani baange, neende amabaanga k'abahalaabani b'Omwaami boosi.

⁸Olwohuba enyuumba ya Ahabbu yoosi yichia ohusihirira. Njia ohwiita malirane mu Yisiraeli buli mwaana musyaani omuyere neende omuhuluundu ohutula mulwiibulo lw'Ahabbu.

⁹Njia ohuhola enyuumba y'Ahabbu yibe koti enyuumba ya Yerobboamu omwaana wa Nebbati, haandi koti enyuumba ya Bbasani omwaana w'Ahija.

¹⁰Abulao omuundu ochia ohusiiha Yesebbeeli, olwohuba embwa chichia ohuliira omulaambo kwae mu situundu sya Yesireeli.” Mani niyeekulao olwiiki, niyeeruha, n'atulamo.

¹¹Nae Yehu niyakobolayo eyiri abahalaabani b'omwaami wae, bamuteeba bati, “Oli bulai kose? Omusaacha wesiyiingwa wuno abeere ahudahaho siina syeene?” Nae Yehu yabakobolamo ati, “Mwesi mumanyire sa omusaacha oyo neende emboosi chae.”

¹²Nabo bamukobolamo bati, “Esyo haba si syadyeeri daawe; ewe omweene tubolere sa.” Mani Yehu n'aboola ati, “Yamboolere mbwe, haandi alomaloome naange n'aboola ati, ‘Omwaami aboola ati, hubahire amafuta obe omutuki wa Yisiraeli.’ ”

¹³Mani muhubbibbiirihana, buli muundu yefwaalulamo ekaanju lyae, niyaala aasi ati Yehu akaseeneho, nibobba eturumbete nibaboola bati, “Yehu niye omutuki.”

¹⁴Yehu omwaana wa Yehosafati, omwiichuhulu wa Nimusi yalya mu Yoramu olukwe. (Bulaanu Yoramu neende Abaisiraeli boosi bali nibaliindire esiko sya Ramoti-Gileadi sihaye ohukwa mu mahono ka Hasaeli omutuki wa Siria.

¹⁵Nae omutuki Yoramu yali n'akoboole mu Yesireeli ohulerwa ebikoonjo bi Abasiria bamutaaho naalwania Hasaeli omutuki wa Siria.) Yehu yeemao yaaboola ati, “Sino nisiri esibaaso syeeng'we, omuundu yeesi atatulaho mu siko yaachia yabooberaho abaandu bomu Yesireeli ebiindu bino.”

¹⁶Mani Yehu n'aniina esigaari syae, naachia Yesireeli, olwohuba Yoramu yali naalwaalira eyo. Ahasia, omutuki wa Yuda yali naachiireyo, naakeniiye Yoramu.

¹⁷Bulaanu omuliindi wali niyeemere hu munara mu Yesireeli, yabonera Yehu neende omukaanda kw'abaandu bae eyale nibeecha, yaaboola ati, “Mbona omukaanda kw'abaandu nikwiicha,” Mani Yoramu n'aboola ati, “Tuma omuundu achiire hu faraasi, achie abaakaanire, mani abateebe ati, ‘Mwiichire hulw'omuleembe kose?’ ”

¹⁸Mani wamwaanda yi batuma naaniina hu faraasi ohuchia ohubabukaananira, abateebe ati, “Omutuki ateeba ati, ‘Mwiichire hulw'omuleembe kose?’ ” Mani Yehu n'ateeba ati, “Eby'omuleembe bihudiiraho bitye? Kaluhana mani wiiruse efaraasi niwunoondaho.” Mani omuliindi naakobosa emboosi n'aboola ati, “Wamwaanda aboolereho, nae asisiiri ohukobola.”

¹⁹Mani naatuma wamwaanda wohubiri ohuchia neende efaraasi, owabolaho, mani n'aboola ati. “Omutuki ateeba ati, ‘Mwiichire hulw'omuleembe kose?’ ” Mani Yehu naakobolamo n'amuteeba ati, “Eby'omuleembe bihudiiraho bitye? Kaluuhana mani wiiruse efaraasi niwunoondaho.”

²⁰Haandi omuliindi naakobosa emboosi n'aboola ati, “Wamwaanda aboolereho, nae haba saali ohukobola. Nae engeri yibali ohwiirusiramo efaraasi yiri koti eya Yehu omwaana wa Nimusi; olwohuba yeerusa bubi muno.”

²¹Yoramu yaboola ati, “Mweetekehe.” Mani nibatekeha esigaari syae. Mani Yoramu omutuki wa Yisiraeli neende Ahasia omutuki wa Yuda nibachaaka olukeendo, buli muundu naali mu sigaari syae, nibachia ohubukaanana neende Yehu, mani nibamunyoola mu ndalo yali eya Nabboti Omuyesireeli.

²²Nae Yoramu niyabona Yehu, yamuteeba ati, “Yehu, wiichire hulw'omuleembe kose?” Yehu yamukobolamo ati, “Muleembe siina ku hwahaba nakwo, ohwiinamira ebitaali Nasaae neende eloko lya maakoo Yesebbeeli nibisiichuule mu syaalo muno?”

²³Mani Yoramu n'akaluuhana naatikuha, naaboolera Ahasia ati, “Wasyaange Ahasia, ano aliwo oluhobo!”

²⁴Mani Yehu nahweesa oluyiingo lwae neende amaani kae koosi, naalasa Yoramu ahasaale nihamufumita akatikaati w'amabeka, mani olusaale nilumufumita mu mwooyo kwae, Yoramu naakwa mu sigaari syae.

²⁵Mani Yehu n'aboolera Bbidikaari omulwaani wae ati, “Mukiinge mani omusukune mu ndalo ya Nabboti Omuyesireeli; olwohuba yichulisa koti lu ese naawe hubeere nihwiirusira alala efaraasi nihuloonda Ahabbu laatang'ene, koti lu Omwaami yalomaloma emboosi chino echibwaaba Ahabbu chiti:

²⁶Mubwadyeeri bweene, Omwaami aboola ati: koti lu ndaabweene ekulo amabaanga ka Nabboti neende ak'abaana bae, njia ohuhusaandisira abuundu bweene ano. Mani sakira, mukiinge omusukune mu ndalo ya Nabboti, ohuchianakana neende Emboosi y'Omwaami yi aboolere.”

²⁷Ahasia omutuki wa Yuda niyabona sino, yeeruha n'achiira olwaande lwa Bbetihagani. Yehu yamwoongaho, yaaboolera abasaacha bae ati, “Oyo yesi mumulase”; mani nibamulasa naali mu sigaari syae n'aniina Guuri, esiri aambi neende Yibbuleyamu. Yeeruhira Magido, yaafwiira eyo.

²⁸Abahalaabani bae bamukiingira mu sigaari bamuyira Yerusalemu, mani bamusiiha abuundu yi basiiha bakuukaang'ene mu siko sya Daudi.

²⁹Nae mu mwaaka k'ehumi-na-mulala okw'obutuki bwa Yoramu omwaana wa Ahabbu, omutuki wa Yisiraeli, Ahasia yachaaka ohutuka Yuda.

³⁰Nae Yehu niyoola Yesireeli, Yesebbeeli yasiwulira; yeetona mu moni wae, haandi yetereesa efwiiri, mani yatingaala erwaanyi niyeemere mu dirisa.

³¹Nae Yehu niyali niyeengira mu siruwa, Yesebbeeli yamuteeba ati, “Wiichire hulw'omuleembe kose, ewe Omusimuri, omwiiti w'omwaami wao?”

³²Nae Yehu niyasiingisa emoni aakulu natiingaalire ali edirisa, yateeba ati, “Wiina oli hu lwaande lwaange? Wiina mweene?” Abalade babiri oba badatu mani nibamutingaala.

³³Mani Yehu naababoolera ati, “Mumusukune aasi.” Mani bamusukuna aasi; amabaanga kae kaandi kaanyuhira hu sida neende hu faraasi, efaraasi neende ebigaari nibiseenakira omulaambo kwae mu makulu.

³⁴Mani Yehu niyeengira mu dooho, yalya haandi yaang'wa; n'aboola ati, “Mubone muti musiiha omuhasi mubwaabe wuno; olwohuba muhaana w'omutuki niye.”

³⁵Nae nibasimuha, sibulao esiindu sibanyoola, ohumalaho esyaanganga, neende amakulu neende ebyaaba by'amahono kae.

³⁶Nae nibakobola mani baamuboolera, Yehu yababoolera bati, “Yino mboosi y'Omwaami yi yalomalomera mu muhalaabani wae Elija Omutisibiti, Mu situundu sya Yesireeli ati, embwa chichia ohulya omulaambo kwa Yesebbeeli.

³⁷Omulaambo kwa Yesebbeeli kuchia ohuba koti amasiingo mu ndalo yomu situundu sya Yesireeli, abuleo omuundu oteeba ati, ‘Wuno niye Yesebbeeli kose?’ ”