Read saamia 1 Ebyomubiha 14 Bible Online

1 Ebyomubiha 14 - saamia bible

1 Ebyomubiha 14

¹Hiramu omutuki wa Tiiro yatuma omukaanda kw'abachurusi eyiri Daudi; yamuba emiguulo ky'emiseengese neende aboombahi b'amakina alala neende ababaachi b'embaao bamwoombahire edooho.

²Daudi mani naamanya ati, Omwaami yali naamuholere ohuba omutuki wa Yisiraeli, haandi naamanya ati obwaami bwae bwali bukinisibwa muno olwohuba abaandu bae ba Yisiraeli.

³Daudi yadyeehya abahasi baangi mu Yerusalemu, niyeebula abaana baangi, abasyaani neende abahaana.

⁴Kano niko ameeta k'abaana bayeebula naali Yerusalemu: Samua, Sobbabbu, Natani, Solomooni,

⁵Yibbihaari, Elisua, Elipeleti,

⁶Noga, Nefegi, Yafia,

⁷Elisama, Bbeliada, neende Elifeleti.

⁸Abafilisiti nibawulira bati Daudi yali bulaanu amalire ohwiihaswa ohuba omutuki w'esyaalo sya Yisiraeli syoosi, amaye k'Abafilisiti koosi kaachia ohuteemaho ohukiiya Daudi. Nae Daudi niyasiwulira, yatula ohuchia ohubalwaania.

⁹Bulaanu Abafilisiti bali niboolere mu Hooho lya Refaimu nibaliyaayire.

¹⁰Daudi yateeba hu Nasaae ati, “Hoyeere ohuseeta Abafilisiti kose? Ochia ohuhoonya mbayiingire kose?” Omwaami yakobolamo ati, “Eee, chia obaseete! Ese njia ohuhuhoonya obayiingire!”

¹¹Daudi yabaseeta nibali mu Bbaali Perasiimu mani naabayiingira boosi. Daudi yaboola ati, “Nasaae niye owundehoonyeere mani naafunaka-funaka abasuku baange koti amaachi k'ofwomboole.” Mani sakira abuundu ao alaangwa Bbaali Perasiimu.

¹²Abafilisiti nibeeruha, nibaleha ao ebiloongaloongwe bya banasaae baabwe. Daudi yatusa esilagiro ati ebiloongaloongwe ebyo byoosi bisaambwe.

¹³Abafilisiti haandi nibakobola mu hooho elyo, nibaliyaaya ehabi liindi.

¹⁴Daudi haandi niyeteeba hu Nasaae ehabi liindi. Nasaae yamuboolera ati, “Otabaseetera ao haandi. Kaluhana obebodoohanie mani wetekehe ohubaseeta n'otulira hu lwaande luundi lula, aambi neende emisaala kya Bbalisaamu.

¹⁵Mani n'owulira ekono ly'ohuhuumba nilitulira aakulu w'emisaala, ao ochia ohuseeta, olwohuba nilwo lu syeesi ndaba ni ndi ohuhuumba nihwiimiriire ohuchia ohuyiingira eye ly'Abafilisiti.”

¹⁶Daudi yahola koti lu Nasaae yali n'alagiire, mani niyeerusa Abafilisiti nibakobolerao enyuma ohutula Gibbeoni ohwoola Geseri.

¹⁷Ao mani efuma ya Daudi niyisalaana ohwoola buli abuundu, haandi Omwaami naahola buli syaalo syoosi ohutya Daudi.