Read saamia 1 Ebyomubiha 17 Bible Online

1 Ebyomubiha 17 - saamia bible

1 Ebyomubiha 17

¹Omutuki Daudi yali bulaanu amenyere mu dooho lyae. Ludaalo luundi, omutuki Daudi yaboolera omunabbi Natani ati, “Bona, ese mbano menyere mu nyuumba yoombahwa neende emiseengese, nae Esanduuku ly'Endagaano y'Omwaami liriri sa mu yeema!”

²Natani yamukobolamo ati, “Ewe hola esyo esiri mu bibaaso byao, olwohuba Nasaae ali naawe.”

³Nae esiro syeene esyo, Nasaae yaboolera Natani ati,

⁴“Chia oboolere Daudi omuhalaabani waange oti, ndi ohumuboolera endi, ‘Ewe haba siniiwe ohoyere ohunyoombahira enyuumba yohumenyamo daawe.

⁵Ohutulira elalira mu biha bi ndanunuliramo abaandu ba Yisiraeli ohutula mu Misiri ohwoola bulaanu buti, haba simbechaangaho nindamenya mu nyuumba yoosi daawe. Ndamenya sa mu mayeema, haandi ninjikanaanga ohutula abuundu alala ohuchia abuundu waandi.

⁶Mani mu ngeendo chaange echio choosi ni ndi alala neende abaandu ba Yisiraeli haba simbechaangaho nindasabaho omuundu yeesi mu beemirisi ba ndadoola esifune syeene esyakera nibahaya ohuunyoombahiraho enyuumba eyaholwa mu miseengese.’

⁷“Mani chia oboolere Daudi omuhalaabani waange oti, Omwaami w'Obunyala bwoosi ali ohumuboolera ati, ‘Ese ndahutusa mu hwayaanga amakoondi mu mikuunda, mani ndaahuhola waaba omutuki w'abaandu baange Abaisiraeli.

⁸Ese ndamenya nimbechaanga naawe buli yi wachichaanga yoosi, haandi nihuyiingirira abasuku bao boosi abali nibahuyiingania. Ese haandi njia ohuhuhola eliita lyao limanyihane muno haandi obe omwiimirisi muhunuufu muno mu syaalo syoosi.

⁹Njia ohutekehera abaandu baange Abaisiraeli obweyaango, haandi njia ohubataaka, banyale ohumenyaanga mu bweyaango bwaabwe abeene, haandi bahaye ohusaandisibwa ehabi liindi; mani abasaacha b'amawuruta bahaye ohubeyeenderesa koti hale,

¹⁰ohutulira elalira ebiha bi ndadooleramo abakayi ohutuka abaandu baange Abaisiraeli. Njia ohusihirisaanga abasuku bao boosi. Haandi njia ohwiingiya olwiibulo lwao.

¹¹Endaalo chao nichahaweeo mani wafwa, mulala hu beechuhulu bao, ndahamuteeo abe omutuki, haandi ndahomiise obwaami bwae bube obw'amaani muno.

¹²Oyo niye ochia ohunyoombahira enyuumba, haandi njia ohwomiisa obutuki bwae bubeeo endaalo choosi pe.

¹³ Njia ohuba laatang'ene, nae achia ohuba omwaana waange. Sindahalehe ohumuhoonya koti lu ndaleha ohuhoonya Saulo, yi ndatusa hu butuki hu onyale ohuba omutuki.

¹⁴Njia ohumutaao ohuliinda abaandu baange neende obwaami bwaange endaalo choosi pe. Obutuki bwae haba sibuchia ohwaakama daawe.’ ”

¹⁵Mani Natani naachia naaboolera Daudi buli siindu syoosi si Nasaae yali n'amubwiihuliireo.

¹⁶Bulaanu Omutuki Daudi mani yaachia yeengira mu Yeema ly'Ohubaao hw'Omwaami, niyeehala aasi, n'aboola ati, “Omwaami Nasaae, ese neende abomu nyuumba yaange, haba sihuhoyera ebyo byoosi bi waaholera.

¹⁷Haandi esyo syosi sidiidi mu moni wao, Ewe Nasaae. Olomaloome neende ebidiira hulwiibulo lwaange ese omuhalaabani wao, koti lu bahabe mu mwaaka kyahabeeo, haandi ewe Omwaami Nasaae, ohuuhola ohuba koti omuundu muhunuufu muno.

¹⁸Mani haandi siina syeene si ese nyala ndaahuboolera! Ewe waamanya muno, nae kata katyo osiinjisamo oluyaali, ese omuhalaabani wao.

¹⁹Ewe Omwaami, wuholeere ebiindu bihunuufu bino byoosi, olw'ohudaha hwao hweene, haandi n'onjekesa ebiindu bihunuufu bino byoosi.

²⁰Omwaami, abulao oyo yeesi oli koti ewe; haandi sihuwuliraangaho huti yiluwo Nasaae wuundi ohutusaho Ewe weeng'ene.

²¹Sibulao esyaalo siindi syoosi hu syaalo huno esiri koti Yisiraeli, si Ewe omweene wanunula ohuba abaandu bao weeng'ene. Ebiindu bihunuufu, alala neende ebiwuukisa biingi bi wabaholera nibyo ebyasalaania ohumanyihana hwao hwoola mu esyaalo syoosi pe. Ewe wanunula abaandu bao wabatusa mu Misiri. Weerusa ebyaalo biindi, abaandu bao nibeekulirwao.

²²Ewe wahola Abaisiraeli ohuba abaandu bao weeng'ene endaalo choosi pe, haandi ewe Omwaami, weehola ohuba Nasaae waabwe.

²³“Mani bulaanu, Ewe Omwaami, yoseresaanga endaalo choosi esyo sy'osuubisa, ese omuhalaabani wao alala neende abeechuhulu baange, mani ohole koti lu oboolere.

²⁴Ohumanyihana hwao huba huchia ohuba ohubitiirifu muno, haandi abaandu baba bachia ohuboolaanga endaalo choosi bati, ‘Omwaami w'Obunyala bwoosi niye Nasaae wa Yisiraeli.’ Mani ewe oba ochia ohuliinda obutuki bwaange endaalo choosi pe.

²⁵Ewe Nasaae waange, ese omuhalaabani wao ngumire ohusaba endyo mu moni wao, olwohuba wuumbwiihuliire, ese omuhalaabani wao, oti ochia ohuhola abeechuhulu baange babecheenge abatuki.

²⁶Bulaanu Ewe, Omwaami, niiwe Nasaae, haandi niiwe osuubiise omuhalaabani wao ebiindu bilai ebyo.

²⁷Ese husaba oberese abeechuhulu baange ehabi hu banyale ohwemeeda ohwiicha mu moni wao endaalo choosi. Ewe Omwaami, omalire ohubaberesa ehabi, mani ehabi yao yichia ohubabaaho endaalo choosi pe.”