Read saamia 1 Ebyomubiha 21 Bible Online

1 Ebyomubiha 21 - saamia bible

1 Ebyomubiha 21

¹Sitaani yadaha ohuleeta Abaisiraeli ebidinyu, mani naabachirisa Daudi ohubala Abaisiraeli.

²Daudi yaboolera Yoabbu neende abeemeresi b'amaye ati, “Muchie mu Yisiraeli yoosi, ohutulira elalira Bberisebba ohwoola Daani, mubale abaandu, mukobole muunjekesa obuungi bwaabwe.”

³Nae Yoabbu yakobolamo ati, “Leha Omwaami yeengiye abaandu bae babe abaangi amahabi emia ndala ohuhiraho koti lu baaka bulaanu buti! Ewe Omwaami, omutuki waange, bona boosi baandu bao. Lwasiina odaha ohuhola esyo esichia ohuleetera Yisiraeli omusaango?”

⁴Nae Yoabbu n'ayiikwa ohuhola esyo si mutuki alagiire. Yoabbu mani naachia mani naabita mu syaalo sya Yisiraeli syoosi, mani naakobola Yerusalemu.

⁵Yoabbu yaleetera Omutuki Daudi obuungi bw'abaandu babalwa. Bali: Emilioni ndala neende elifu emia ndala (1,100,000) mu Yisiraeli, nae mu Buyudaaya, bali abaandu elifu emia chine neende amahumi kataanu-na-kabiri (470,000).

⁶Nae olwohuba Yoabbu yali natafukiirisaanie neende esilagiro sy'omutuki, haba siyaholaho omulimo kwoosi okw'ohubala abaandu daawe, ab'enono ya Leefi neende eya Bbenjamini haba siyababalilamo daawe.

⁷Nasaae yanyoolerera hulw'ebiindu byali nibyaholwa, mani naasaandya Yisiraeli.

⁸Daudi yaboolera Nasaae ati, “Nyonoonere muno hulw'esyo si holere. Nae bulaanu husaba, ndeheremo esyonoono syaange, ese omuhalaabani wao, olwohuba holere esy'obusiru muno.”

⁹Mani Omwaami mani naaboolera Gaadi, omunabbi wa Daudi ati,

¹⁰“Chia oboolere Daudi oti, ‘Omwaami aboola ati, ahuterereeo ebiindu bidatu, doolaho silala sy'aba ahuholereho.’ ”

¹¹Ao mani Gaadi naachia eyiri Daudi, naamuboolera ati, “Omwaami aboola ati, ‘Wedoolereho sy'odaha:

¹²Emyaaka kidatu eky'enjala, oba emyoosi kidatu eky'ohusaandisibwa abasuku bao mu biita, oba endaalo chidatu Omwaami naahuseeta neende olugaanga lwae, asiindihe oluumbe hu syaalo syao, malaika wa Nasaae achia niyeeta abaandu mu Yisiraeli yoosi’ Baasa obone siina syeene si njia ohukobola mu oyo owundumire.”

¹³Daudi yaboolera Gaadi ati, “Biheheere muno! Hamaahiri saandisibwe neende Omwaami, olwohuba akwiira esisa muno, nae hae ohusaandisibwa neende abaandu.”

¹⁴Ao Omwaami n'aleeta oluumbe mu Yisiraeli, nibafwaamo abaandu elifu amahumi kataanu-na-kabiri (70,000).

¹⁵Nasaae n'atuma malaika ohusihirisa Yerusalemu. Nae malaika niyali hu adaha ohusisihiirisa sa ati, Omwaami yasitingaala mani n'akaluuhania ebibaaso byae, naaboolera malaika osihirisa ati, “Lehera ao! Esyo simala!” Malaika yali aambi neende esihubbakiro sya Arauna Omuyebbusi.

¹⁶Daudi niyasiingisa aakulu emoni, yabona malaika w'Omwaami niyeemere mu bbanga akatikaati w'esyaalo neende ekulu, naadiirire olugaanga lwae mu muhono, niyetekeheere elalira ohusihirisa Yerusalemu. Daudi neende abeemirisi b'abaandu, abali nibefwaalire ebigunia, beenamia obweeni bwaabwe mani nibwegeeng'ere hu loba.

¹⁷Daudi yaboolera Nasaae ati, “Niise owalagira ohubala abaandu. Niise owonoona mani nihola esyonoono sihoongo muno. Nae abaandu bano baholere siina syeene? Husaba, Ewe Omwaami Nasaae waange, saandya ese neende abomu nyuumba yaange, nae owonia abaandu bao oluumbe.”

¹⁸Mani Malaika w'Omwaami naalagira Gaadi ohuboolera Daudi yoombahire Omwaami alutaari mu sihubbakiro sya Arauna Omuyebbusi.

¹⁹Daudi yachia koti lu Gaadi yali naamuboolere mu liita ly'Omwaami.

²⁰Bulaanu, Arauna neende abaana bae bane bali mu sihubbakiro nawuulaanga engaano. Arauna niyahubbya emoni enyuma, yabona malaika, mani abaana bae nibeekisa.

²¹Arauna niyatingaala, yabona Omutuki Daudi niyeecha yaali. Arauna yatula mu sihubbakiro, mani yaaguunama aasi, obweeni bwegeeng'a hu loba.

²²Daudi yamuboolera ati, “Nguse esibaanja sirimo esihubbakiro sino, nyombahireo Omwaami alutaari. Njia ohuhutuunga obukusi boosi busihoyera, oluumbe luno lwaakame ohwiita abaandu.”

²³Nae Arauna yaboolera Daudi ati, “Bukula esibaanja, ewe omwaami waange, mani ohole koti lu osiima. Bona, endaawu njicho, hubereese chibe esiyaanwa sisaambwa, haandi emyuubbakiro kyoosi ngino kiri ano, kyehoonyere koti eehwi, neende engaano yohuyaanayo koti esiyaanwa yosi ngino. Ese huberesa byoosi alala.”

²⁴Nae Omutuki Daudi yaboolera Arauna ati, “Haba daawe, ese njia ohuhutuunga obukusi bwaabyo bwoosi mu bwiichufu. Haba siinjia huyaanira Omwaami esiindu syao syoosi, noomba ohuyaana esiyaanwa sisaambwa sitatuungiire esiindu syoosi daawe.”

²⁵Ao Daudi mani naatuunga Arauna amatoongolo k'esaabbu emia chisaasaba (600) ohukula esihubbakiro esyo.

²⁶Mani Daudi niyoombahirao Omwaami alutaari, n'ayaanayo ebiyaanwa bisaambwa neende ebiyaanwa by'ohusaasana. Mani naalaama eyiri Omwaami, Omwaami naamukobolamo, naasiindiha omuliro hu alutaari yohusaambiraho nikutula muukulu.

²⁷Omwaami yalagira malaika, mani malaika naakobosayo olugaanga lwae mu silaalo syalwo.

²⁸Ao Daudi niyabona koti lu Omwaami akoboolemo esyo sy'amusabire, naali hu sihubbakiro sya Arauna Omuyebbusi, yayaanirao ebiyaanwa byae.

²⁹Nae Eyeema ly'Ohubaao hw'Omwaami, li Musa yali niyaholera mu sichiimi, neende alutaari hu biyaanwa byasaambirwaangaho, esiha esyo byali nibisisiiri abuundu wohwiinamiraangamo Gibbeoni.

³⁰Nae Daudi haba siyanyala ohuchiayo ohwiinamira Nasaae, olwohuba yali naatiire olugaanga lwa malaika w'Omwaami.