Read saamia 1 Ebyomubiha 22 Bible Online

1 Ebyomubiha 22 - saamia bible

1 Ebyomubiha 22

¹Daudi mani n'aboola ati, “Yino niyo Enyuumba y'Omwaami Nasaae, haandi yino niyo alutaari Abaisiraeli yi banasaambiraangaho ebiyaanwa bisaambwa.”

²Omutuki Daudi yalagira babuuse alala bawalukeenda boosi abali nibamenya mu syaalo sya Yisiraeli. Yadoolamo abo ab'ohubaacha amakina k'ohwoombahira Enyuumba ya Nasaae.

³Daudi yesi yatusa ebyuuma biingi eby'ohwitaanyamo emisumaari neende amabbaati k'ohuholamo enjiki chohu biruwa bihoongo, neende ebyo eby'ohwitaanyamo ebiindu by'ohwehoonyera mu hwoombaha. Yatusa neende emigasa miingi muno, echitanyalihana ohumanya obusito bwaacho daawe.

⁴Daudi haandi yali neende emisaala miingi muno eky'emiseengese ekitanyalihana obubalwa, ki baandu ba Sidoni neende Tiiro baletaanga.

⁵Olwohuba Daudi yaboola ati, “Enyuumba ya Nasaae yicha ohwoombahirwa Omwaami yihoyere ohuba endai muno mu syaalo syoosi, ey'efuma haandi ey'oluyaali lw'aakulu muno. Nae omwaana waange Solomooni ochia ohuyoombaha asisiiri omuyere haandi abula obumanyirifu bwoosi daawe; sakira ndi ohuyitekehera eby'ohuyoombaha.” Mani Daudi naatekeha ebiindu biingi muno eby'ohwoombahira n'asisiiri ohufwa.

⁶Daudi yalaanga omwaana wae Solomooni mani naamulagira ohwoombahira Omwaami Nasaae wa Yisiraeli Enyuumba.

⁷Daudi yamuboolera ati, “Mwaana waange, ndadaha ohwoombahira Omwaami Nasaae waange Enyuumba ohumwiisamo oluyaali.

⁸Nae Omwaami naahaya n'aboola ati, ‘Weedisa amabaanga maangi, haandi walwaana ebiita biingi, haba soochia hunyoombahira Enyuumba daawe.

⁹Bona, waheebule omwaana musyaani, yahabe omuundu w'omuleembe. Njia ohumuberesa omuleembe, mani ahaye ohuba neende abasuku hu nyaande choosi. Eliita lyae lyahabe Solomooni, olwohuba mu butuki bwae, ndahaberese Yisiraeli omuleembe neende hubuleo ohulwaana hwoosi daawe.

¹⁰Oyo niye ochia ohunyoombahira Enyuumba ya Nasaae. Yahabe omwaana waange, naange njia ohuba laatang'ene. Haandi njia ohwomiisa obutuki mu Yisiraeli endaalo choosi pe.’

¹¹“Bulaanu mwaana waange, Omwaami Nasaae wao abe naawe, ahube ehabi onyale ohumwoombahira Enyuumba koti lu yaboola ebihudiiraho.

¹²Esihiramo, leha Omwaami Nasaae ahuberesa amakesi k'ohutegeera neende ohuheengao esilai neende esyonoono, hu onyale ohutukaanga Yisiraeli n'oloondehana neende amalako kae.

¹³N'onaloondeenge amalako koosi k'Omwaami yaberesa Abaisiraeli naabitira mu Musa, ebiindu byoosi binahuchiraanga bulai. Ba omwomiifu haandi ogume omwooyo, otatya daawe haandi oteyendeherera daawe.

¹⁴Bona, ese teemeraho muno koti lu nyala ohubona endi Enyuumba ya Nasaae yoombahwa. Malire ohunyoola esaabbu yihira etaani elifu chidatu neende emia chine (3,400), efeesa yihira etaani elifu amahumi kadatu neende chine (34,000), eby'ohwehoonyerwa mu hwoombaha Enyuumba ya Nasaae. Waluwo ebikomo neende ebibya ebiingi muno ebitaamanyihaane obusito bwabyo daawe. Haandi tekeehe embaao neende amakina byosi. Wesi hu ebyo, ochia ohumeedaho ebiindi.

¹⁵Haandi oli neende abahalaabani baangi muno. Baluwo ababaachi b'amakina neende abakoombahira, ababaachi neende abaandi abali neende amakesi neende obumanyirifu ohuhola emirimo kya buli ngeri.

¹⁶Baluwo abo abamanyirifu muno mu hwehoonyera esaabbu, efeesa, omugasa, neende ebibya. Ewe chaakiraniramo ohuhola emirimo! Omwaami abe naawe!”

¹⁷Daudi haandi yalagira abeemirisi boosi aba Yisiraeli ohuhoonya omwaana wae, Solomooni n'aboola ati,

¹⁸“Omwaami Nasaae weeng'we, abeere naang'we haandi ababereese omuleembe hu nyaande choosi. Akerere ndayiingira abaandu boosi abali nibamenya mu syaalo sino. Bulaanu bali mu bunyala bw'Omwaami alala neende obw'abaandu bae.

¹⁹Mani bulaanu, Omwaami Nasaae weeng'we mumuhalaabanireenge neende emyooyo kyeeng'we kyoosi neende obulamu bweeng'we bwoosi. Chaakiraniramo ohwoombaha Enyuumba ya Nasaae, hu munyale ohuyitaamo Esanduuku ly'Endagaano y'Omwaami, neende ebiindu biindi byoosi ebyoolerefu ebyehoonyerwa mu humwiinamira.”