Read saamia 1 Ebyomubiha 9 Bible Online

1 Ebyomubiha 9 - saamia bible

1 Ebyomubiha 9

¹Abaisiraeli boosi baandiikwa ameeta ohuloondakana neende koti lu madaala kaabwe kalichiingi. Mani ebibadiiraho nibyandiikwa mu Sitabo sy'Abatuki ba Yisiraeli. Abaandu bomu Buyudaaya bali nibayirwa Bbabbilooni koti esibonereso hulw'ebyonoono byaabwe.

²Abaandu bataangira ohukobola mu loba lyaabwe liri mu biko, balimo Abaisiraeli ba buli ludaalo, Abalaamisi, Abaleefi, neende abahalaabani bomu Nyuumba ya Nasaae.

³Abaandu ohutula mu nono ya Yuda, Bbenjamini, Efuraimu, neende Manaase bachia baamenya mu Yerusalemu.

⁴Wutai omwaana wa Amihuudi, haandi omwiichuhulu wa Omuri. Bakuukaang'ene baandi nibo Yimuri neende Bbani.

⁵Abeechuhulu ba Sela, omwaana wa Yuda, bali neende Asayia, omwaana waamberi koti omwiimirisi waambwe.

⁶Abeechuhulu ba Seera omwaana wa Yuda bali neende Yeweli koti omwiimirisi waabwe. Yeweli neende bamwanaang'ina boosi bali emia chisaasaba neende amahumi kataanu-na-kane (690).

⁷Bano batula mu nono ya Bbenjamini: Salu omwaana wa Mesulamu, haandi omwiichuhulu wa Hodaafia omwaana wa Haseenua.

⁸Yibbunea omwaana wa Yerohaamu, neende Ela omwaana wa Wusi, haandi omwiichuhulu wa Mikiri, neende Mesulamu omwaana wa Sefatia haandi omwiichuhulu wa Reweli, omwaana wa Yibbunia.

⁹Abaandu b'enono ya Bbenjamini boosi alala bali emia kitaanu-na-chine neende amahumi kataanu neende basaasaba (956) abali nibamenya Yerusalemu. Abasaacha boosi abatumbuulwe aakulu balichiingi abeemirisi b'amadaala.

¹⁰Bano nibo abalaamisi bamenyaanga mu Yerusalemu: Yedaya, Yehoyaribbu Yakini,

¹¹neende Asaria omwaana wa Hilikia (omuhunuufu ohiramo mu Nyuumba ya Nasaae), haandi omwiichuhulu w'abaandu bano: Mesulamu, Sadoki, Merayooti, neende Ahituubbu.

¹²Adaya omwaana wa Yerohaamu, haandi omwiichuhulu w'abaandu bano: Pasihuuri, Malikiya, neende Masai omwaana wa Adieli, haandi omwiichuhulu w'abaandu bano: Yahusera, Mesulamu, Mesileemiti, neende Yimeeri;

¹³Abalaamisi abalichiingi abeemirisi b'amadaala bali boola elifu ndala neende emia chitaanu-na-chibiri neende amahumi kasaasaba (1,760). Bali abaandu banyirira ohuhola omulimo kwomu Nyuumba ya Nasaae.

¹⁴Bano nibo Abaleefi abamenyaanga mu Yerusalemu: Semaya omwaana wa Hasibbu, haandi omwiichuhulu w'abaandu bano: Asukiraamu, Hasabbia, ab'enono ya Merari;

¹⁵neende Bbakubbakari, Heresi, neende Galali, neende Matania omwaana wa Miika, haandi omwiichuhulu wa Sikiri, neende Asafu;

¹⁶Obbadia omwaana wa Semaya, haandi omwiichuhulu wa Galali, neende Yedutuuni. Bberekia omwaana wa Asa, haandi omwiichuhulu wa Elikana, owamenyaanga mu situundu syalichiingi esy'esiko sya Netofa.

¹⁷Aandi nibo abaliindi b'Enyuumba ya Nasaae abali nibamenya mu Yerusalemu: Saluumu, Akubbu, Talimooni, neende Ahimaani. Saluumu niye owali omwiimirisi waabwe.

¹⁸Ohwoola hu biha ebyo, abaluyia baabwe nibo abaliindaanga esiruwa sy'ebukwe esyalaangwaanga Esiruwa sy'Omutuki[5]. Hale nibo ababechaanga abaliindi b'ebiruwa ebyeengiraanga mu kaambi ch'Abaleefi.

¹⁹Saluumu, owali omwaana wa Koore haandi omwiichuhulu wa Ebbiasaafu, alala neende abaasye ab'enono ya Koora, niye owahuliraanga omulimo kw'ohuliinda esiruwa siingira mu Eyeema ly'Ohubaao hw'Omwaami, koti lu bakuuka yaabwe bali nibahulira mu kaambi y'Omwaami.

²⁰Finehaasi omwaana wa Eliasaari, niye owahuliraanga abaliindi abomu biha ebyo. Leha Omwaami abe nae!

²¹Sakaria omwaana wa Meselemia yesi yali omuliindi w'esiruwa sy'Eyeema ly'Ohubaao hw'Omwaami.

²²Mani mu huyirira alala, abasaacha bano bali emia chibiri neende ehumi-na-chibiri (212), abadoolwa ohubechaanga abaliindi bohu milyaango neende hu biruwa. Bano bali baandiikwa ohweema hu ngoongo chi bali nibamenyamo. Yali Omutuki Daudi alala neende omunabbi Samueli abali nibata abeechuhulu baabwe mu bwiihalo bw'obunyala buno.

²³Abaandu bano alala neende abeechuhulu baabwe bemeeda ohubechaanga abaliindi bohu biruwa by'Enyuumba ya Nasaae.

²⁴Abaliindi abo balichiingi hu mbeka choosi ech'ebiruwa: emukulu, emwaalo, ebukwe, neende emuumbo, hu buli siruwa syaliho omuliindi muhuluundu.

²⁵Abeeho baabwe abalichiingi nibamenya mu ngoongo, beechaanga mani nibabahoonya omulimo kw'obuliindi nibaberesania ohumala embaka y'endaalo chitaanu-na-chibiri buli muundu.

²⁶Abaliindi bahuluundu bane balichiingi Abaleefi haandi bali neende obunyala buhiramo. Haandi bano nibo balichiingi neende obunyala huliinda ebiseenge byalichiingi mu Nyuumba ya Nasaae neende ebibiihiro byohu Nyuumba ya Nasaae.

²⁷Bano bamenyaanga aambi neende Enyuumba ya Nasaae, olwohuba bwalichiingi obunyala bwaabwe ohuyiliindaanga, neende ohwiikulaangao ebiruwa buli chuli.

²⁸Abaleefi baandi balichiingi neende obunyala bw'ohuliinda ebiindu byehoonyerwa mu hwiinamiraanga Omwaami. Nibo ababitusaangayo haandi bamala babikobosayo buli siha si babyehoonyeraanga.

²⁹Abaandi balichiingi mu bunyala bw'ohuliindaanga ebiindu byoolerefu biindi, neende ohuliindaanga obusye, efiini, amafuta k'enaasi, obubbaani neende eby'esing'aari.

³⁰Nae obunyala bwohusasaanga ebiindu by'ebing'aari byalichiingi eby'abalaamisi.

³¹Omuleefi olaangwa, Matitia, omwaana waamberi wa Saluumu, ow'enono ya Koora, niye owali neende obunyala bw'ohutekehaanga ebiyaanwa by'emigaati kihubbirwe.

³²Abeeho baabwe baandi ab'enono ya Kohati nibo abalichiingi neende obunyala bw'ohudeehaanga emigaati myoolerefu ky'Enyuumba ya Nasaae buli ludaalo lwa Sabbaato.

³³Amadaala kaandi aka Abaleefi kalichiingi neende obunyala bw'ohwiimirira enyembo chomu Nyuumba ya Nasaae. Abeemirisi b'amadaala abali nibamenyaanga mu byoombahe biindi ebyomu Nyuumba ya Nasaae, haandi sibakabwaanga omulimo kwoosi, olwohuba balichiingi abeetekefu ohuba hu mirimo kyaabwe esiro neende esideete.

³⁴Abo balichiingi abahuluundu b'enyuumba chia bakuuka baabwe mu madaala k'Abaleefi, ohweema hu nyiriri ch'obwiibulanwa bwaabwe. Balichiingi abeemirisi, haandi bamenyaanga mu Yerusalemu.

³⁵Jeyeli niye owachaakisa esiko sya Gibbeoni, mani yaasimenyaangamo. Eliita ly'omuhasi wae nilyo Maaka.

³⁶Omwaana wae waamberi niye Abbudoni, nae abaana basyaani bae baandi nibo: Suuri, Kisi, Bbaali, Neeri, Nadabbu,

³⁷Gedoori, Ahio, Sakaria, neende Mikiloti,

³⁸laatang'ene Simeya. Abeechuhulu baabwe bamenyaanga mu Yerusalemu alala neende abeeho bwaabwe aambi neende amadaala k'abaandu b'enono yaabwe.

³⁹Neeri yeebula Kisi, Kisi niyeebula Saulo. Saulo yali neende abaana basyaani bane: Yonatani, Malukisua, Abbinadabbu, neende Esibbaali.

⁴⁰Yonatani niye laatang'ene Meribbu-Bbaali, owali laatang'ene Miika.

⁴¹Miika yali neende abaana basyaani bane: Pitoni, Meleki, Tarea, neende Ahaasi.

⁴²Ahaasi niye laatang'ene Yara. Yara yali neende abaana basyaani badatu: Alemeeti, Asumafeeti, neende Simuri. Simuri niye laatang'ene Mosa,

⁴³Mosa yeebula Bbinea, Bbinea niyeebula Refaya, Refaya niyeebula Eleasa, Eleasa nae niyeebula Aseli.

⁴⁴Aseli yali neende abaana basyaani basaasaba: Asirikaamu, Bbokeru, Yisimaeli, Seyaria, Obbadia, neende Hanaani.