Read saamia 2 Ebyomubiha 1 Bible Online

2 Ebyomubiha 1 - saamia bible

2 Ebyomubiha 1

¹Solomooni omwaana wa Daudi, yadiira mani yomiisa Obwaami bwa Yisiraeli, Omwaami Nasaae wae yaamuberesa ehabi haandi yamuhola yaaba ow'amaani muno.

²Omutuki Solomooni yatusa elako eyiri abahoongo bae boosi abali nibeemiriire emikaanda ky'abasaacha elifu (1,000), haandi neende abasaacha emia ndala (100), abahoongo beby'obutuki boosi, abeemirisi b'amadaala boosi, neende abaandu badoong'ereo boosi,

³n'abalagira ohuchia nae abuundu w'ohwiinamiraanga ali mu Gibbeoni. Bachichaanga ebweene eyo olwohuba eyo niyo eyali niyiri neende Eyeema ly'Ohubaao hw'Omwaami, li Musa, omuhalaabani w'Omwaami yali niyoombaha mu sichiimi.

⁴(Esanduuku ly'Endagaano, kata katyo, lyali niliri mu Yerusalemu, nilyabiihwa mu yeema li Mutuki Daudi yali niyoombaha lu yaleetera Esanduuku elyo ohutula mu Kiriati Yearimu.)

⁵Alutaari y'omugasa yali yaholwa neende Bbesaleeli, omwaana wa Wuri, haandi omwiichuhulu wa Huuri, yali yosi niyiri mu Gibbeoni mu moni w'Eyeema ly'Ohubaao hw'Omwaami. Omutuki Solomooni alala neende abaandu baandi boosi beenamiraanga Omwaami waabwe ebweene eyo.

⁶Nae mu moni w'Eyeema niwo yi omutuki yeenamiraanga Omwaami wae n'ayaanayo ebiyaanwa hu alutaari y'omugasa eyo; yateenga ebisolo elifu ndala (1,000) nibisaambwa bulambiriire hu bweene ohwo.

⁷Esiro syeene esyo, Nasaae yabonehera Solomooni yamuteeba ati, “Siina syeene si odaha huberese?”

⁸Solomooni yakobolamo ati, “Ewe wali wamenya niweekesaanga obuheeri bubitiirifu eyiri Daudi laata yaange, woola ohukera ese syesi ndaamukobola mu makulu koti omutuki.

⁹Ewe Omwaami Nasaae, yoseresa ewe omweene esisuubise si wahola eyiri laata. Ewe omweene niiwe owakera ese ndaaba omutuki w'abaandu bano abali abaangi muno batahanyala ohubalwa daawe,

¹⁰ewe mala sa akaamberesa amakesi neende obumanyirifu bi hoyeere ohuba nabyo hu nyale ohubeemiriraanga. Ataali ao, ese syeeng'ene mba ndanyala endye ohutuka abaandu bahunuufu bao bano?”

¹¹Nasaae nae yakobola mu Solomooni ati, “Ewe mbao odoolereo esihoyera syeene. Ataali ohusaba emyaandu, kata obunyali, oba oluyaali, oba ohufwa hw'abasuku bao, oba kata obulamu bwao buungi, ewe naawe osabire sa amakesi neende ohumanya hwoonyale ohutuka abaandu baange, abo ba ese mweene ndahuhola waaba omutuki waabwe.

¹²Mani ese njia ohuhuberesa amakesi neende ohumanya. Haandi ohumeeda hu bweene ohwo, ese njia ohuhuberesa emyaandu miingi, alala neende obunyali, haandi oluyaali ebihiraho bi mutuki yeesi yaliho nabyo hale, achia ohubaaho nabyo haandi.”

¹³Solomooni yatula abuundu ao ow'ohwiinamiraangamo Omwaami aali mu Gibbeoni, yi Yeema ly'Ohubaao hw'Omwaami lyali niliri, yaakobolayo engo mu Yerusalemu. Eyo niyo yi yatukiraanga Yisiraeli yoosi.

¹⁴Yahola eye ely'ebigaari bilwaana elifu ndala neende emia chine (1,400) neende efaraasi enwaani elifu ehumi neende chibiri (12,000). Echiindi hweechio yali niyachitukira mu Yerusalemu, nae echiindi chidoong'ao yali yachidalaandasa mu biko biindi bikabuhaane.

¹⁵Mu siha syae sy'Obwaami, efeesa alala neende esaabbu byadabaadaba mu Yerusalemu byafwaana koti amakina magu, haandi emiseengese kyaaba emibitiirifu obuungi koti sa emigasia mu nandaalira ch'ebigulu bya Yuda.

¹⁶Bawamwaanda bomu butuki nibo abalichiingi nibeemirira obuchurusi bw'efaraasi chitula mu Misiri, neende mu Silisia,

¹⁷obuchurusi bw'ebigaari bilwaana ebitula mu Misiri. Nibo abakabaanga Abahiiti neende abatuki ba Siria efaraasi alala neende ebigaari bilwaana, nibakusaanga buli sigaari hu bituundu by'efeesa emia chisaasaba (600), neende efaraasi hu bituundu emia ndala neende amahumi kataanu (150).