Read saamia 2 Ebyomubiha 14 Bible Online

2 Ebyomubiha 14 - saamia bible

2 Ebyomubiha 14

¹Omutuki Abbija yafwa yasiihwa mu ng'ani ch'obwaami mu Siko sya Daudi. Asa omwaana wae niye owamukobola mu makulu koti omutuki, mu bwaami bwa Asa, esyaalo esyo syeehoyera mu muleembe ohumala embaka y'emyaaka ehumi.

²Asa yanyala ohusaangaasa Omwaami, Nasaae wae, n'aholaanga ebihoyera haandi ebilai.

³Yatusao alutaari cha banasaae bakeni neende abuundu yi bakafiiri beenamiraangamo, yalikula emisiiro ky'amakina ky'ebiyeembeho, haandi yakwiisa ebiloongaloongwe by'Asera nasaae muhasi.

⁴Yalagira abaandu ba Yuda ohuholaanga bi Omwaami adaha, Nasaae wa bakuuka yaabwe, haandi neende ohuwuliraanga enjekesa chae neende amalako kae.

⁵Olwohuba yamalao ebituundu by'ohwiinamiraangamo obukafiiri, neende alutaari ch'ohuniooheseraangaho obubbaani echatulaanga mu biko bya Yuda, mani obwaami bwaaba mu muleembe aasi w'obwimirisi bwae.

⁶Yoombahaanga ebisitirira hu biko bya Yuda mu siha syeene esyo, mani hu mbaka y'emyaaka emiingi yabulaangao ebiita byoosi, olwohuba Omwaami niye owamubeechaanga omuleembe.

⁷Yaboolera abaandu ba Yuda ati, “Eng'we lehe husitirire ebiko byeefwe bino neende ohwoombahaanga ebida neende eminaara, neende ebiruwa binyala ohweeyikala haandi byahiingakirirwa. Efwe mbano humalire ohunyala ohwemalira esyaalo sino, ohweema hu huholaanga bi Omwaami Nasaae weefwe adaha. Mani niye otuliindire, haandi yaamala yaatuberesa obuliindi hu buli lubeka.” Mani baanyala ohweyoombaha haandi neende ohuhula-hulana.

⁸Omutuki Asa yali neende eye ly'abasaacha elifu emia chidatu (300,000), ohutula mu Yuda, nibakiingire engabo neende amafumo, haandi neende abasaacha elifu emia chibiri neende amahumi kataanu-na-kadatu (280,000), ohutula mu Bbenjamini, nibakiingire engabo neende obuyiingo. Bano boosi balichiingi abalulu, abeekeswa bulai muno.

⁹Omuitiopia wuundi, owali n'alaangwa mbwe Seera yafumaalira Yuda naali neende eye ly'abasaacha emilioni ndala (1,000,000) neende ebigaari emia chidatu (300) yalwaana ohwoola mu Maresa.

¹⁰Asa yesi yatulaniramo sa ohuchia ohubalwaania, mani enyaande choombi banyoola obweemero mu hooho lya Sefata aambi neende Maresa.

¹¹Asa yasaba Omwaami Nasaae wae ati, “Ewe Omwaami waange, ewe niiwe onyalaanga ohuhoonya eye kata koti sa lu ohoonyaanga ely'amaani. Tuhoonyeho bulaanu buti, Ewe Omwaami Nasaae weefwe, olwohuba efwe hweesika ewe weeng'ene, sakira mu liita lyao nimwo mu ewe hutulire ohulwaania eye bitiirifu lino. Omwaami, ewe niiwe Nasaae weefwe; abulao oyo yeesi onyala ohuhuyiingira.”

¹²Omwaami wuno yayiingira eye lya Etiopia elyo, Asa neende eye lya Yuda nily'abaseeta. Beeyiruhira sa,

¹³Asa neende abalwaani bae baboongaho ohwoola hu Gerari. Abaitiopia abaangi beetwa ohwoola lu eye elyaabwe elyo lyoola lyaahaywa ohweema lyalwaanaho daawe. Bayiingirwa neende Omwaami neende eye lyae, mani eye lyae elyo lyaanyala ohuyaaya ebiindu ebibitiirifu muno.

¹⁴Banyala ohusihirisaanga ebiko byalichiingi abuundu yebodohaanie Gerari, olwohuba abaandu babibeechaangamo bali nibateenga hulw'Omwaami. Eye lyae elyo mani lyanyala ohuseenakira ebiko ebyo byoosi mani baanyala ohupeeya ebiindu ebibitiirifu.

¹⁵Haandi banyala ohuseeta ekaambi ch'abaayi baandi, mani nibanyala ohupeeya obuduhunyi bw'amakoondi neende engamia. Nibamala batyo beekobolerayo engo mu Yerusalemu.