Read saamia 2 Ebyomubiha 16 Bible Online

2 Ebyomubiha 16 - saamia bible

2 Ebyomubiha 16

¹Mu mwaaka kw'amahumi kadatu-na-hasaasaba okw'obwaami bw'Omutuki Asa owa Yuda, Omutuki Bbaasa wa Yisiraeli yafumaalira Yuda mani yachaaka ohusitirira Rama hu anyale ohwaakamia engeendo choosi echiingira haandi neende echitula mu Yuda.

²Mani Asa yabukula efeesa neende esaabbu ohutula mu sibiihiro sy'Enyuumba ya Nasaae neende mu dooho, mani yaamala yabiiyira mu Damasiko, eyiri Omutuki Bbenihadadi owa Siria, neende emboosi chino chiti:

³“Ewe leha efwe fweembi hwiingire esaanga, koti lu baseefwe balichiingi. Efeesa yino neende esaabbu yino, biyaanwa sa byao. Mani bulaanu ewe hola esaanga yao neende Omutuki Bbaasa owa Yisiraeli hwahoyeere ohutusa eye lyae mu syaalo syaange.”

⁴Bbenihadadi yeeha yafukiirisania neende esibaaso sya Asa, mani yaatuma abahoongo b'amaye bae alala neende amaye kaabwe bachie baseete ebiko bya Yisiraeli. Bachia mani bawaamba Yijoni, Daani, Abbeli-Maimu, neende ebiko byoosi bya Nafutaali yi biindu byehoonyerwa byoosi byali nibyabiihwa.

⁵Omutuki Bbaasa niyawulira esyali nisikwiireo, yaakama ohusitirira Rama mani yaalehana neende omulimo okwo sa.

⁶Bulaanu Omutuki Asa yabuusa alala abasaacha ohutula mu Yuda mwoosi mani yaababoola bakiinga amakina koosi neende embaao choosi bi Bbaasa yali niyehoonyeraanga mu Rama, mani nibamala nibabyehoonyera ohusitirira ebiko bya Gebba neende Misipa.

⁷Esiha syeene esyo omunabbi Hanani yachia eyiri Omutuki Asa yaboola ati, “Olwohuba ewe weesikire omutuki wa Siria mu bweyaango bw'ohweesika Omwaami Nasaae wao, eye ly'omutuki wa Yisiraeli anyalire ohuhweeyibao.

⁸Abaitiopia neende Abalibbya haba sinibo abali neende amaye mahoongo akali neende ebigaari biingi neende abalwaanira hu faraasi? Nae olwohuba mbwe ewe weesika Omwaami, yakera ewe waanyala ohubayiingira boosi.

⁹Omwaami yehaliirisira aambi esyaalo syoosi, ohuberesaanga amaani abo ba emyooyo kyaabwe kimutya. Ewe naawe oholere esy'obusiru, mani sakira ohutula bulaanu buti ohwemeeda mu moni ochia ohubeechaanga mu biita endaalo choosi.”

¹⁰Sino syaahola Asa yanyoolererera muno omunabbi oyo, ohwoola lu yahola baamuboya neende eminyororo. Syali esiha syeene sino si Asa yachaaka ohusaandyaanga abaandu baandi.

¹¹Ebiindu byoosi ebyali mu bwaami bwa Asa ohuchaakira mu njaako ohwoola hu njakamo byandiikwa mu sitabo silaangwa mbwe Ebyaliwo by'abatuki ba Yuda neende Yisiraeli.

¹²Mu mwaaka kw'amahumi kadatu neende hataanu-na-hane Asa naali omutuki, yefwookola amakulu neende obulwaae bubi obw'amakulu; nae kata katyo haba siyafukiirira ohukobola eyiri Omwaami ohumuhoonya daawe, nae yachia sa eyiri abalesi.

¹³Emyaaka nikyabitao kibiri mu moni, yafwa

¹⁴mani yasiihwa mu ng'ani y'olwaneendea yi mweene yali ni yabaachira mu Siko sya Daudi. Beehoonyera ebiluungiro neende amafuta k'esing'aari ohutereesa omubiri kwae kusiihwe, mani baamala boombaha esituuli sy'amakeenga ak'ohumuliriraho.