Read saamia 2 Ebyomubiha 19 Bible Online

2 Ebyomubiha 19 - saamia bible

2 Ebyomubiha 19

¹Omutuki Yehosafati owa Yuda yakobola naali omulamu mu dooho lyae mu Yerusalemu.

²Omunabbi wuundi, Yehu omwaana wa Hanani, yatula yaachia ohubukaanana neende omutuki mani yaamuboolera ati, “Ewe obaasa oti sihoyera ohuhoonya abamayaanu, haandi neende ohukwiira abo abasyuula Omwaami kose? Ebyo byooholere bimalire ohwiisa etima ly'Omwaami hu ewe omweene.

³Nae kata katyo, ali hoo ebiindu bilai mu ewe. Ewe wanyala ohumalao ebilolero bya Asera nasaae muhasi bi baandu beenamiraanga, mani wateemaho ohuloondakana neende ohudaha hwa Nasaae.”

⁴Kata neende Omutuki Yehosafati yali niyamenya mu Yerusalemu, yali ni yalumirira ohusamulaangaho naachia mu baandu, ohutula mu Bberisebba emwaalo ohwoola hu ndulo w'esyaalo sy'ebigulu sya Efuraimu emukulu bweene, hu anyale ohukobosa abaandu eyiri Omwaami, Nasaae wa bakuuka yaabwe.

⁵Yadolaanga abakayi mu buli siko syasitwa esya Yuda

⁶mani naamala naabalagira ati: “Mweliinde ohuheengaanga emisaango; olwohuba eng'we haba simuli ohuholaanga omulimo okwo hulweeng'we, nae ohweema hu bunyala bw'Omwaami, mani omweene ali naang'we mu huheenga omusaango kwoosi.

⁷Yiseenge oluyaali mu Omwaami, mani muhola neende ohwehaliirisa, olwohuba Omwaami Nasaae weefwe oyo haba siyesimiirisira obulyaanga oba ohuyiririrsa, oba ohulichaanga asowa.”

⁸Mu Yerusalemu Yehosafati yadoola Abaleefi, Abalaamisi, nae abaandi abahunuufu ohubeechaanga abakayi mu misaango kidiira hu huhalaka amalako k'Omwaami neende ohusiindihana hw'abamenyaane abali mu siko omwo.

⁹Yababeresa amakerako kano kati: “Muhoyere ohuhola emirimo kyeeng'we nimutiire Omwaami, neende obweesikwa nimumuwulira mu buli siindu si muba nimuhola.

¹⁰Buli lu waasyeeng'we ohutula mu siko syoosi, n'abaleeteraanga omusaango kw'obwiiti, kata sa okw'ohuhalaka elako liindi lyoosi oba elako lyoosi, muhoyere ohubeekesaanga bulai engeri yi bahoyere ohwebisiraangamo nibali ohuyaaswa omusaango, batoola ohuhweengerwa omusaango okw'ohwonoona mu moni w'Omwaami. Nimutahola mutyo, eng'we mweesi alala neende abanasyaalo boosi bachia ohwoswaho omuhono kw'Omwaami kw'etima. Nae eng'we nimuhola sa koti lu muhoyere ohuhola, simuchia hubaaho omusaango kwoosi daawe.

¹¹Amaria Omulaamisi Muhuluundu niye ochia ohubeechaanga neende obunyala buhiramo mu misaango ky'ediini, nae Sebbadia omwaana wa Yisimaeli, gafana wa Yuda, niye ochia ohubeechaanga neende obunyala buhiramo mu misaango ky'esyaalo. Abaleefi nibo abali neende obunyala bw'ohubonaanga bati eheenga ch'ebiina choosereswa bulai. Mubecheenge abomiifu mani munyala ohuloondekanaanga neende kano makerako, mani Omwaami ahoyaanga aba hu lwaande lw'adyeeri!”