Read saamia 2 Ebyomubiha 2 Bible Online

2 Ebyomubiha 2 - saamia bible

2 Ebyomubiha 2

¹Omutuki Solomooni yabisa ohwoombaha Enyuumba ya Nasaae mu Omwaami yali naahoyera ohwiinamirwaangamo, haandi neende ohweeyoombahira edooho omweene.

²Yataao abasaacha elifu amahumi kataanu-na-kabiri (70,000) ohuhola hu hukiinga ebyehoonyerwa, haandi neende abaandi elifu amahumi kataanu-na-kadatu (80,000) ohuhola hu hubaacha amakina mu syaalo sy'ebigulu. Yaliwo abaandi elifu chidatu neende emia chisaasaba (3,600) ohuhola koti abeemiriire emirimo ekyo kyoosi.

³Solomooni yatuma emboosi eyiri Omutuki Hiramu owa Tiiro ati: “Noojama, holeganaho naange mu buchurusi koti lu waholaanga neende laata yaange, Omutuki Daudi, n'omukusa ebituundu by'emiseengese by'ohwoombahira edooho lyali elyae.

⁴Ese ndi ohwoombaha Enyuumba ya Nasaae ohwiisa oluyaali mu Omwaami Nasaae waange. Achia ohuba Abuundu Woolerefu yi baandu baange alala neende ese omweene huchia ohumwiinamiraangamo, nihunioohesa obubbaani bweluunga bw'ebing'aari, yi efwe huchia ohumubereseraanga ebiyaanwa eby'emigaati myoolerefu butoli-toli, haandi yi huchia ohuyaaniraanga ebiyaanwa bisaambwa buli chuli neende engoloobe, haandi neende hu Sabbaato, Ebidyaalo by'Omwoosi Muyaaha, haandi neende hu ndaalo chiindi enjoolerefu ohwisaanga oluyaali mu Omwaami Nasaae weefwe. Omweene niye owalagira Yisiraeli ohuholaanga yityo endaalo choosi.

⁵Ese ndi ohusuubira ohwoombaha Enyuumba ya Nasaae, olwohuba Nasaae weefwe muhunuufu ohuhira banasaae baandi.

⁶Nae abulao oyo onyala yoombahira Nasaae Enyuumba ya Nasaae, olwohuba kata obutabaafu bw'ekulu haba sibunyala ohumufung'aania daawe. Nae ese ndahanyala endye ohwoomba Enyuumba ya Nasaae eyinyala yaaba eyihiraho eyo eyohuniooheseraangamo obubbaani obuchiira Nasaae?

⁷Mani bulaanu ewe ndumireho omusaacha oyo oli neende obumanyirifu mu hwitaanya, esaabbu, efeesa, omugasa, neende esibya, haandi neende ohusona engubo cha bbulu, papo neende ranjaai. Oyo aba achia ohuholeraanga alala neende ababaachi ba Yuda neende aba Yerusalemu ba Daudi laata yaange yadoola.

⁸Ese manyire bulai bweene obumanyirifu bu basaacha babaachi bao bali nabwo, mani ewe ndeetere sa ebituundu by'emiseengese, saipuraasi, kata neende yunipeeri ohutula mu Lebbanooni. Ese naange ndi omweetekefu ohuhuleetera abasaacha baange abachia ohuhuhoonya

⁹mu hutekeha embaao enyiingi, olwohuba Enyuumba ya Nasaae yiindi ohuchiiririra ohwoombaha yicha ohuba etaabaafu muno haandi ey'obunyiri.

¹⁰Nae koti ohuhoonyeraho abasaacha babaachi bao, ese njia ohuhuleetera etaani elifu chibiri (2,000) ch'engaano, etaani elifu chibiri (2,000) ch'amabere masuungu, haandi neende elita ech'efiini elifu emia chine (400,000), haandi neende elita elifu emia chine (400,000) ech'amafuta k'enaasi.”

¹¹Omutuki Hiramu yesi yatumira Solomooni ebbarwa yikobola mu yae. Yaandiika ati, “Olwohuba Omwaami yaheera abaandu bae, sakira yaahuholere ohuba omutuki waabwe.

¹²Omwaami afumisibwe, Nasaae wa Yisiraeli, Omuloongi w'ekulu neende esyaalo! Yaberesa Omutuki Daudi omusyaani mukesi, owechula ohumanya neende obumanyirifu, oli bulaanu ohutekehaanga ohwoombahira Omwaami Enyuumba ya Nasaae, haandi omweene ohweeyoombahira edooho.

¹³Mani ese ndi ohuhuleetera omuundu omukesi, omumanyirifu, omuhunuufu mu bwitaanyi bw'ebibya olaangwa mbwe Huramu.

¹⁴Ng'ina yali naali mulala hub'enono ya Daani, nae laatang'ene yali omwiibulanwa wa Tiiro. Yamanya muno ohwitaanya ebiindu by'esaabbu, efeesa, omugasa, ebibya, amakina neende mu mbaao. Anyala ohusona engubo cha bbulu, papo, neende ranjaai, haandi kata neende elaasi. Anyala ohusaata hwoosi haandi anyala ohuloondakana neende efwaana yoosi yaaba n'aboleerwe. Mani mulehe aholeho neende abahalaabani bao bamanyirifu, haandi neende abo abaholeraanga lataao, Omutuki Daudi.

¹⁵Mani ewe bulaanu tuleetere engaano, amabere masuungu, efiini, haandi neende amafuta k'enaasi, bi watulaka.

¹⁶Muungulu cha Lebbanooni, efwe huchia ohukwiisa emisaala ky'emituumba kyoodaha, hukiboye alala koti amajweenge mani hukilehe kibeengere hu nyaanja ohwoola lu kyoolera mu Yopa. Ohutula abweene ao, niwo yooba ochia ohukiyirira mu Yerusalemu.”

¹⁷Omutuki Solomooni yabala abaandu boosi abali nibali abakeni bali nibamenya mu syaalo sya Yisiraeli, ohubala hufwaananaho neende hula ohwali ohwa Daudi laatang'ene huyali niyahola. Abakeni bali nibamenya omwo bali elifu emia ndala neende amahumi kataanu neende chidatu, neende emia chisaasaba (153,600).

¹⁸Yatuma abasaacha elifu amahumi kataanu-na-kabiri (70,000) hu baandu beene abo ohuchia ohukiingaanga ebyehoonyerwa ebyo, haandi neende abaandi elifu amahumi kataanu-na-kadatu (80,000) ohuchia ohubachaanga amakina muungulu, haandi yatuma abanyaapara elifu chidatu neende emia chisaasaba (3,600) ohuchia ohobona bati emirimo ekyo kiholwa bulai.