Read saamia 2 Ebyomubiha 22 Bible Online

2 Ebyomubiha 22 - saamia bible

2 Ebyomubiha 22

¹Abaaraabbu baandi bali nibeemiriire ohupeeya neende ohwiita abasyaani b'Omutuki Yehoramu boosi ohutusaho Ahasia, owali walaka waabwe. Mani bulaanu abaandu ba Yerusalemu beehasa Ahasia ohuba omutuki koti omukerami wa laatang'ene.

²Ahasia yali naali emyaaka amahumi kane neende kibiri obuhuluundu niyachaaka ohutuka; yatukira embaka y'omwaaka mulala naali mu Yerusalemu. Eliita lya ng'ina lyali mbwe Atalia, omwiichuhulu wa Omuri.

³Yesi yakeendera sa mu ngira chali echia Ahabbu, koti lu ng'ina niye owali omukeraki wae mu huhola ebimayaanu.

⁴Yonoona mu moni w'Omwaami, olwohuba luunyuma lw'ohufwa hwa laatang'ene abaandu ab'edaala ly'Ahabbu beehola ohuba abakeraki bae, mani baamuyira mu hukwa hwae.

⁵Naloondakanaanga neende amakerako kaabwe, yeyambaania hu Mutuki Yoramu owa Yisiraeli mu biita neende Omutuki Hasaeli owa Siria. Amaye kaabwe kano kadiiraniramo mu Ramooti mu Gileadi, mani Yoramu yanyaalirwa mu biita omwo.

⁶Yakobola mu siko sya Yesireeli ohuwonera amakoonjo kae ebweene eyo, mani Ahasia yamuloondaho ebweene eyo ohumukeniya.

⁷Nasaae yehoonyera obukeni buno eyiri Yoramu ohunyala ohukwiisira Ahasia aasi elalira. Mani Ahasia niyali n'asisiiri ebweene eyo, abo boombi bakwiibwaho neende omusaacha wuundi olaangwa mbwe Yehu omwaana wa Nimusi, yi Omwaami yali n'adoolere ohusihirisa obwaami bwa Ahabbu.

⁸Mani koti lu Yehu yali naali ohwooseresaanga eheengao ya Nasaae hu bwaami obwo, yakaanana neende omukaanda kw'abeemirisi b'Abayudaaya, haandi neende okw'abeewa b'Ahasia abali nibachiana neende Ahasia hu bukeni bwae. Yehu yanyala ohubeeta boosi.

⁹Ohukoonya Ahasia hwachaaka mani bamunyoola niyeekisire mu Samaria. Bamubukula mani baamuyira eyiri Yehu mani bamwiitira abweene ao. Nae basiiha omulaambo kwae ohweema hu luyaali lwali olwa kukaang'ene owali Omutuki Yehosafati, owateemaho koti lu anyala ohuhalaabanira Omwaami. Abulao kata mulala ohutula mu daala ly'Ahasia owawonamo owali naanyala ohutuka obwaami obwo.

¹⁰Esiha syeene si Atalia ng'ina Mutuki Ahasia niyawulira hu hwiitwa hw'omwaana wae, yatulaniramo ohulagira abaandu boosi abali nibadiiranaho neende enono y'obutuki beetwe boosi.

¹¹Ahasia yali neende Yehosebba mboochoong'ene wa laatang'ene wuundi, owali niyadeehera omulaamisi olaangwa mbwe Yehoyada. Yanyala ohuchia mani yeeba mu bweekisi mulala hu baana ba Ahasia, olaangwa mbwe Yoasi, mani naamumala hu balaangira baandi abali nibali aambi ohwiitwa, mani naamala naamukisa alala neende omulesi wae mu sigoro sy'ohukonamo mu Nyuumba ya Nasaae. Ohumubiiha naamukisire atyo, yanyala ohumuwonia ohufwiira mu mahono ka Atalia.

¹²Ohumala embaka y'emyaaka kisaasaba yadoong'a ebweene eyomu bweekisiro, Atalia naali ohutuka koti omutuki muhasi.