Read saamia 2 Ebyomubiha 23 Bible Online

2 Ebyomubiha 23 - saamia bible

2 Ebyomubiha 23

¹Luunyuma lw'ohumala ohuliindirira ohumala embaka y'emyaaka kisaasaba emilaamba, Yehoyada omulaamisi yaheengao ati sino nisyo esiha sy'ohuboneramo esy'ohuhola. Yahola endekeha neende abanamaye bahoongo bano: Asaria omwaana wa Yerohaamu, Yisimaeli omwaana wa Yehohanani, Asaria omwaana wa Obbedi, Maseya omwaana wa Adaya, neende Elisafati omwaana wa Sikiri.

²Bakeendaanga nibachia mu biko bya Yuda byoosi nibaleeta mu Yerusalemu Abaleefi alala neende abeemirisi b'enono boosi.

³Boosi bebuusa mu Nyuumba ya Nasaae, mani baahola endagaano neende Yoasi, omwaana w'omutuki. Yehoyada yababoolera ati, “Omusyaani w'omutuki wafwa. Bulaanu niye ohoyere ohuba omutuki, koti sa lu Omwaami yali niyasuubisa ati abeechuhulu b'Omutuki Daudi nilwo lu bachia ohubeechaanga.

⁴Mani sino nisyo sihuchia ohuhola. Abalaamisi neende Abaleefi bachia ohuchaaka emirimo kyaabwe hu ludaalo lwa Sabbaato, esituundu silala hu bidatu byaabwe nibo abanaba nibaliindire ebiruwa by'Enyuumba ya Nasaae,

⁵esituundu silala hu bidatu siindi nisyo esichia ohuba nisiliindire edooho ly'obutuki, nae abadoong'ereo bachia ohuteebwa hu Siruwa sy'Omusiingi. Abaandu boosi bachia ohwebuusira mu lwaanyi lw'Enyuumba ya Nasaae.

⁶Abulao oyo yeesi ochia ohunyala ohwiingira mu syoombahe sy'Enyuumba ya Nasaae ohutusaho Abalaamisi neende Abaleefi abanaba nibali hu mirimo. Abo banyala ohwiingira, olwohuba abo booswa, nae abaandu badoong'ereo boosi bahoyere ohwiisa oluyaali mu makerako k'Omwaami mani badoong'a sa erwaanyi.

⁷Abaleefi nabo bahoyere ohweemaanga nibaliindire nibebodoohaanie omutuki, nibamalire ohusobolayo engaanga chaabwe, nihaandi bahoyere ohudoong'a batyo neende omutuki buli yanachiraanga. Oyo yeesi ochia ohuteemaho ohwiingira mu Nyuumba ya Nasaae, achia ohwiitirwao sa.”

⁸Abaleefi alala neende abaandu boosi aba Yuda baloondakana sa neende ebilagiro bya Yehoyada. Abasaacha abo haba sibaseebulwa kata neende nibali nibamalire emirimo kyaabwe olwa Sabbaato, mani abahoongo bakera abo boosi abali ohwiingira hu mirimo neende abo abali nibali ohutula hu mirimo baaba nibali abweene ao.

⁹Yehoyada yaberesa abahoongo amafumo neende engabo ebyali eby'Omutuki Daudi, ebyali nibyabiihwa mu Nyuumba ya Nasaae eyo.

¹⁰Yatekehe abasaacha abo nibali neende engaanga chisoboolwe mu bilaalo, bebodoohania mu moni w'Enyuumba ya Nasaae eyo, ohuliinda omutuki.

¹¹Mani Yehoyada yeemirira Yoasi yaatula, mani yaamufwaasa ekofia y'obutuki hu mutwe kwae, haandi yaamala yaamudiisa obwandiike bw'amalako katuka obwaami. Mani ao yaanyala ohuhwiihaswa ohuba omutuki. Yehoyada omulaamisi neende abaana bae bachuha amafuta hu Yoasi, mani buli muundu yehuuma n'aboola ati, “Omutuki wuno ayiindire!”

¹²Atalia yanyala ohuwulira abaandi nibali ohulaya omutuki oyo, mani yayaala naachia eyiri Enyuumba ya Nasaae, yi sidiiyiha syali nisyebusiire.

¹³Niyoolayo, yabona omutuki muyaaha naali mu mulyaango kw'Enyuumba ya Nasaae eyo, niyeemere aambi neende ekutu lyali nilyaleherwa abatuki boong'ene, n'abodohanisibwe neende abanamaye bahoongo, neende aboobbi b'eturumbete. Abaandu badoong'ereo boosi bali nibali ohwehumaanga nibeehoya haandi nibobbaanga eturumbete, nae abeembi bomu Nyuumba ya Nasaae neende ebihubba byaabwe nibeemiriire omuholo okwo. Yetaandulaho engubo chae neende okusinye mani naamala niyehuuma ati, “Oluhobo! Oluhobo!”

¹⁴Yehoyada haba siyali naadaha Atalia ohwiitirwa abuundu w'Enyuumba ya Nasaae daawe, mani yehuuma n'alaanga abanamaye bahoongo ati, “Eng'we mumutuse erwaanyi akatikaati w'enyiriri ch'abaliindi abo, mani mwiite oyo yeesi ochia ohuteemaho ohuwonia omuhasi oyo.”

¹⁵Bamukwaaho, mani baamuyira ena dooho, mani niboola hu Siruwa Faraasi, nibamwiitira abweene ao.

¹⁶Yehoyada omulaamisi yakera Omutuki Yoasi alala neende abaandu boosi bamweyambaaniaho mu huhola endagaano bati, nibo abachia ohubeechaanga abaandu b'Omwaami.

¹⁷Mani boosi bachia eyiri enyuumba ya nasaae ya Bbaali mani nibayilikula niyiweera aasi. Basaasakula alutaari choosi neende ebiloongaloongwe byali oo mani nibeeta Matani, omulaamisi wa Bbaali, mu moni wa alutaari echio.

¹⁸Yehoyada yata abalaamisi neende Abaleefi mu bunyala bw'emirimo kyomu Nyuumba ya Nasaae eyo. Bali abohuholaanga emirimo ki baberesebwa neende Omutuki Daudi, haandi neende ohusambaanga ebiyaanwa ebiba nibiyaanirwe eyiri Omwaami ohuloondakana neende Amalako ka Musa. Haandi bali neende obunyala budiira hu hweemba neende emiholo.

¹⁹Yehoyada haandi yata abaliindi baandi hu mulimo okuli en'abiruwa bya Nyuumba ya Nasaae ohukayiraanga buli muundu onabeechaanga naali ow'omufuto eyiri Nasaae.

²⁰Abanamaye bahoongo, abeebulanwa bahunuufu, alala neende ab'oluyaali, haandi neende abaandu badoong'ereo boosi beyambaania hu Yehoyada mu huhuumba hwaleeta omutuki oyo ohumutusa hu Nyuumba ya Nasaae, ohwoola hu dooho lyae. Beengirira mu siruwa sihuluundu, mani omutuki yeehala mu bweyaango bwae, hu sisaala sy'obutuki.

²¹Abaandu boosi beechula esangaalo, nae esiko sihuluundu syali mu sisididye, koti lu Atalia yali n'amalire ohwiitwa.