Read saamia 2 Ebyomubiha 24 Bible Online

2 Ebyomubiha 24 - saamia bible

2 Ebyomubiha 24

¹Yoasi yeehaswa ohuba omutuki wa Yuda naali neende emyaaka kitaanu-na-kibiri mani yaanyala ohutukira mu Yerusalemu ohumala embaka y'emyaaka amahumi kane. Ng'ina yali niye Sibbia ohutula mu siko sya Bberisebba.

²Yaholaanga ebyasaangasaanga Omwaami Yehoyada omulaamisi niyalichiingi nasisiiriwo omulamu.

³Yehoyada yadoolera Omutuki Yoasi, abahasi babiri mani bamwiibulira abaana basyaani neende abahaana.

⁴Niyali niyahamala ohubaaho omutuki hulw'esiha esidiidi siti, Yoasi yaheengao ohubona ati Enyuumba ya Nasaae yitereeswa.

⁵Yalagira abalaamisi neende Abaleefi ohuchia mu biko bya Yuda ohusolosa hu baandu boosi eseende chimala ohuhola endereesa ya buli mwaaka hu Nyuumba ya Nasaae eyo. Yababoolera ohuholerao bwaangu, nae Abaleefi beekoyaania sa,

⁶mani yaalaanga Yehoyada yeecha yaali, owali omwiimirisi waabwe, mani yaamuteeba ati, “Siina syeene esikerere noohaya ohubona oti Abaleefi basolosa hu Yuda neende Yerusalemu omusolo ku Musa, omuhalaabani w'Omwaami, yadaha abaandu ohutungaanga eseende chisiira Eyeema ly'Ohubaao hw'Omwaami?”

⁷(Abaloondi ba Atalia, omuhasi mululu oyo, bali nibanyaasa Enyuumba ya Nasaae haandi nibehoonyera ebiindu byoolerefu biingi mu hwiinamiraanga Bbaali.)

⁸Omutuki oyo yalagira Abaleefi ohuhola Esanduuku ely'obuhoonyi mani ohuliteengeha mu siruwa sy'Enyuumba ya Nasaae.

⁹Babisa emboosi eyomu Yerusalemu mwoosi haandi neende mu Yuda mwoosi, buli muundu yeesi hw'anyale ohuleeta eyiri Omwaami emisolo ki Musa, omuhalaabani wa Nasaae, bi yasolosaho olutaangira nibali mu sichiimi.

¹⁰Sino sya anyala ohusaangaasa abaandu alala neende abeemirisi baabwe, mani baleeta eseende ch'emisolo kyaabwe beechusa esanduuku elyo.

¹¹Buli ludaalo, Abaleefi bakiingaanga Esanduuku elyo mani baliyirira mulala hu bahoongo bomu bwaami owalichiingi neende obunyala hu lyeene elyo. Mani nilyeechulaanga, abasaati bomu bwaami neende abahiihirisi b'Abalaamisi Bahuluundu babukulaanga eseende echio bachitusa mu sanduuku elyo, mani bamala balikobosa mu bweyaango bwalyo. Mani banyala ohusolosa eseende enyiingi muno.

¹²Omutuki oyo neende Yehoyada baberesaanga eseende echio abaandu balichiingi neende omulimo kw'ohutereesa Enyuumba ya Nasaae, mani nibapaangisaanga ababaachi b'amakina, abaraandi b'embaao, neende abetaanyi b'ebibya ohuhola omulimo kw'ohutereesa okwo.

¹³Abaandu boosi baholaanga emirimo neende amaani muno, mani baanyala ohukobosa buyaaha Enyuumba ya Nasaae eyo koti lu yali hale, enyomiifu yeene.

¹⁴Ohutereesa huno nihwawa, esaabbu yadoong'aho, alala neende efeesa, byabereswa omutuki Yehoyada, owabyehoonyeraanga mu huhola ebbakuli, alala neende ebyehoonyerwa biindi eby'Enyuumba ya Nasaae. Koti lu Yehoyada, yali nasisiiriwo omulamu, ebiyaanwa byayanwaanga butoli-toli mu Nyuumba ya Nasaae.

¹⁵Nae niyamala ohwoola mu myaaka ky'obukofu muno, emyaaka emia ndala neende amahumi kadatu (130), yafwa.

¹⁶Bamusiiha mu ng'ani ch'obwaami mu Siko sya Daudi ohweekesa obulai bw'omulimo ku yali niyaholera abaandu ba Yisiraeli, Nasaae neende Enyuumba ya Nasaae.

¹⁷Nae Yehoyada niyamala ohufwa sa ati, abeemirisi ba Yuda bachaaka ohuserera Omutuki Yoasi achaake ohubawuliraanga boong'ene.

¹⁸Mani abaandu baakama ohwiinamiraanga mu Nyuumba ya Nasaae, y'Omwaami, Nasaae wa bakuuka yaabwe, mani nibachaaka ohwiinamiraanga ebiloongaloongwe, alala neende ebifwaanani bya Asera, nasaae muhasi. Omusaango kw'ebyonoono bino kwaleeta etima ly'Omwaami lyeehera hu Yuda neende Yerusalemu.

¹⁹Omwaami yatuma abanabbi ohubalabula bakobole, nae abaandu bahaya ohuwulira.

²⁰Bulaanu Mwooyo wa Nasaae yaniina Sakaria omwaana wa Yehoyada omulaamisi. Yachia yeema abuundu yi baandu boosi banyala ohumubona mani niyehuuma ati, “Omwaami Nasaae ali ohweteeba ati siina syeene esikera nimuhaya ohuwulira amalako kae, mani mweleetera sa amasira abeene! Eng'we mwamujwaang'a mani sakira yesi yabajwaang'a!”

²¹Omutuki Yoasi yesi yeyambaania mu huhoba Sakaria, mani naali huhulagira hw'omutuki abaandu bahuyira Sakaria amakina mu lwaanyi lw'Enyuumba ya Nasaae.

²²Omutuki oyo yeebirira obuhalaabani buwulisi bu Yehoyada laatang'ene Sakaria yali niyamuberesa, mani yaaleha Sakaria yeetwa. Mani koti lu Sakaria yali naafwa, yehuuma ati, “Omwaami ahoya yaabona sino syooli ohuhola mani ahusaandya wesi!”

²³Muhumaliiriha hw'omwaaka kweene okwo, eye lya Siria lyaseeta Yuda neende Yerusalemu, lyeeta abeemirisi boosi, mani bayaaya emyaandu mibitiirifu muno nibakobolayo nakyo mu Damasiko.

²⁴Eye lya Naili lyali sa ediidi, nae Omwaami niye owakanya bayiingira eye lya Yuda ehoongo muno, olwohuba abaandu bali nibamujwaang'a, Omwaami Nasaae wa bakuuka yaabwe. Mani mu ngeri yino Omutuki Yoasi yesi yoola ohusaandisibwa.

²⁵Yanyaaliha muno, mani eye ly'abasuku nilyeseenda lyaakobolayo, abahoongo bae babiri nibo abamweehoba mani baanyala ohuchia ohumwiita naali mu buliri bwae ohwetuunga ohwiitwa hw'omwaana wa Yehoyada omulaamisi. Yasiihwa mu Siko sya Daudi, nae ataali mu ng'ani ch'obwaami.

²⁶(Abamweehoba bali Sabbadi, omwaana w'omuhasi Mwaamooni olaangwa mbwe Simeati, neende Yehosabbadi, omwaana w'omuhasi Omumoabbu olaangwa mbwe Simiriti.)

²⁷Enomanoma hu sitabo sy'Abatuki niyo eyirimo engano ch'abaana ba Yoasi, obunabbi bumuchooma, neende ebyandiikwa bidiira hu hwoombaha hwae hw'Enyuumba ya Nasaae. Amasia omwaana wae niye owamukerama ohuba omutuki.