Read saamia 2 Ebyomubiha 25 Bible Online

2 Ebyomubiha 25 - saamia bible

2 Ebyomubiha 25

¹Amasia yeehaswa ohuba omutuki naali emyaaka amahumi kabiri neende kitaanu eky'obuhuluundu mani yaatukira mu Yerusalemu ohumala emyaaka amahumi kabiri neende kitaanu-na-kine. Ng'ina yali niye Yehoyadini ohutula mu Yerusalemu.

²Yaholaanga ebisaangaasa Omwaami, nae kata katyo yabiholaanga neende ohwekoyaania.

³Mani niyamala sa ati ohwomiisa obwaami bwae, yeeta abahoongo beeta laatang'ene.

⁴Kata katyo, haba siyeeteraho neende abaana baabwe daawe, nae yalondakanaanga neende bi Omwaami yali niyalagira mu Malako ka Musa mbwe: “Abeebusi haba sibahoyeere ohwiitwaanga hulw'emisaango kyaholwa neende abaana baabwe, haandi abaana sibahoyeere ohwitwaanga hulw'emisaango kyaholwa neende abeebusi baabwe; abaandu baneetwaanga hulw'emisaango ki beene baba nibaholere kyoong'ene.”

⁵Omutuki Amasia yatekeha abasaacha boosi b'enono chia Yuda neende Bbenjamini ohwiingira mu mikaanda ky'amaye, ohuloondakana neende enono chali echaabwe, mani naata abahoongo ohuhulira emikaanda eky'elifu neende eky'emia. Bano bali abo boosi abali emyaaka amahumi kabiri eky'obuhuluundu neende ohuhirao, boola elifu emia chidatu (300,000) alala. Bali amaye madoolemo, ameetekefu ohulwaana ebiita, amabalabalanu mu hwehoonyera amafumo neende engabo.

⁶Ohumeedaho, haandi yapaangisa abanamaye elifu emia ndala (100,000) ohutula mu Yisiraeli hu bbei ya aambi w'etaani chine ech'efeesa.

⁷Nae omunabbi wuundi yasiingira mani yaachia eyiri omutuki oyo mani yaamuboolera ati, “Ewe otachiana neende abanamaye Abaisiraeli bano daawe. Omwaami haba saali neende abaandu bano ohutula mu Bwaami bw'Emukulu.

⁸Ewe onyala ohuba n'obaasa oti abo bachia ohukera obe neende amaani maangi mu biita, nae Nasaae niye oli neende obunyala ohukaba obuyiingiri kata neende ohuhira, mani niye ochia ohukera abasuku bahuyiingire.”

⁹Amasia nae yateeba omunabbi oyo ati, “Nae efeesa eyo yoosi yinaaba yitye, yimalire ohubatuunga?” Omunabbi oyo nae yakobolamo ati, “Omwaami anyala ohuhukoboserao ebihira ebyo byoosi!”

¹⁰Mani Amasia yakobosayo engo eye lyali epaangise elyo. Ao, eye elyo lyeekobolerayo engo, nilinyoolereere abaandu ba Yuda ebilulu.

¹¹Amasia yefuutamo amaani mani yeemirira eye lyae ohuchia mu Hoondo ly'Omuunyu. Ebweene eyo, banyala ohulwaana mani beeta abanamaye Abaedomu elifu ehumi (10,000).

¹²Bawaamba abaandi abalamu elifu ehumi (10,000). Bayira ababoye abo aakulu w'olwaneendea lwooki oluli mu siko sya Sela mani nibabaakusaanga ohutula ohwo, nibafwiraanga hu makina kali aasi ao.

¹³Esiha syeene esyo, abanamaye Abaisiraeli ba Amasia yali naakanyire ohuchia mu biita nabo, baseeta ebiko bya Yuda ebyali akatikaati wa Samaria neende Bbeeti Horooni, mani nibeeta abasaacha elifu chidatu (300), haandi nibanyala ohupeeya ebipeeye obuduhunyi.

¹⁴Amasia niyakobola engo naatula ohuyiingira Abaedomu, yakobosa engo ebiloongaloongwe byaabwe, mani n'abiteengeha nibyeema, n'abinamira, haandi n'abinioohesera obubbaani.

¹⁵Sino syanyoolesa Omwaami, mani yaatuma omunabbi eyiri Amasia. Omunabbi wuno yateeba ati, “Ewe, siina syeene esikerere wenamira banasaae bakeni abatahanyala kata ohuwonia abaandu baabwe abeene ohutula hu maani kao ako?”

¹⁶Amasia yeengiramo ati, “Ohutula liina bweene, lu efwe hwahuhola ohubeechaanga omukeraki w'omutuki? Leherao neende ohulomaloma, ataali ao, ese njia ohuhwiita-bwiita!” Omunabbi oyo yalehera abweene ao ohulomaloma nae yali n'amalire ohuboola ati, “Ese bulaanu mbao manyiire elalira endi hane Nasaae amalire ohuheengao ohuhusihirisira elalira olwohuba oli ohuholaanga bino byoosi nae waahaya ohuloonda amakerako kaange.”

¹⁷Omutuki Amasia owa Yuda, alala neende abakeraki bae beehobera Yisiraeli. Mani yaatuma emboosi yichiire Omutuki Yehoasi wa Yisiraeli, owali omwaana wa Yehoahasi haandi omwiichuhulu wa Yehu, n'amuseenda-seenda alwaane ebiita.

¹⁸Yehoasi yatuma amakaluso kae eyiri Amasia ati: “Olwoola, ahawa haandi ahomusiino muungulu cha Lebbanooni hatuma emboosi yichiire omuseengese yiti: ‘Ewe lehuulaho omuhaana wao mulala yeeche adeehere omwaana waange.’ Esolo y'omusiino yiindi yali yosi niyibitira ebweene eyo mani yaseenakira esiino elyo.

¹⁹Bulaanu, ewe Amasia, oli ohwepahaanga mbwe wanyala ohuyiingira Abaedomu, nae ese ndi ohuhukerakiraho endi weeyihalire ango wao wedeemberese. Siina syeene esikera wasaangulusa ebidinyu ebichia ohuhuleetera amasira sa, ewe alala neende abaandu bao boosi?”

²⁰Nae Amasia yahaya ohutekeeresa. Hwali ohudaha hwa Nasaae mbwe Amasia anyale ohuyiingirwa, olwohuba yali niyenamiire ebiloongaloongwe bya Edomu.

²¹Omutuki Yehoasi owa Yisiraeli yachia mu biita ohulwaania Omutuki Amasia wa Yuda. Babukaananira mu Bbeti Semeesi mu Yuda,

²²eye lya Yuda mani lyayiingirwa, mani abanamaye beeyiruhira beekobolerayo engo waabwe.

²³Yehoasi yaamba Amasia mani yaamuyira mu Yerusalemu. Niyoola ebweene eyo, yalikula esida sy'esiko esyo ohutulira elalira hu Siruwa silaangwa esya Efuraimu, ohwoola hu Siruwa silaangwa esy'Esoonda olukeendo luyera emiita emia chibiri.

²⁴Yakobosa engo mu Samaria ebipeeye byoosi by'esaabbu, neende efeesa ebyali mu Nyuumba ya Nasaae, ebyehoonyerwa by'Enyuumba ya Nasaae ebyaliindwa neende abeechuhulu ba Obbedi-Edomu, alala neende obuyiinda bwomu dooho. Yaamba neende abaandu baandi.

²⁵Amasia omutuki wa Yuda yayiindira yaahiraho Yehoasi omutuki wa Yisiraeli neende emyaaka ehumi neende kitaanu.

²⁶Ebiindu biindi byoosi bi Amasia yahola ohuchaakira hu njaako ohwoola hu njakamo y'obwaami bwae, byandiikwa mu sitabo silaangwa mbwe Ebyaliwo by'abatuki ba Yuda neende Yisiraeli.

²⁷Ohutulira elalira hu siha si yehalakiraho ohutula hu Omwaami, yaliwo olukwe lwamuliho mu Yerusalemu. Munjakamo, yoola yeeruha yaachia mu siko sya Lakisi, nae abasuku bae bamuloondaho ebweene eyo mani baamwiitirayo.

²⁸Omubiri kwae kwakiingwa kwaakaluswa mu Yerusalemu hu mukoongo kw'efaraasi, mani yasiihwa mu ng'ani ch'obwaami mu Siko sya Daudi.