Read saamia 2 Ebyomubiha 31 Bible Online

2 Ebyomubiha 31 - saamia bible

2 Ebyomubiha 31

¹Esidyaalo esyo nisyawa, abaandu boosi ba Yisiraeli bachia mu buli siko siri mu Yuda nibalikula amakutu k'amakina, haandi nibatemaatema ebifwaanani by'Asera nasaae muhasi, haandi nibasihirisa alutaari neende ebituundu bikafiiri by'ohwiinamiraangamo. Haandi bahola batyo mu Yuda mwoosi, neende mu byaalo bya Bbenjamini, Efuraimu, neende Manaase; mani baamala beekobolera engo.

²Omutuki Hesekia yakobosao endekeha y'Abalaamisi neende Abaleefi, mu buli otula yalichiingi neende omulimo kwae ku yedeeka. Kino mirimo kyali koti ohuyanaangayo ebiyaanwa bisaambe, haandi neende ebiyaanwa by'ohuholegana, ohuchiraanga alala mu hwiinamiraanga Nasaae hw'Omunyuumba ya Nasaae omwo, haandi neende ohupakiraanga neende ohwebasiraanga mu bituundu bikabuhaane ebyomu Nyuumba ya Nasaae eyo.

³ Ohutula mu byaayo byae omweene haandi mu bidwooli byae, yobbaanga ebisolo by'ebiyaanwa bisaambwa buli chuli, neende buli ngoloobe, haandi neende ebyo ebyayanwaanga buli ludaalo lwa Sabbaato, neende buli Sidyaalo sy'Omwoosi Muyaaha, haandi hu bidyaalo byahoyerwaanga neende Amalako k'Omwaami.

⁴ Mu humeeda ohwo, omutuki haandi yaboolera abaandu ba Yerusalemu ohuleetaanga ebiyaanwa bi balaamisi neende Abaleefi balichiingi nibahoyerwa oyiraanga, hu banyale ohuyanaangayo obweyaango bwaabwe bwoosi ohuholaanga ebihoyera by'Amalako k'Omwaami.

⁵Esiha syeene si lako elyo lyatusirwamo, abaandu ba Yisiraeli bachaakiraniramo ohuleetaanga ebiyaanwa by'emere yaabwe eyisereecherwe, efiini, amafuta k'enaasi, obuuhi, alala neende ebilime by'emikuunda, haandi baamala baletaanga silala sy'ehumi sya buli siindu sibabeechaanga nasyo.

⁶Abaandu boosi abali nibamenya mu biko bya Yuda, baletaanga bilala by'ehumi by'eng'oombe chaabwe, neende amakoondi, haandi baleetaanga ebiyaanwa bibitiirifu, bi bawechaangayo eyiri Omwaami Nasaae waabwe.

⁷Ebiyaanwa bino byachaaka ohwoolaanga ao mu mwoosi kwa hadatu, mani byemeeda ohwebuunjiha ohumala emyoosi kine kyaloondaho emilaamba.

⁸Omutuki Hesekia neende abahoongo bae nibabona obuungi bw'ebiindu byali nibileeterwe, bapaaka Omwaami haandi bapaaka neende abaandu bae ba Yisiraeli.

⁹Omutuki oyo yalomalomera abalaamisi abo neende Abaleefi abo ebiindu bidiira hu biyaanwa bino,

¹⁰haandi Asaria Omulaamisi Muhuluundu, owali omwiichuhulu wa Sadoki, yamuboolera ati, “Koti lu baandu bachaakire ohuleetaanga ebiyaanwa byaabwe mu Nyuumba ya Nasaae, yibeere bulaanu niyiriwo ebyohulya bimala ohulya, haandi neende ebidoong'aho ebibitiirifu. Bulaanu mbano huli neende ebiindu bino byoosi, olwohuba Omwaami niye onyalire ohuberesaanga abaandu bae bano ehabi.”

¹¹Ohweema hu lako ly'omutuki oyo, boombaha ebiseenge bibiihwamo ebiindu abuundu w'Enyuumba ya Nasaae ao

¹²mani baamala batechaangamo ebiyaanwa ebyo byoosi, alala neende bilala by'ehumi ohweliindiraanga omwo bulai. Bataao Omuleefi olaangwa mbwe Konania ohubeechaanga neende obunyala bwabyo, haandi baahola Simei mwanaang'ina ohuba omuhoonyi wae.

¹³Abaleefi ehumi babereswa omulimo kw'ohuholeraanga aasi w'abeene bano boombi bati: Yehieli, Asasia, Nahati, Asaheeli, Yerimooti, Yosabbaadi, Elieli, Yisimakia, Mahati, neende Bbenaya. Bino byoosi byeehola bityo aasi w'obunyala bw'Omutuki Hesekia neende Asaria Omulaamisi Muhuluundu.

¹⁴Koore omwaana wa Yimina, Omuleefi owali omuliindi muhunuufu, hu Siruwa sy'Ebukwe esy'Enyuumba ya Nasaae, niye owali neende obunyala obw'ohwakaaniraanga ebiyaanwa bino ebiyaanirwe eyiri Omwaami, haandi neende ohubikabulaangamo.

¹⁵Mu biko biindi bi balaamisi baandi balichiingi nibamenyamo, yahoonywaanga neende obweesikwa bweene neende Abaleefi bano: Edeni, Miniamini, Ysua, Semaya, Amaria, neende Sekania. Bakabulaangamo ebyohulya nibaakaniirisa Abaleefi basyaabwe ohuloondakana neende koti omulimo bwaabwe bwalichiingi nibuli,

¹⁶ataali ohuchiira hu nono koti lu chiri daawe. Bakabaanga omukabo kw'abesisaacha boosi abali neende emyaaka amahumi kadatu n'ohuhiraho, abalichiingi neende emirimo ki bahola buli nyaanga mu Nyuumba ya Nasaae, ohuloondakana neende obuhoongo bwaabwe.

¹⁷Abalaamisi babereswaanga emirimo kyaabwe ohuloondakana neende enono chaabwe, nae Abaleefi abalichiingi nibali neende emyaaka amahumi kabiri neende ohuhirao, nibo ababereswaanga emirimo kyaabwe mu mikaanda.

¹⁸Boosi balichiingi nibaandiikisirwa alala neende abahasi baabwe, abaana baabwe, alala neende abeyikami baandi, olwohuba bali nibahoyerwa ohubeechaanga abeetekefu ohuholaanga emirimo kyaabwe myoolerefu esiha syoosi.

¹⁹Mu balaamisi balichiingi nibamenyaanga mu biko byabereswa abeechuhulu ba Arooni, oba mu byaalo by'enjairo balichiingi ebyohu biko ebyo, yalichiingiyo abasaacha ab'omulimo abakabaanga ebyohulya ebyo eyiri ab'esisaacha boosi abali mu madaala k'abalaamisi, haandi neende eyiri buli muundu owalichiingi hu muhunu kw'enono y'Abaleefi.

²⁰Ohumalaho Yuda yoosi, Omutuki Hesekia yaholaanga ebihoyera, haandi ebyalichiingi nibisaangaasa Omwaami Nasaae wae.

²¹Yabitaangamo, olwohuba buli siindu si yaholeraanga Enyuumba ya Nasaae, kata sa neende mu huloondakana neende Amalako ka Nasaae, yaholeraanga mu mwooyo kw'obutiiririrwa bwoosi, neende ohweyaanayo hwoosi eyiri Nasaae wae.