Read saamia 2 Ebyomubiha 36 Bible Online

2 Ebyomubiha 36 - saamia bible

2 Ebyomubiha 36

¹Abaandu ba Yuda badoola Yoahaasi omwaana wa Yosia mani baamuchuhaho amafuta nibamwiihasa ohuba omutuki mu Yerusalemu.

²Yoahaasi yali naali emyaaka amahumi kabiri neende kidatu (23) eky'obuhuluundu niyeehaswa ohuba omutuki wa Yuda, mani yaatuka mu Yerusalemu ohumala embaka y'emiosi kidatu.

³Omutuki Neko owa Misiri yamuwaamba mani yaamuhola omuboye wae mani yaayika Yuda ohutuunga etaani chidatu neende ekiloguraamu emia chine (3,400) ech'efeesa neende ekiloguraamu amahumi kadatu neende chine ech'esaabbu koti esy'ohwiichulisirwaho.

⁴Neko yahola Eliakimu mwanaang'ina Yoahaasi ohuba omutuki wa Yuda mani yaakaluuhania eliita lyae lyaaba Yehoyakimu. Yoahaasi yayirwa mu Misiri neende Neko.

⁵Yehoyakimu yali naali emyaaka amahumi kabiri neende kitaanu eky'obuhuluundu niyeehaswa ohuba omutuki wa Yuda, mani yaanyala ohutukira mu Yerusalemu ohumala embaka y'emyaaka ehumi neende mulala. Yonoona mu moni w'Omwaami Nasaae wae.

⁶Omutuki Nebukadineesa owa Bbabbilooni yaseeta Yuda, yamuwaamba Yehoyakimu, yamuyira mu Bbabbiloonia n'amuboyere mu minyororo.

⁷Nebukadineesa yakiinga yaayira obuyiinda buundi bwoomu Nyuumba ya Nasaae, mani yaabuta mu dooho lyae mu Bbabbilooni

⁸Buli siindu si Yehoyakini yahola, n'oteereho neende ebiholwa byae bisinyisa, neende ebyonoono bi yahola, byoosi byandiikwa mu sitabo silaangwa mbwe, Ebyaliwo by'abatuki ba Yisiraeli neende Yuda. Yehoakini omwaana wae niye owamukobola mu makulu koti omutuki.

⁹Yehoyakini yali naali emyaaka ehumi neende kitaanu-na-kidatu eky'obuhuluundu nibamwiihasa ohuba omutuki wa Yuda, mani yaanyala ohutukira mu Yerusalemu ohumala embaka y'emyoosi kidatu neende endaalo ehumi. Yesi yonoona mu moni w'Omwaami

¹⁰Mani etoocho niyoola, Omutuki Nebukadineesa yabukula Yehoakini mani yaamuyira mu Bbabbilooni koti omuwaambe mani haandi yayaaya emyaandu ky'Enyuumba ya Nasaae. Bulaanu, Nebukadineesa yahola Sedekia laatang'ene Yehoakini wuundi yaaba omutuki wa Yuda neende Yerusalemu.

¹¹Sedekia yali naali emyaaka amahumi kabiri neende mulala (21) eky'obuhuluundu niyeehaswa ohuba omutuki wa Yuda, mani yaanyala ohutukira mu Yerusalemu ohumala embaka y'emyaaka ehumi neende mulala.

¹²Yesi yonoona mu moni w'Omwaami haandi yaahaya ohutekeeresa neende obuloonga bi Yeremia omunabbi owalomalomaanga emboosi y'Omwaami yaboola.

¹³Sedekia yeehalaka hu Mutuki Nebukadineesa, owali namuyikire ohweechubira mu liita lya Nasaae ati achia ohumuwuliraanga. Yahayuha sa neende esyeejo, mani yaahaya ohweeyama mani yaakobola eyiri Omwaami, Nasaae wa Yisiraeli.

¹⁴Ohumeeda ohwo, abeemirisi ba Yuda, abalaamisi, neende abaandu baandi boosi baloondakanaanga neende ebiholwa bibi by'ebyaalo biindi ebyabebodoohania, mu hwiinamiraanga ebiloongaloongwe, mani katyo baabaha omukwoobo Enyuumba ya Nasaae, yi Omwaami mweene yahola yaaba enjoolerefu.

¹⁵Omwaami, Nasaae wa bakuuka yaabwe, yali niyemeeda ohutumaanga abanabbi ohulabulaanga abaandu bae, olwohuba yali naadaha ohubawonia alala neende Enyuumba ya Nasaae.

¹⁶Nabo bakachulaanga sa bawamwaanda ba Nasaae, nibalekeeresa emboosi chae, haandi nibacheha abanabbi bae, ohwoola luunyuma bweene lu tima ly'Omwaami eyiri abaandu bae lyali ebitiirifu muno li muundu atahanyala ohuwonamo.

¹⁷Mani Omwaami yaaleeta omutuki wa Bbabbilooni ohubaseeta. Omutuki oyo yeeta abasaacha baraaga ba Yuda, kata neende abali mu Nyuumba ya Nasaae. Yahaya ohudiiriraho esisa omuundu yeesi, omuyere kata omuhuluundu, omusaacha kata omuhasi, omulwaae kata omulamu. Nasaae yata boosi mu mahono kae.

¹⁸Omutuki wa Bbabbilooni yayaaya Enyuumba ya Nasaae, obuyiinda bwomu Nyuumba ya Nasaae, haandi neende emyaandu ky'omutuki alala neende abahoongo bae, mani yaayira buli siindu engo wae mu Bbabbilooni.

¹⁹Yasaamba Enyuumba ya Nasaae alala neende esiko esyo byoosi byaweera aasi, alala neende amadooho kasyo, neende emyaandu kyasyo, mani yaalikula esida sy'esiko syaweera aasi.

²⁰Yayira abawoniao boosi mu Bbabbilooni, yi bamuhalaabaniraanga neende abeechuhulu bae koti abawaambe ohwoola mu husiingira hw'Obwaami bwa Perisia.

²¹Mani katyo, ebiindu bi Omwaami yalakula naabitira mu munabbi Yeremia byoolerera biti: “Esyaalo sino sichia ohudoong'a ekuunda ohumala embaka y'emyaaka amahumi kataanu-na-kabiri (70), ohwooseresa ohuwuluuha hwa Sabbaato yali niyisisiiri ohuhuswaho.”

²²Mu mwaaka kwataangira ku Sairasi wa Perisia yali omwaami, Omwaami yahola esyo si yali niyalomaloma ohubitira mu munabbi Yeremia syolerera. Yahola Sairasi ohutusa elako liloondaho lino mani yaamala yaalitusa mu bwandiike lisomweenge lukali buli abuundu mu bwaami hwae bwoosi buti:

²³ “Lino nilyo elako lya Sairasi, Omwaami wa Perisia. Omwaami, Nasaae wo Muukulu, niye owaahola ndoola ohuba omutuki w'esyaalo syoosi, mani niye owumbereese obunyala bw'ohumwoombahira Enyuumba ya Nasaae mu Yerusalemu mu Yuda. Bulaanu, eng'we mweesi abali abaandu ba Nasaae, muchie eyo, mani Omwaami Nasaae weeng'we ahoya yaaba naang'we.”