Read saamia 2 Ebyomubiha 6 Bible Online

2 Ebyomubiha 6 - saamia bible

2 Ebyomubiha 6

¹Bulaanu, Omutuki Solomooni yasaba ati, “Ewe Omwaami, omweene waheengao ohumenya mu maleesi neende mu siirima.

²Bulaanu ese naange hwoombahiire enyuumba y'oluyaali, ohuba abuundu wao w'ohumenyaangamo endaalo choosi.”

³Abaandu ba Yisiraeli boosi bali nibeemere abweene ao. Omutuki oyo bulaanu yakaluuhana mani yaabatingaala mani yaasaba Nasaae ababerese ehabi.

⁴Yaboola ati, “Omwaami afumisibwe, Nasaae wa Yisiraeli! Yosereese esisuubise si yasuubisa Daudi laata koti lu yamuboolera ati,

⁵Ohutula esiha sindatusa abaandu baange mu Misiri ohwoola esiha sino, ese haba sindadoolaho esiko syoosi mu syaalo sya Yisiraeli ohuba abuundu w'ohwoombaha Enyuumba ya Nasaae, yi mba niinjia ohwiinamirwaangamo, haandi haba sindadoolaho omuundu yeesi ohwiimiriraanga Yisiraeli abaandu baange daawe.

⁶Nae bulaanu, ese ndoolereo Yerusalemu ohuba abuundu yi njia ohwiinamirwaangao, neende ewe Daudi, ohutukaanga abaandu baange.”

⁷Haandi Solomooni yemeeda ohuboola ati, “Daudi laata niye oweetekeha ohwoombaha Enyuumba ya Nasaae ohwiinamiraangamo Omwaami Nasaae wa Yisiraeli,

⁸nae Omwaami yamuboolera ati, ‘Ewe wali owadyeeri muhudaha ohuunyoombahira enyuumba,

⁹nae ewe haba siniiwe ochia ohwoombaha daawe. Omusyaani wao, omwaana wao mweene, niye ochia ohwoombaha enyuumba yaange eyo.’

¹⁰“Bulaanu, Omwaami mbao hane yosereese esisuubise syae: Ese mbano niise owakaluha laata mu makulu hu sisaala sy'obutuki bwa Yisiraeli, haandi nyalire ohwoombaha Enyuumba ya Nasaae ey'ohwiinamiraangamo Omwaami Nasaae wa Yisiraeli.

¹¹Ese malire ohuta Esanduuku ly'Endagaano mu Nyuumba ya Nasaae, elirimo ebituundu by'amakina k'endagaano yi Omwaami yahola neende abaandu ba Yisiraeli.”

¹²Mani mu moni w'abaandu bano, Solomooni yeema mu moni w'alutaari, mani n'asiingisa amahono kae aakulu ohulaama.

¹³(Solomooni yali niyahola esiduuti sy'omugasa, mani niyasita akatikaati w'olwaanyi. Syali nisiri emiita chibiri neende otutoonyese tubiri (2.2) embeka choosi, nae emiita ndala neende otutoonyese tudatu (1.3) ohuniina aakulu. Yaniina hu siduuti sino, yaasigama aasi, abuundu yi buli muundu yali naanyala ohumubona bulai, mani yaasiingisa amahono kae aakulu eyiri ekulu.)

¹⁴Yalaama ati, “Ewe Omwaami, Nasaae wa Yisiraeli, muukulu mwoosi, haandi neende mu syaalo mwoosi abulao nasaae oli koti ewe. Ewe wooseresaanga endagaano yao neende abaandu bao haandi obeekesaanga obuheeri bwao nibamenya mu buwulisi bw'omwooyo mulala.

¹⁵Ewe woosereese abweene esisuubise si waholera Daudi laata; mani enyaanga yino yeene buli mboosi yolereere abweene.

¹⁶Bulaanu, ewe Omwaami, Nasaae wa Yisiraeli, yoseresa haandi esisuubise siindi sira si waholera laata lu wamuboolera oti ohwoola yinabeechangao mulala hu beechuhulu bae onabeechaanga koti omutuki wa Yisiraeli, nibaneliindaanga nibeesa oluyaali mu Malako kao koti lu mweene yaholaanga.

¹⁷Mani bulaanu, ewe Omwaami, Nasaae wa Yisiraeli, leha buli siindu syoosi si wasuubisa Daudi omuhalaabani wao syoolerere.

¹⁸ “Nae chana, mani ewe onyala, ewe Nasaae waange, mubwadyeeri bweene ohumenya hu syaalo huno mu basaacha neende abahasi bano sa? Ewe kata ekulu lyoosi haba sihoongo lihumala daawe, nae Enyuumba ya Nasaae yino, yi nyombaahe, yinyala ohuba ehoongo yi humala?

¹⁹Ewe Omwaami Nasaae waange, ese ndi omuhalaabani wao. Wulira esaala yaange wuungobolemo bino biindi ohuhusaba.

²⁰Liindaanga Enyuumba ya Nasaae yino esiro neende esideete. Ewe omweene niiwe owasuubisa oti ano niwo y'ochia ohwiinamirwaangamo, mani mbulireenge buli lundatingaalaanga ena Nyuumba ya Nasaae yino ninaama.

²¹Wuliraanga ohulaama hwaange, haandi neende ohulaama hwa Yisiraeli abaandu bao nibanalingalaanga eno mani balaama. Nooli engo wao eyo muukulu, tuwulireenge mani otuleheraanga.

²²“Abaandu bano nibanaabirwaanga emisaango eky'ohukoseraanga abasyaabwe, haandi kata nibanaleetwaanga hu alutaari yao yino mu Nyuumba ya Nasaae muno ohwechuba bati babulaho omusaango,

²³Ewe Omwaami, tekeereseraanga muukulu eyo mani okaya abahalaabani bao bano. Boneresaanga abali neende emisaango koti lu baba nibahoyera, nae olehuuleenge ababulaho omusaango.

²⁴“Yisiraeli abaandu bao bano nibayiingirwaanga neende abasuku baabwe olwohuba mbwe banyala ohuba nibonoonere yooli, mani nibanyala bakaluuhana beecha yooli haandi, mani beechaanga ena nyuumba ya Nasaae yino, nibahwekweeda neende ohweota, obaleheraanga,

²⁵bawulireenge nooli eyo Muukulu. Leheraanga ebyonoono by'abaandu bao bano mani obakobosa engo ano mu syaalo si wababeresa neende bakuuka yaabwe.

²⁶“Noneekaliraanga efula hulw'abaandu bao nibaba nibonoonere mu moni wao, mani nibeeyolobyaanga mani batingaala eno eyiri Enyuumba ya Nasaae yino, nibekweeda nibeyoloobye,

²⁷Ewe Omwaami waange, bawulireenge nooli eyo muukulu mani oleheraanga ebyonoono by'abahalaabani bao, Yisiraeli abaandu bao, mani obeekesa ohuholaanga ebihoyera. Mani Ewe Omwaami, otuma efula hu syaalo syao sino, si ewe omweene waberesa abaandu bao ohuba koti esyaabwe abeene endaalo choosi.

²⁸“Esiminyu nisinakwichaangao mu syaalo sino, kata sa oluumbe, kata sa ebilime nibinyaasibwa neende emboo yimamula, kata sa ebidiiyiha by'esike, kata neende abaandu bao bano nibanaseetwaanga neende abasuku baabwe, kata sa oluumbe, kata sa amachuuni koosi nikabakwaamo,

²⁹wuliraanga ohulaama hwaabwe. Nabaao kata mulala hu Yisiraeli abaandu bao, niyeema hu ngisa y'omumwooyo, n'abaambulaanga amahono kae, yasaba n'alingiisye eno mu Nyuumba ya Nasaae yino,

³⁰wuliraanga ohulaama hwaabwe. Batekeereseenge nooli ewao eyo muukulu mani obalehera. Olwohuba ewe weeng'ene niiwe omanyire ebibaaso by'emyooyo ky'abaandu. Bisaanga buli muundu koti lwaaba naahoyera,

³¹hu baandu bao banyale ohuhwiisaangamo oluyaali neende ohuhuwulira ebiha byoosi bi bachia ohubeechaanga nibamenya mu syaalo si ewe omweene waberesa bakuuka yeefwe.

³²“Nae abateende bamenya eyale nibachia ohuwulira koti lu oli omuhunuufu w'amaani haandi oli omweetekerefu esiha syoosi ohuholerao, mani bosi beecha ohuhwiinamira mu Nyuumba ya Nasaae yino,

³³wuliraanga ohulaama hwaabwe bosi. Muukulu eyo yi wamenya, bawulireenge mani obaholeraanga bi baba nibadahire obaholere, hu baandu boosi aboohu syaalo huno banyale ohuhumanya haandi ohuhuwuliraanga, koti lu Abaisiraeli abaandu bao baholaanga. Ao niwo yibahamanyire bati Enyuumba ya Nasaae yino yi nyombaahe nimwo mu ohoyeere ohwiinamirwaangamo.

³⁴“Nae nonalagiraanga abaandu bao ohuchia mu biita neende abasuku baabwe, mani bahusaba, yi baba nibanabeechaanga yoosi, nibatingaala ena siko sino si mweene wedoolera, haandi neende ena Nyuumba ya Nasaae yino yi hwoombahiire,

³⁵wuliraanga ohulaama hwaabwe. Bawulireenge nooli eyo muukulu mani obaberesaanga obuyiingiri.

³⁶“Nae abaandu bao nibanonoonaanga yi oli, haandi abulao oyo yeesi otanyala ohwonoona mani mu tima lyao waanyala ohuleha abasuku baabwe baabayiingira mani babaamba baabayira koti ababoye mu syaalo siindi sa, kata neende esyaalo koti esyo sinabeechaanga nisi esy'eyale muno,

³⁷wuliraanga ohulaama hw'abaandu bao sa. Nikali mbwe ebweene eyomu syaalo esyo banyala ohweyolobya mani bahulaama, nibeeyolobya koti lu bali abonooni, haandi abamayaanu, wuliraanga ohulaama hwaabwe, Ewe Omwaami waange.

³⁸Nikali mbwe mu syaalo bweene omwo banyala ohweyolobya mubwadyeeri bweene, mani bahulaama nibatingaalire ena syaalo sino siwakaba bakuuka yeefwe, esiko sino si mweene wedoolera, haandi ena Nyuumba ya Nasaae yino yi hwoombahiire,

³⁹ao wuliraanga ohulaama hwaabwe ohwo. Nooli engo wao muukulu, bawulireenge mani obakwiira esisa, mani obalehera ebyonoono byoosi ebyo eby'abaandu bao abo.

⁴⁰“Bulaanu, Ewe Nasaae waange, tutingaale owulire ohusaba hu huholera abuundu ano.

⁴¹Siingira, ewe Omwaami Nasaae, mani niwehoonyera Esanduuku ly'Endagaano, esilolero sy'obunyala bwao, yingira mu Nyuumba ya Nasaae yino mani omenyemo ano endaalo choosi pe. Beresaanga abalaamisi bao ehabi mu buli siindu sibahola, mani abaandu bao boosi bahoya beehoya hulw'obulai bwao yibali.

⁴²Ewe Omwaami Nasaae waange, otajwaang'aanga omutuki yooba niwedoolera omweene. Yichulisaanga obuheeri bu wali nabwo eyiri Daudi omuhalaabani wao.”