Read saamia 2 Ebyomubiha 8 Bible Online

2 Ebyomubiha 8 - saamia bible

2 Ebyomubiha 8

¹Byabukula Solomooni emyaaka amahumi kabiri emilaamba ohwoombaha Enyuumba ya Nasaae neende edooho lyae.

²Haandi yoombaha ebiko bi Omutuki Hiramu yali niyamukaba, mani yaatuma Abaisiraeli ochia babimenyemo.

³Yaamba esyaalo sya Hamati neende Soobba

⁴haandi yaasitira olukoba hu Palimia esiri mu siparara. Yoombaha ebiko byoosi ebyali mu Hamati ebyalichiingi ebyaaki by'ohubiihamo ebiindu byehoonyerwa.

⁵Haandi Solomooni yoombaha ebiko biloondaho bino: Bbeeti Horooni Emukulu, neende Bbeeti Horooni Emwaalo (haandi yoombahira engoba hu biko, haandi yataaho enjiki chinyala ohwehiinga),

⁶esiko sya Bbalaati, ebiko byoosi bi yabihaangamo ebyehoonyerwa, haandi neende ebiko bi faraasi chae neende ebigaari byachio byali byabiihwa. Yooseresaanga endekeha chae choosi ech'ohwoombaha naali mu Yerusalemu, mu Lebbanooni, neende mu syaalo syoosi siyatukaanga.

⁷Abaandu boosi bali nibadoong'aho hu Abahiiti, Abaamoori, Abaperisi, Abahiifi, neende Abayebbusi, abatalichiingi Abaisiraeli,

⁸ohutulira elalira hu bakuuka yaabwe abalichiingi nibadoong'a mu syaalo esyo, b'abaandu ba Yisiraeli bali nibatasihirisa. Bano boosi Solomooni yabayiikaanga ohuholaanga emirimo ky'obuwaambe, koti lu bisisiiri ohwoola buti.

⁹Abaisiraeli haba sibehoonyerwaanga ohuhola emirimo ky'obuyiike daawe, nae baholaanga koti abanamaye, abahoongo, abahulira ebigaari, neende abalwaanira hu faraasi.

¹⁰Bano boosi bali emia chibiri neende amahumi kataanu (250) abahoongo b'abahalaabani b'obuyiike, abaholaanga hu mirimo kikabuhaane.

¹¹Solomooni yakiinga omuhasi wae, owali omuhaana w'omutuki wa Misiri, yaamutusa mu Siko sya Daudi mani yaamuyira mu nyuumba yi yali niyamwoombahira. Yaboola ati, “Omuhasi wuno haba sahooyere ohumenya mu dooho lya Daudi Omutuki wa Yisiraeli daawe, olwohuba buli abuundu yi Sanduuku ly'Endagaano yabeechaanga yalichiingi awoolerefu.”

¹²Solomooni yatusira ebiyaanwa eyiri Omwaami hu alutaari yi yali niyoombaha mu moni w'Enyuumba ya Nasaae.

¹³ Yayaanayo ebiyaanwa bisaambwa ebichiaana neende ebidahibwa by'Amalako ka Musa hu buli ludaalo lwoolerefu koti: Sabbaato, Ebidyaalo by'Omwoosi Muyaaha, haandi ebidyaalo bidatu ebyabuli mwaaka nibyo: Esidyaalo sy'Omugaati kutaali omubbaahe, Esidyaalo sy'Ekesa, haandi neende Esidyaalo sy'Ebikaali.

¹⁴Ohuloondehana neende amalako kateebwao neende Daudi laatang'ene, yatekeha emirimo kya buli nyaanga eky'abalaamisi, haandi neende eky'Abaleefi abahoonyaangaho abalaamisi mu hweembaanga enyembo cha Nasaae, haandi neende mu huholaanga emirimo kyaabwe kyeene.

¹⁵Enjekesa yi Daudi yali niyaberesa abalaamisi alala neende Abaleefi eyidiira hu nyuumba ch'ebyaaki, haandi hu biindu biindi babiholeraanga elalira nibiwaayo byoosi.

¹⁶Esiha sino Emirimo kya Solomooni kyoosi kyali nikiweere. Ohuchaakira elalira hu huyaba omusiingi kw'Enyuumba ya Nasaae y'Omwaami, ohwoola hu huyimaliirisa, omulimo kwoosi kwali omulai muno.

¹⁷Bulaanu Solomooni yachia mu Esionigebberi neende mu Eloti, ebikobero byalichiingi hu lwaasi lw'omusoma kwa Akabba, mu syaalo sya Edomu.

¹⁸Omutuki Hiramu yamutumira emeeri echiri aasi w'obunyala bw'abahoongo bae beene alala neende abeerusi b'emeeri bamanyirifu. Basyaabalira alala neende abahoongo ba Solomooni owoolera elalira hu syaalo sya Ofiri mani baakobosera Solomooni aambi etaani ehumi neende chitaanu ech'efeesa.