Read saamia Esira 3 Bible Online

Esira 3 - saamia bible

Esira 3

¹Mu mwaaka kwa hataanu-na-habiri, abaandu ba Yisiraeli bali boosi nibamalire ohumenya mu biko byaabwe. Boosi bebuusira mu Yerusalemu,

²mani Yosua omwaana wa Yehosadaki, abalaamisi baasye, neende Serubbabbeli omwaana wa Seyalitieli, alala neende abeeho bae, bachaaka ohwoombaha haandi buyaaha alutaari ya Nasaae wa Yisiraeli, hu banyale ohusaambiraangaho ebiyaanwa koti lu bilagiro byandiikwa mu Malako ka Musa, omuundu wa Nasaae byali.

³ Kata katyo, abeeruha bali nibali ohukobolaanga beecha baatya muno abaandu bali nibamenya mu syaalo omwo, baanyala ohwoombaha buyaaha alutaari abuundu yi yali niyoombahwa hale. Mani beemao bachaaka haandi ohusambiraangaho ebiyaanwa byali ebya buli ludaalo, echuli neende engoloobe.

⁴ Bahusa Esidyaalo sy'Ebikaali ohweema koti amalako kali; buli ludaalo nga bayanaangayo ebiyaanwa ebidahibwa buli ludaalo;

⁵ haandi ohumeeda ohwo, bayanaangayo ebiyaanwa bya buli buhya ohusambwaanga ebilaamba haandi ebyo ebyalichiingi nibiri ebyohuyanwaanga esiha sy'Esidyaalo sy'Omwoosi Muyaaha haandi esiha sy'emihung'aano ky'endaalo choosi ekinalaamirwaangaho Omwaami, kata neende ebiyaanwa byoosi ebyali nibibereswa Omwaami ataali ohuyiikwa daawe.

⁶Kata neende abaandi bali nibatachaaka ohwoombaha buyaaha Enyuumba ya Nasaae, bachaaka hu buli ludaalo lutaangira olw'omwoosi kwa hataanu-na-habiri ohusambiraanga Omwaami ebiyaanwa.

⁷Abaandu bayanaangayo eseende ech'ohutungaanga ababaachi b'amakina haandi neende ababaachi b'embaao mani bayanaangayo ebyohulya, ebyohung'wa, haandi neende amafuta k'emiseituuni ohuyirwaanga mu biko bya Tiire neende Sidoni, nibakulaasaniamo embaao ch'emiseengese ohutula mu Lebbanooni, echaleetwaanga neende enyaanja ohwoola mu Yopa. Bino byoosi byaholwaanga neende omunwa kw'Omutuki Sairasi owa Perisia.

⁸Mani mu mwoosi kwa habiri kw'omwaaka mulala luunyuma lwaabwe ohukobola engo mu sifwo sy'Enyuumba ya Nasaae mu Yerusalemu, bachaaka omulimo okwo. Serubbabbeli, Yosua, neende abaandu baabwe badoong'ereyo, abalaamisi, haandi neende Abaleefi, mubwadyeeri bweene abali beeruswa boosi abali nibakoboole mu Yerusalemu, beyiingisa mu mulimo okwo sa. Abaleefi boosi abalichiingi nibali emyaaka amahumi kabiri ky'obuhuluundu kata neende ohuhira ao, babereswaanga obunyala bw'omulimo kw'ohwoombaha buyaaha Enyuumba ya Nasaae.

⁹Yesua Omuleefi, alala neende abaana bae (enono ya Hodafia) yosi beyambaania alala ohubukula obunyala bw'ohwoombaha buyaaha Enyuumba ya Nasaae. (Bano bahoonywaho neende Abaleefi b'oluyia lwa Henadaadi.)

¹⁰Mani aboombahi nibachaaka sa bati ohuyaba omusiingi kw'Enyuumba ya Nasaae, abalaamisi nibafwaalire amaganjuula kaabwe, babukula ebifwo byaabwe nibali neende eturumbete mu mahono kaabwe, nae Abaleefi ab'enono ya Asafu beecha beema abweene ao nibali neende nyaangili. Mani bapaaka Omwaami koti lu bilagiro byatula mu biha by'Omutuki Daudi byali nibiboola.

¹¹Beemba enyembo chifumia Omwaami, nibaloondaloondamo koraasi yino mbwe: “Omwaami mulai, haandi obuheeri bwae eyiri Yisiraeli bw'olubeerera.” Buli muundu yeesi yehuumaanga neende amaani kaabwe koosi koti lu kali, nibapaaka Omwaami, olwohuba omulimo kw'omusiingi okw'Enyuumba ya Nasaae kwali nikuchaakire.

¹²Abalaamisi bahiramo obuhuluundu abaangi, Abaleefi, neende abeemirisi b'enono bali nibanyalire ohubonaho Enyuumba ya Nasaae yitaangira, mani bali nibeboneraho koti lu musiingi kw'Enyuumba ya Nasaae yino nikuli ohuyabwa, balira sa amasika niboobba wuuwi. Nae abaandi nabo abalichiingi ao nabo beehumaanga sa neende esangaalo.

¹³Abulao omuundu yeesi owali anyala ohukabuhania akatikaati w'ohwehuuma hw'esangaalo neende ohulira bulira, olwohuba esiyoka sibahola syali esy'akulu muno esinyala ohuwuliirihanira kata neende eyale muno.