Read saamia Esira 5 Bible Online

Esira 5 - saamia bible

Esira 5

¹Esiha syeene esyo, abanabbi babiri, Hagai neende Sakaria omwaana wa Yido, bachaaka ohulomaloma mu liita lya Nasaae wa Yisiraeli eyiri Abayudaaya bali nibamenya mu Yuda neende mu Yerusaalem.

²Serubbabbeli omwaana wa Seyalitieli neende Yosua omwaana wa Yehosadaki bawulira emboosi chaabwe chino, bachaakaniramo ohwoombaha buyaaha Enyuumba ya Nasaae yali mu Yerusalemu, mani abanabbi babiri abo baabahoonya muno.

³Aambi esiha syeene esyo, gafana Tatenai wa Emuumbo wa Ewufuraate, Setari-Bbosenai, neende abahoongo basyaabwe, beecha mu Yerusalemu mani bateeba bati: “Naanu mweene obalagiire ohwoombaha Enyuumba ya Nasaae neende ohuyitaamo ebiindu byamwo?”

⁴Haandi bateeba ameeta k'abaandu boosi abalichiingi nibaheengeraho ohwoombaha Enyuumba ya Nasaae.

⁵Nae Nasaae yali n'aliindire abeemirisi ba Abayudaaya, neende Abaperisi bahoongo baheengao obutaholaho esiindu syoosi ohwoolera elalira balyandiika eyiri Omutuki Dario neende ohunyoola amakaluso.

⁶“Kano niko amakaluso ka baandika baayirira omutuki oyo.”

⁷“Eyiri Omutuki Dario, ohoya waatuka neende omuleembe.”

⁸“Ow'oluyaali ohoyere ohumanya oti efwe hwachiire mu syaalo sya Yudah mani hwakaana huti Enyuumba ya Nasaae eya Nasaae Muhunuufu yiri ohwoombahwa buyaaha, neende amakina mahoongo muno haandi neende emiguulo ky'embaao mihoongo nikyeemeswa mu sida. Omulimo kuno kuli ohuholwaanga neende ohwehaliirisa muno mani kuli ohuchiiririra bulai muno.”

⁹“Mani efwe huteebere abeemirisi b'abaandu batuboolere oyo onyala ohuba naali niye owababeresa obunyala ohwoombaha buyaaha Enyuumba ya Nasaae haandi neende ohuyitaamo buli sidahibwa.”

¹⁰Haandi hwabateeba ameeta kaabwe hu hunyale ohuhweekesa abeemirisi b'omulimo kuno obamanye koti lu bafwaana.

¹¹Nabo batukobolamo bati, Efwe huli abahalaabani ba Nasaae w'ekulu neende esyaalo, mani huli ohwoombaha buyaaha Enyuumba ya Nasaae hale eyali niyoombahwa haandi niyateebwamo ebiindu byamwo emyaaka emiingi kyali nikibitire, neende omutuki w'amaani muno owa Yisiraeli.

¹²Nae olwohuba bakuuka yeefwe banyoolesa Nasaae wo Muukulu mani yaabaleha baawaambwa neende Omutuki Nebukadineesa owa Bbabbilooni, omutuki w'obwaami bw'Abakalidaaya. Enyuumba ya Nasaae yino yasihirisibwa, mani abaandu baayirwa mu bwiiruhiro mu Bbabbilooni.

¹³Nae mu mwaaka kwataangira okw'obutuki bw'Omutuki Sairasi owali omutuki wa Bbabbilooni, Sairasi yatusa esilagiro esy'ohwaambaha buyaaha Enyuumba ya Nasaae.

¹⁴Yakobosao ebiindu by'esaabbu neende eby'efeesa ebyali ebyomu Nyuumba ya Nasaae yi Nebukadineesa yali niyabukula ohutula mu Nyuumba ya Nasaae mu Yerusalemu, haandi n'abiteere mu nyuumba ya banasaae mu Bbabbilooni. Omutuki Sairasi wuno yakaluuhania ebiindu bino yaabita mu mahono k'omuundu wuundi olaangwa mbwe Sesibbaasa, yi yadoola ohuba gafana wa Yuda.

¹⁵Omutuki oyo haandi yamuboolera ohubibukula mani abikoboseyo mu Nyuumba ya Nasaae mu Yerusalemu, haandi ati yoombahe buyaaha Enyuumba ya Nasaae abuundu yi yali niyeema hale.

¹⁶Sesibbaasa niye owakobola mani yaayaba omusiingi kwayo; ohwoombaha huno hwachiiririra hutyo ohutula ao, ohwoola bulaanu buti, nae husisiiri ohuwa daawe.

¹⁷“Bulaanu, nikali mbwe si nyala ohuhusangaasa Ewe ow'Oluyaali, tao ohukoonyeresa hubeeo mu byandiikwa mu Bbabbilooni, bakoonye babone nikali mbwe Omutuki Sairasi niye owatusa omunwa Enyuumba ya Nasaae yiri mu Yerusalemu muno yoombahwe buyaaha, haandi mani otweekese ohudaha hwao mu mboosi chino koti lu huli.”