Read saamia Esira 7 Bible Online

Esira 7 - saamia bible

Esira 7

¹Emyaaka emiingi nikyabitao, Aritakerikeesi naali omutuki wa Perisia, yaliyo omusaacha wuundi owali n'alaangwa mbwe Esira. Yalondoola bakuukaang'ene yaafunya enyuma ohwoola lu yoola hu Arooni, owali Omulaamisi Muhuluundu muno, naloondehania ati: Esira yali omwaana wa Seraya, omwaana wa Asaria, omwaana wa Hilikia,

²omwaana wa Saluumu, omwaana wa Sadoki, omwaana wa Ahituubbu,

³omwaana wa Amaria, omwaana wa Asaria, omwaana wa Merayooti,

⁴omwaana wa Serahia, omwaana wa Wusi, omwaana wa Bbuuki,

⁵omwaana wa Abbisua, omwaana wa Finehaasi, omwaana wa Eliasaari, omwaana wa Arooni.

⁶Esira wuno niye owatula mu Bbabbilooni. Yali omumanyirifu muno mu by'amalako ka Omwaami Nasaae wa Yisiraeli yali niyaberesa Musa. Omutuki oyo mani n'amuberesa ebyo byoosi bi yasaba, olwohuba obunyala bw'Omwaami Nasaae wae bwamuliho.

⁷Abaandu baandi aba Yisiraeli, alala neende abalaamisi baandi neende Abaleefi, abeembi, neende abaliindi b'ebiruwa, alala neende abahalaabani bomu Nyuumba bosi bachia mu Yerusalemu omwo, mu mwaaka kwa hataanu-na-habiri okw'Omutuki Aritakerikeesi.

⁸Boola mu Yerusalemu mu mwoosi kwa hataanu, okwali mu mwaaka kwa hataanu-na-habiri okw'omutuki oyo.

⁹Mani hu ludaalo lutaangira olw'omwoosi kutaangira, batula olukeendo lutula mu Bbabbilooni omwo, mani hu ludaalo lutaangira olw'omwoosi kwa hataanu, boola mu Yerusalemu, hulw'obunyala bw'esisa bwa Nasaae bwali nabo.

¹⁰Esira yali n'amalire ohuyaanayo obulamu bwae bwoosi eyiri ohweekaanga Amalako k'Omwaami, neende ohukaholeraangaho, haandi neende ohweekesaanga amalako kabyo, neende endekeha yako eyiri abaandu ba Yisiraeli.

¹¹Omutuki Aritakerikeesi yaberesa Esira, omulaamisi haandi omusomi, owali neende obumanyirifu bumala obw'amalako neende ebilagiro bi Omwaami yali yaberesa Yisiraeli esiyandiiko siloondaho.

¹²Ohutula hu Mutuki Aritakerikeesi ohuchiira Esira omulaamisi, omusomi w'amalako ka Nasaae wo muukulu.

¹³“Ese ndagira endi ohumalaho obwaami bwaange, abaandu Baisiraeli boosi, abalaamisi, neende Abaleefi abekoomba ohufukiirirwa ohuchia naawe mu Yerusalemu.

¹⁴Ese, alala neende abahiihirisi bataanu-na-babiri hubatuma muchie muhemerese obulamu buli mu Yerusalemu neende mu Yuda hu munyale ohubona koti Amalako ka Nasaae wao, akahubeereswa, kali ohuwulirwa.”

¹⁵Muhoyere ohubukula muchie neende ebiyaanwa by'esaabbu, neende eby'efeesa bi ese alala neende abahiihirisi baange hudaha ohuberesa Nasaae wa Yisiraeli, yi Nyuumba ya Nasaae yae yiri mu Yerusalemu.

¹⁶Haandi muhoyere ohuyira neende efeesa yoosi neende esaabbu yoosi bi muchia ohusolosa ohutula mu syaalo sya Bbabbilooni haandi neende ebiyaanwa biindi bi baandu Baisiraeli alala neende abalaamisi baabwe basolosaanga hulw'Enyuumba ya Nasaae ya Nasaae waabwe mu Yerusalemu bweene.

¹⁷“Muhoyere ohwehoonyera eseende chino bulai mani mukule esurusi, amakoondi mamiiku, amakoondi mayere, emere, alala neende efiini mani mumale mu biyaane hu alutaari y'Enyuumba ya Nasaae eyiri mu Yerusalemu.”

¹⁸Munyala mwehoonyera efeesa neende esaabbu ebiba nibidoong'ereho ohuholera esyo syoosi si eng'we abeene oba abaandu bao baba nibadaha, ebichaanakana neende ohudaha hwa Nasaae weeng'we.

¹⁹Muhoyere ohuchia mani muyire eyiri Nasaae mu Yerusalemu ebyehoonyerwa byoosi bi mubeereswe ohwehoonyerwaanga mu mirimo ky'Enyuumba ya Nasaae.

²⁰Haandi esiindu siindi syoosi si muba nimuchia ohudaha hulw'Enyuumba ya Nasaae muba muchia ohusinyoola ohutula mu syaaki sy'eseende sy'obwaami.

²¹“Ese ndi ohulagira abahoongo boosi abahola mu syaaki sy'eseende abali mu syaalo sy'Emuumbo wa Ewufuraate ohuhonyaanga bwaangu Esira, omulaamisi haandi omusomi w'amalako ka Nasaae wo muukulu, buli siindu syaaba naabasaba mumuholere,

²²ohwoola hu buungi bw'ekiloguraamu elifu chidatu neende emia chine (3,400) ech'efeesa, ekiloguraamu elifu ehumi (10,000) ech'engaano, elita elifu chibiri (2,000) ech'efiini, elita elifu chibiri (2,000) ech'amafuta k'emiseituuni, neende omuunyu muungi kuyera.”

²³Muhoyere ohwehaliirisa ohutusa buli siindu si Nasaae wo muukulu adahisa Enyuumba ya Nasaae yae, mani mwomiise muti s'anyoolera naange kata sa neende abo abachia ohutukaanga luunyuma lwaange.

²⁴Simufukiirirwa ohusolosa omusolo kwoosi ohutula hu balaamisi, Abaleefi, abeembi, abaliindi, abahalaabani, kata neende ohutula hu muundu yeesi odiiranaho neende Enyuumba ya Nasaae yino.

²⁵Ewe Esira, niwehoonyera amakesi ka Nasaae yahuberesa, ohoyere ohudoola abeemirisi neende abakayi ohutuka abaandu boosi abomu syaalo sy'Emuumbo wa Ewufuraate abatukwa neende Amalako ka Nasaae weeng'we. Ohoyere ohweekesa amalako ako buli muundu oba n'atakamanyire.

²⁶Niyiriyo oyo yeesi ohaya ohuwulira amalako aka Nasaae wao oba malako k'obwaami, bahoyere ohubonereserwa abweene ao neende ohufwa, oba ohumwiirusa, oba ohuyayaanga ebiindu byaabwe oba ohumwiikaliraanga.

²⁷Esira yeemao yaboola ati, “Omwaami afumisibwe, Nasaae wa bakuuka yeefwe! Yahola omutuki wuno yaakanya ohwiisa oluyaali mu ngira yino ey'Enyuumba ya Nasaae y'Omwaami eyiri mu Yerusalemu.

²⁸Ohweema hu sisa sya Nasaae ese ndanyoola ehabi y'ohudahwa neende omutuki, ow'abahiihirisi bae, haandi neende ow'abahoongo b'amaani bae; Omwaami Nasaae waange niye owaamberesa obugumu, mani ndaanyala ohuserera abeemirisi baangi ab'engoongo ch'Abaisiraeli ohukobola naange.”