Read saamia Esira 9 Bible Online

Esira 9 - saamia bible

Esira 9

¹Luunyuma lwa bino byoosi ohuwa, abeemirisi baandi b'abaandu ba Yisiraeli baamboolera bati, abalaamisi, neende Abaleefi haba sibeliinda beekabula ohutula hu baandu bamenya mu byaalo bitusibiraane ebya Abaamooni, Moabbu, neende Misiri, kata neende ohutula hu Abakanani, Abahiiti, Abaperisi, Abaebbusi, neende Abaamoori. Bali ohuholaanga sa ebiindu bisinyisa ebifwaana koti bi baandu bano baholaanga.

²Abasaacha Bayudaaya bali ohudeehyaanga sa abahasi bateende, mani sakira abaandu boolerefu ba Nasaae boolere ohubahwa omukwoobo. Abeemirisi neende abahoongo nibo abalichiingi abahyaamu bahiramo.

³Mani ese nindawulira endyo, ndetaandulaho engubo chaange neende okusinye, ndeeyiya efwiiri neende ebirefu, mani ndeehala aasi ninjotoohe mu sasaakisi.

⁴Ndeehala abweene ao niindira engisa ohwoola esiha nisyoola esy'ebiyaanwa by'engoloobe ohuyaanwa, mani bachaaka ohundebodoohaniaho, abo boosi abali nibatiire olwohuba ebiindu bi Nasaae wa Yisiraeli yali n'aboolere ebidiira hu bibi byaabo abali nibakoboole ohutula mu bwiiruhiro.

⁵Mani esiha nisyoola esyohuyaanayo ebiyaanwa by'engoloobe, ndasiingira ndaatula yi ndali niinjihaale niindirira, nisyefwaalire engubo chaange chitaanduuhe, ndachia mani ndaasigama endyo niisaba mani ndaaniha amahono kaange eyiri Omwaami Nasaae waange.

⁶Ndaboola endi, “Ewe Nasaae, esoni chindiirire muno bitanyala kata ohusiingisa omutwe kwaange mu moni wao. Ebyonoono byaange biichulana byaniina byaabita emitwe kyeefwe; biniina aakulu muno byoola aakulu muukulu.

⁷Ohutulira elalira mu ndaalo cha bakuuka yeefwe, ohwoolera elalira esiha sino, efwe, abaandu bao hwonoona ebibitiirifu. Ohweema hu bibi byeefwe, abatuki beefwe, neende abalaamisi beefwe hwaakwa mu mahono k'abatuki bateende, hwasiinjwa, hwaanyakwa, hwaamala hwapeeywa koti ababoye. Hwaswasibwa ebibitiirifu, koti lu husisiiri ohwoola yaanga yino.

⁸Bulaanu, hulw'esiha esidiidi, ewe Omwaami Nasaae weefwe, obeere ow'esisa siingi yi huli, mani waanyalira abaandi hw'efwe hweeyiba hwaatula mu buhalaabani buwaambe, mani hwaamenya mu muleembe Abuundu Woolerefu ano. Watuboolola mu buhalaabani buwaambe mani waatuberesa obulamu buyaaha.

⁹Hwali abahalaabani bawaambe, nae ewe haba siwatuleha hwadoong'a mu buhalaabani buwaambe daawe. Wahola abatuki ba Perisia baatukwiira mani baatukanya ohubao abalamu neende ohwoombaha Enyuumba ya Nasaae yao, eyali niyiri mu magiingiri, mani hwakaana omuleembe ano mu Yuda neende mu Yerusalemu.

¹⁰“Nae bulaanu, Ewe Nasaae, efwe hunyala ohuboola siina syeene ebyo byoosi nibinyalire ohuholehana bityo? Efwe naafwe haandi huheengero ohuhaya ohufunihira ebilagiro

¹¹bi watuba ohubitira mu bahalaabani bao, abanabbi. Batuboolera mbwe esyaalo sino sihuchia ohumenyamo syali esyaalo sy'omufuto olwohuba abaandu bali nibasimenyamo basiichusa ohutula hu lwaande lulala ohwoola hu lwaande luundi neende ebiholwa bisinyisa haandi ebyomufuto.

¹²Batuboolera bati efwe sihuhoyere ohudeehisania neende abo baandu, neende ohubahoonya banyale ohuhula-hulana kata sa ohubitamo nikali mbwe efwe hunyala ohuba nihudaha ohusangaalira mu syaalo omwo, haandi neende ohunyala ohusidiisa abeechuhulu beefwe endaalo choosi pe.

¹³Kata neende luunyuma lwabuli siindu syaholehana hweefwe ohutuboneresa hulw'ebibi byeefwe neende obudoondobanu bweefwe, efwe humanyire huti Nasaae weefwe ewe, watuboneresaho sa budiidi ebitaakana neende bihuhoyera, haandi waatukanya hwaonao.

¹⁴Mani bulaanu haandi efwe hunyala sa hwaalekeeresa sa amalako kao haandi, mani hwaamala hwadeehisania neende abaandi babi bano? Nihuhola hutyo, ewe oba ochia ohunyoolera muno onyale ohutusihirisa hwaawa, yaahaya ohubaao oyo yeesi owonao kata mulala. Omwaami, Nasaae wa Yisiraeli,

¹⁵Omwaami Nasaae wa Yisiraeli, ewe oli ow'obwadyeeri, nae watukanya hwaonao. Mani huli ohweyolobya omusaango kweefwe okwo yooli; efwe hubula edeembe ly'ohunyala ohwiicha mu moni wao.”