Read saamia Nehemia 11 Bible Online

Nehemia 11 - saamia bible

Nehemia 11

¹Abeemeresi nibo abali nibamenya mu Yerusalemu, nae abaandu baandi abadoong'ao boosi bobbaanga eha ohumanya daala siina hu madaala ehumi ako elinyala lyaachia mani lyaamenya mu siko syoolerefu esya Yerusalemu, nae echiindi nichio echachichaanga ni chimenya mu biko biindi.

²Abaandu bafumiaanga muno omuundu wuundi yeesi oweyamaanga ohuchia ohumenyaanga mu Yerusalemu.

³Mu biko biindi namwo abaandu ba Yisiraeli, abalaamisi, Abaleefi, abahalaabani bomu Nyuumba ya Nasaae, alala neende ab'olwiibulo lw'abali abahalaabani ba Solomooni, bamenyaanga sa hu maloba kalichiingi akaabwe keene mu biko byaabwe sa. Oluloondaho luno nilwo olwali olunyiriri lw'abaandu bahunuufu abali abeene esituundu sy'esyaalo sya Yuda, abachia mani baamenya mu Yerusalemu:

⁴Balala hu baandu bali ab'enyuumba ya Yuda nibo: Atya, omwaana wa Wusia haandi omwiichuhulu wa Sekaria. Bakuukaang'ene baandi mwalimo bano ba Amaria, Sefatia, neende Mahalaleli, abali abeechuhulu ba Peresi omwaana wa Yuda.

⁵Maseya, omwaana wa Bbaruku haandi omwiichuhulu wa Kolihoose. Bakuukaang'ene baandi balimo, Hasaya, Adaya, Yoyariibbu, neende Sekaria, abali abeechuhulu ba Sela omwaana wa Yuda.

⁶Hu beechuhulu ba Peresi, nihwo ohwali abanamaye emia chine neende amahumi kasaasaba neende bataanu-na-badatu (468) abamenya mu Yerusalemu.

⁷Salu, omwaana wa Mesulamu omwiichuhulu wa Yoedi. Bakuukaang'ene baandi mwalimo Pedaya, Kolaya, Maseya, Yitieli, neende Yesaya.

⁸Gabbai neende Salai, abali abeeho b'aambi muno neende Salu. Alala boosi bali Ababbenjamini emia chitaanu-na-chine neende amahumi kabiri neende bataanu-na-badatu (928).

⁹Yoeli omwaana wa Sikiri niye owali omweemeresi waabwe, nae Yuda omwaana wa Haseenua yali mu ngaasi yiloondereraho mu siko omwo.

¹⁰Yedaya omwaana wa Yoyariibbu, neende Yachiini.

¹¹Seraya, omwaana wa Hilikia haandi omwiichuhulu wa Mesulamu. Bakuukaang'ene baandi mwalimo, Sadoki, Merayooti, neende Ahituubbu, owali Omulaamisi Muhuluundu.

¹²Boosi alala, bali abaandu emia chitaanu-na-chidatu neende amahumi kabiri neende babiri (822) ab'enono yino abahalaabaniraanga mu Nyuumba ya Nasaae omwo. Adaya, omwaana wa Yerohaamu haandi omwiichuhulu wa Pelalia. Bakuukaang'ene baandi mwalimo Amiisi, Sekaria, Pasuuri, neende Milikiya.

¹³Boosi alala bali emia chibiri neende amahumi kane neende babiri (242) ab'enono yino abalichiingi abahoongo b'amadaala. Amasisaayi, omwaana wa Asareeli haandi omwiichuhulu wa Ahasai. Bakuukaang'ene mwalimo ba Mesilemoti neende Yimeeri.

¹⁴Boosi alala bali emia ndala neende amahumi kabiri neende bataanu-na-badatu (128) abanamaye bachweenufu. Omweemeresi waabwe yali Sabbudieli, owali mulala hu batula mu madaala mahoongo.

¹⁵Semaya, omwaana wa Hasibbu haandi omwiichuhulu wa Asirikaamu. Bakuukaang'ene balimo ba Hasabbia neende Bbuuni.

¹⁶Sabbetai neende Yosabbaadi, Abaleefi bamanyihana muno nibo abali nibahulira emirimo ky'erwaanyi w'Enyuumba ya Nasaae.

¹⁷Matania, omwaana wa Miika haandi omwiichuhulu wa Sabbudi, haandi omwiichuhulu wa Asafu. Yali omweemeresi w'abeembi bomu Nyuumba ya Nasaae mu hweemba esaala ch'ohweebasa. Abbuda, omwaana wa Samua haandi omwiichuhulu wa Galali, ow'olwiibulo lwa Yedutuuni.

¹⁸Boosi alala bali emia chibiri neende amahumi kataanu-na-kadatu neende bane (284) abali nibamenya mu siko syoolerefu esya Yerusalemu.

¹⁹Akubbu, Talimooni, alala neende abeeho baabwe, abali emia ndala neende amahumi kataanu-na-kabiri neende babiri (173) boosi alala.

²⁰Abaandu baandi badoong'ereo aba Yisiraeli alala neende abalaamisi badoong'ereo, haandi neende Abaleefi bali nibamenya hu maloba kaabwe keene mu biko biindi ebya Yuda.

²¹Abahalaabani bomu Nyuumba ya Nasaae bali nibamenya mu situundu sya Yerusalemu esyali nisilaangwa mbwe Ofeli nibahalaabaniraanga aasi w'obunyaapara bwa Siiha neende Gisipa.

²²Nyaapara w'Abaleefi abali bamenya mu Yerusalemu yali Wusi, omwaana wa Bbani haandi omwiichuhulu wa Hasabbaya. Bakuukaang'ene balimo ba Matania neende Miika, owali mulala hu nono ya Asafu, enono yali niyiri neende obunyala hu hweemba mu malaamo komu Nyuumba ya Nasaae.

²³Yaliyo amalako k'obutuki akaboola koti enono chihoyere ohukulaasaniaanga omulimo kw'ohwimiriraanga ohweemba mu Nyuumba ya Nasaae buli ludaalo.

²⁴Petahia omwaana wa Mesesabbeli, ow'enono ya Seera haandi ow'enyuumba ya Yuda, bahihiriraanga abaandu ba Yisiraeli mu kooti ya Perisia.

²⁵Abaandu baangi muno bali nibamenya mu biko bidiidi aambi neende emikuunda kyaabwe abeene. Abo abalichiingi aboohu nono ya Yuda bali nibamenya mu Kiriati Ariibba, Dibboni, neende Yekabiseeli, haandi neende mu ngoongo echalichiingi aambi neende ebiko bihoongo bino.

²⁶Haandi bali nibamenya mu biko bihoongo bya Yesua, Molada, Bbetipeleti,

²⁷neende Hasasuali, haandi neende mu Bberisebba haandi neende mu ngoongo chali ni chebodoohaanie aambi ao.

²⁸Bali nibamenya mu siko sya Sikilaaga, mu Mekoona alala neende engoongo chahwo,

²⁹mu Enilimooni, mu Soora, mu Yarimuuti,

³⁰mu Sanoa, mu Adulaami, haandi neende mu ngoongo chiri aambi neende ebiko bidiidi bino. Bali nibamenya mu Lakisi, haandi neende hu mikuunda kyalichiingi aambi ao, haandi neende mu Aseeka neende engoongo chahwo. Mbwe abaandu ba Yuda bali nibamenya mu situundu sy'obwaami esyali akatikaati wa Bberisebba emwaalo neende Ehoondo ya Hinoomu esiri emukulu.

³¹Abaandu b'enono ya Bbenjamini bali nibamenya mu Gebba, Mikimasi, Ai, Bbeteli haandi neende engoongo chali aambi ao,

³²Anatooti, Noobbu, Anania,

³³Hasoori, Rama, Gitaimu,

³⁴Hadidi, Sebboimu, Nebbalaati,

³⁵Loodi, neende Ono, neende mu Hoondo y'Ababaachi.

³⁶Emikaanda kiindi eky'Abaleefi ekyali nikyamenya mu situundu sy'obwaami bwa Yuda bali babereswa omunwa ohumenyaanga alala neende abaandu ba Bbenjamini.