Read saamia Nehemia 4 Bible Online

Nehemia 4 - saamia bible

Nehemia 4

¹Sanibbalati niyawulira ati efwe Abayudaaya huchaakire ohwoombaha buyaaha esida, yabira etima mani yachaaka ohutuchalaasa.

²Naali mu moni w'abaandu baasye, haandi neende mu moni w'amaye k'Abasamaria yaboola ati, “Siina syeene si Biyudaaya bino bibaasa biti bichia ohunyala ohuhola? Biri ohubaasa biti binyala ohwoombaha buyaaha esiko esyo, kose? Bibaasa biti ohuwaanayo sa ebiyaanwa hwoong'ene banyala ohumala omulimo okwomu ludaalo lulala lwoong'ene? Binyala ohubaacha amakina koombaha ohutula mu bituuli by'amagiingiri ebyo?”

³Tobbia yali niyeemere abweene ao mu lwae, mani yameedaho ati, “Esida syaaka sitye si binyala ohwoombaha byosi? Kata ebbwe lyoong'ene linyala sa osilikula syabweera aasi!”

⁴Ese naange ndekongooya Nasaae endi, “Ewe wuliraho koti lu bali ohutucheheerera, ewe Nasaae waange! Leha ohuchalaasa hwaabwe hubakobolere abeene. Leha banyakwe buli siindu syaabwe syoosi, haandi leha baambwe bapeeywe koti ababoye mu syaalo sikeni.

⁵Otabaleheramo ebyonoono byaabwe bi bahola, haandi oteebiriraho ebyonoono byaabwe daawe, olwohuba batunyekere bubi efwe abali ohwoombaha.”

⁶Mani efwe abeene hwemeeda sa ohwoombaha esida syeefwe, mani bwaangu bweene, syoola syaaba nisyoolere esituundu obuleeyi bwasyo bwiichufu, olwohuba abaandi bali neende esiwonya sy'ohuhola emirimo.

⁷Sanibbalati, Tobbia, alala neende Abaaraabbu, Abaamooni, neende Asidoodi bawulira bati hwali nihusuda mu moni neende omulimo kw'ohwoombaha, esida sya Yerusalemu, haandi bati ebidomo byali mu sida byali nibiikalwao, mani banyoolera muno.

⁸Boosi alala bachaaka ohutekeha ohweehoba ohwiicha boosi baseete Yerusalemu mani banyale ohutabula omulimo okwo,

⁹nae efwe husaba Nasaae weefwe mani hwaatekeha abasaacha beefwe ohubeliindaanga esiro neende esideete.

¹⁰Abaandu ba Yuda bali neende olweembo lu beembaanga bati: “Efwe hwajoong'a ohukiingaanga ebidinyu; Amagiingiri masaabi ak'ohumalao. Hunaanyale hutye ohwoombaha esida sino enyaanga yino?”

¹¹Abasuku beefwe babaasa bati efwe haba sihuchia ohubabona daawe, kata sa neende ohumanyaho esiindu syali nisiri ohweeholaanga, mbwe ohwoola lu bahabe nibamalire ohutuyeembuhaho, nibatwiita, haandi nibaakamia omulimo kwefwe kuno.

¹²Nae buli siha, Abayudaaya abali nibamenyaanga mu basuku beefwe nibo abechaanga nibatulabula ebidiira hu ndekeha chi basuku beefwe bali nibatutekehera.

¹³Mani ese ndadwiiha abaandu ebilwaaniso, amafumo, obuyiingo, nimbakabula ohweema hu nono chaabwe ohweemaanga emukoongo w'esida, buli abuundu walichiingi n'asisiiri ohwoombahwa bulai.

¹⁴Ese ndabona endi abaandu bali nibeelalihiriire, mani ndaababoolera alala neende abeemirisi baabwe, neende abahoongo boosi endi, “Eng'we mutatya abasuku beefwe abo daawe. Yichuliseho koti obuhunuufu bw'Omwaami neende amatiichasi kae lu biri, munyale ohulwaanira abeeho beeng'we, abaana beeng'we, abahasi beeng'we, alala neende amadaala keeng'we.”

¹⁵Abasuku beefwe bawulira bati efwe hwamala ohufuumbula etekeha chaabwe, bamanya sa bati Nasaae yali niyamala ohuyiingira endekeha chaabwe echio. Mani efwe hwaamala hweekobolerayo engo hwachaaka ohwoombaha buyaaha esida syeefwe esyo.

¹⁶Ohutula hu ludaalo lweene olwo, esituundu sy'abasaacha baange nibo abaholaanga nae abaandi esituundu badoong'ere nibaliindire, nibafwaalire amakooti k'ebilwaaniso, nibakiingire amafumo, engabo, neende obuyiingo. Mani abeemirisi beefwe basiirira elalira abaandu abo

¹⁷abali niboombaha buyaaha esida esyo. Kata abo abakingaanga ebiindu byoombaha baholaanga emirimo neende omuhono mulala nae nibakiingire esilwaaniso mu muhono kuundi,

¹⁸haandi buli muundu owalichiingi naali ohwoombaha yachomehaanga olugaanga lwae hu bibuno byaabwe. Omusaacha yeesi owalichiingi naali niye owuubba esing'ora, yadoong'a naali naange.

¹⁹Ese ndaboolera abaandu abo alala neende abahoongo bae, neende abeemirisi endi, “Omulimo kuno mbano kubaambaliyisiibweabuundu ahoongo akera nihudalandaale muno ohulolanaho hu sida sino.

²⁰Mani noonyala waawuliraho esing'ora nisyuubba, mwiiruheenge mwiicha mu ndebodoohaniaho. Nasaae weefwe omweene niye oba naachia ohutulwaanira sa.”

²¹Mani katyo, buli ludaalo, ohuchaaka mu hukwa hw'elyuuba, ohwoolera elalira eng'ining'ini ohutula esiro akati, esituundu sy'abaholi beefwe abali nibahola hu sida, nae esituundu sidoong'ereo syemaanga nisiliindiriire neende amafumo.

²²Esiha syeene sino ndeecha mani ndaboolera abasaacha abo abali mu bunyala endi abeene abo, alala neende ababahoonya boosi, bali nibahoyere ohudoong'a mu Yerusalemu esiro, hu efwe bulaanu hunyale ohulindaanga esiko esyo esiro, nae hunyale ohuhola emirimo esideete.

²³Ese haba sindefwaalulaangaho engubo daawe, kata neende esiro syeene, kata sa neende abasyaange baandi boosi, kata sa neende abahalaabani baange, neende abaliindi baange. Mani efwe hwesudyaangaho ebilwaaniso byoosi aambi naafwe.