Read saamia Nehemia 8 Bible Online

Nehemia 8 - saamia bible

Nehemia 8

¹Mu mwoosi kwa hataanu-na-habiri abaandu ba Yisiraeli bali nibamalire ohwiihala mu biko byaabwe. Mani hu ludaalo lutaangira lw'omwoosi kweene okwo, boosi bebuusira alala mu Yerusalemu, mu sipaapi esiri mukati w'Esiruwa silaangwa esy'Amaachi. Bateeba Esira, owali omulaamisi haandi omusomi w'Amalako ka Omwaami yali niyaberesa Yisiraeli ohubitira mu Musa, ohubukula esitabo sy'Amalako esyo.

²Esira yasileeta abuundu yi baandu bali nibebuusiire alala, abasaacha abahasi alala neende abaana bali abahuluundu banyala ohumanya ebiindu.

³Abweene ao mu sipaapi esyo, esyali aambi neende esiruwa esyo, yabasomerao Amalako ako yi bali ohuchaaka mu mabwiibwi ohwoolera elalira mu sideete akati, mani nabo nibanyala ohutekeeresaanga bulai bweene.

⁴Esira yali niyeemere tiiri hu siduuti sy'embaao esyali nisyoombahibwa hulw'esifune syeene esyo. Abasaacha bano bati nibo abamweema hu muhono muluungi: Matitia, Sema, Anaya, Wuria, Hilikia, neende Maseya; nae abaloondaho bano nibo abamweema hu muhono kwae mukaada: Pedaya, Misaeli, Milikiya, Hasumu, Hasibbadana, Sekaria, neende Mesulamu.

⁵Koti lu Esira yali niyeemere abweene ao, hu siduuti aakulu w'abaandu boosi, boosi bali nibamudaangaliireho sa emoni. Mani lu yabwiihula sa ati esitabo esyo, boosi basiingira beema tiiri.

⁶Bulaanu Esira yeemao yaboola ati, “Omwaami apaakwe, Nasaae muhunuufu wuno!” Mani abaandu boosi basiingisa amahono kaabwe aakulu mu mboo mani baakobolamo bati, “Amiina! Amiina!” Basigama boosi aasi bachaaka ohusaba, obweeni bwaabwe nibuli hu buloba.

⁷Nibamala batyo boosi basiingira beema mu bweyaango byaabwe buli otula, mani Abaleefi bano bati bachaaka ohubeekesa Amalako: Yesua, Bbani, Serebbia, Yamiini, Akubbu, Sabbetai, Hodia, Maseya, Kelita, Asaria, Yosabbaadi, Hanani, neende Pelaya.

⁸Bano nibo abakalulaanga mu mboosi chilomwalomwa echia Amalako ka Nasaae mani nibakeekesa bulai abaandu nibanyala ohukamanya bulai bweene.

⁹Abaandu nibamala ohuwuulira ebiindu bi Malako ako kali nikadaha, bachuunwa muno bachaaka ohulira bulira. Mani Nehemia, owali naali gafana waabwe, Esira owali omulaamisi haandi owasoma Amalako, alala neende Abaleefi abali nibali ohweekesaanga abaandu Amalako ako, beemao baboolera abaandu boosi abo bati, “Oludaalo luno lwoolerefu eyiri Omwaami Nasaae weeng'we, mani haba simuhoyere ohuliriraho, kata sa ohwesisiihiraho daawe.

¹⁰Mani bulaanu, eng'we mwekobolere engo weeng'we mani mulye esidyaalo. Kabanire alala ebyohulya byeeng'we alala neende eby'ohung'wa byeeng'we neende abo abataali neende ebimala. Enyaanga yino njoolerefu eyiri Omwaami weefwe, mani haba simuhoyere ohuba abanyoolefu daawe. Esangaalo li Omwaami nilyo elichia ohubaba amaani.”

¹¹Abaleefi bachaaka ohubakeendaanamo nibabayenjeesa, haandi nibababooleraanga batanyooleraanga daawe hu ludaalo lwoolerefu koti luno daawe.

¹²Mani abaandu abo boosi basiingira mani baakobolayo engo waabwe, mani baalya haandi baang'wa neende esangaalo, haandi baakabanaanga ebyo bi balichiingi nabyo neende abasyaabwe, olwohuba bali nibamalire ohumanya bulai esyo esyali ni sibasomeerwe.

¹³Oludaalo lwaloondaho, abeemirisi b'enono, alala neende abalaamisi haandi neende Abaleefi beende, basiingira mani baachia eyiri Esira ohweeka enjekesa echio choosi echia Amalako ako.

¹⁴Ao niwo yi bafuumbulira bati hane, Amalako ako, ka Omwaami yatusira mu Musa, kali nikayiika abaandu ba Yisiraeli ohumenyaanga mu bikaali sa mu ndaalo ch'Esidyaalo sy'Ebikaali.

¹⁵Mani beecha baatusa engeraka yino yiti ni bayiyirira abaandu abo abali mu Yerusalemu mwoosi neende mu biko biindi ebihoongo neende ebidiidi alala bati: “Eng'we mutule muchie ena bigulu mani mwaakule amasaafu ohutula hu emisabbiibbu, emiseituuni, ochiooga, haandi ohutula hu misaala kiindi muhole ebikaali ohuloondehana neende enjekesa yaandiikwa mu Malako.”

¹⁶Mani abaandu bachia baakula amasaga alala neende amasaafu baachia boombaha ebikaali hu birama by'enyuumba kaabwe ebilambaafu, neende mu nyanyi chaabwe, mu lwaanyi lw'Enyuumba ya Nasaae, mu bipaapi by'abaandu boosi, hu Siruwa sy'Amaachi, neende aambi neende Esiruwa sya Efuraimu.

¹⁷Abaandu boosi abali nibakoboole engo waabwe, nibatula mu buwaambe, bosi boombahaanga ebikaali babimenyamo sa. Lino nilyo elyali ehabi litaangira ely'esino ohulolehana ohutulira elalira mu ndaalo cha Yosua omwaana wa Nuuni, mani buli muundu yeesi yesaangaasa yasangaala muno.

¹⁸Ohutula hu ludaalo lutaangira lw'esidyaalo esyo, ohwoolera elalira hu ludaalo lumaliirihayo, basomaangaho esituundu silala esy'Amalako ka Nasaae buli ludaalo. Bahusa esidyaalo sino ohumala embaka y'endaalo chitaanu-na-chibiri, mani hu ludaalo lwa hataanu-na-hadatu, yaliyo omuholo kw'ohwiikalao, koti sa byali nibidahibwa mu Malako ako.