Read saamia Nehemia 9 Bible Online

Nehemia 9 - saamia bible

Nehemia 9

¹Bulaanu hu ludaalo lw'amahumi kabiri neende hane, olw'omwoosi kweene kuno, abaandu ba Yisiraeli bebuusa alala ohusiiba nibefwaalire ebigunia, haandi nibeebahire eloba hu mitwe kyaabwe.

²Abaisiraeli beekabula hu baandu baandi bakeni, beema tiiri beeyolobya ebyonoono byaabwe alala neende omufuto kwali okwa bakuuka yaabwe.

³Ohumala embaka y'esaa chidatu enaamba, Amalako k'Omwaami Nasaae waabwe kabasomerwa, haandi esaa chiindi chidatu echaloondaho, abeene bali nibeyolobyaanga sa ebyonoono byaabwe, haandi nibeenamiraanga Omwaami Nasaae waabwe oyo.

⁴Esiduuti syaliwo nisileheerwe Abaleefi, mani hu bweene ohwo hwali nihweemerweho Yesua, Bbani, Kadimieli, Sebbania, Bbuuni, Serebbia, Bbani, neende Kenani. Basabaanga neende ekono hoongo Omwaami Nasaae waabwe.

⁵Abaleefi bano bati nibo abalangaanga abaandu beeche balaame: Yesua, Kadimieli, Bbani, Hasabbineia, Serebbia, Hodia, Sebbania, neende Petahia. Babolaanga bati: “Musiingire mupaake Omwaami Nasaae weeng'we; mumufumienge endaalo choosi pe! Leha buli muundu yeesi afumie eliita lyae ly'oluyaali, kata neende abyahaba mbwe abulao ohufumia hw'omuundu yeesi ohuyera.”

⁶Mani abaandu boosi aba Yisiraeli basomaanga esaala yino bati: “Ewe Omwaami, ewe weeng'ene niiwe Omwaami; ewe niiwe owaloonga ekulu, neende eng'ining'ini choosi echiri hu kulu. Ewe niiwe owaloonga eloba, neende enyaanja, haandi buli siindu syoosi esibirimo; ewe niiwe owabiberesa obulamu byoosi. Amaani komu kulu kosi kahuguunamira sa haandi kahwiinamira.

⁷Ewe Omwaami Nasaae, niiwe owadoola Abburamu mani wamwiimirira waamutusa mu Wuri mu Bbabbilooni; ewe niiwe owakaluuhania eliita lyae lyaaba Abburahamu.

⁸Ewe wabona oti oyo niye owali omweesikwa yooli, mani waahola Endagaano nae. Ewe wamulaka ohumuberesa esyaalo sy'Abakanani, esyaalo sy'Abahiiti neende esy'Abaamoori, esyaalo sya Abaperisi, esy'Abayebbusi, esy'Abagirigasiti, oti bibe abuundu yi beechuhulu bae bali nibahoyere ohumenya. Ewe wanyala ohwooseresa esisuubise syao esyo, olwohuba ewe oli omweesikwa.”

⁹Ewe wabona koti bakuuka yeefwe basaandiraanga mu Misiri; ewe wanyala ohuwulira omulaanga kwaabwe, ohubaabina nibali hu Nyaanja ya Ranjaayi.

¹⁰Ewe wanyala ohuhola eby'amayia biwukisa eyiri omutuki wali owaabwe oyo, eyiri abahoongo bae boosi, haandi neende eyiri abaandu bali mu loba lyae elyo, olwohuba wali niwamanya koti lu bali nibafwiinyiraanga abaandu bao abo. Mani ewe waanyala ohunyoola efuma yino yosisiiri nayo ohwoola buti.

¹¹Wanyala ohuholera abaandu bao engira enyomu yaahalakania enyaanja mani wabeemirira omweene bakeendaanga hu loba lyoomu kurururu. Mani abali nibabeeruhania baasihama aasi hu lwaalo lw'amaachi, koti sa ekina teende li sihamaanga mu nyaanja yibiruuhana.

¹²Ni weehoonyera esireesi sa ewe wanyala ohubeemiriraanga esideete, nae esiro waabahoseraanga engira yaabwe neende omuliro.

¹³Hu Lugulu lwa Sinai ewe weeha aasi nootula muukulu; mani waalomalama neende abaandu bao waababeresa amalako malai kano neende enjekesa y'amaani yino.

¹⁴Ewe wabeekesa ohuhusaanga Sabbaato yao njoolerefu, haandi ohubitira mu Musa omuhalaabani wao, wanyala ohubaberesa amalako kao.

¹⁵ “Nibali njala, ewe wanyala ohubaberesaanga emigaati ohutula muukulu, haandi neende amaachi ohutula mu lwaanda nibawulira obuluwo. Ewe wababoolera oti batuke eloba elyo li wali niwasuubisa ohubaberesa.

¹⁶ Nae bakuuka yeefwe beeniinia neende esuunga neende esyeejo mani baahaya ohutya ebilagiro byao.”

¹⁷ Bahayira elalira ohutya; haandi beebirira ebiindu bi wabaholera byoosi; kata beebirira neende eby'amayia bi waholaanga byosi. Mu suunga yaabwe, beemao bedoolera omutuki waabwe onyala ohubakobosayo mu jeela mu Misiri. Nae kata katyo ewe oli Nasaae oleheraangamo; ewe oli ow'esibooyi haandi ow'obuheeri, otabbibbiirihana ohunyoolera daawe. Esisa syaho sihunuufu muno; ewe haba si weemao waabajwaang'a daawe.

¹⁸ Boola baahola esiloongwaloongwe esifwaanani neende esurusi njere mani baboola mbwe esyo nisyo esyali nasaae wanyala ohubeemirira yaabatusa mu Misiri! Bahunyeka ewe Omwaami, bahwoosa eyale muno!

¹⁹ Nae ewe haba si wanyala ohubajwaang'a waabaleha eyomu siparara daawe, olwohuba esisa syao sihunuufu muno. Ewe haba kata si wabang'uula esireesi sira, kata sa omuliro kula daawe ebyo ebyabeekesaanga engira esideete neende esiro.

²⁰Mu bulai bwao, ewe wababoolera ebyo bi baba nibahoyere ohuholaanga; ewe wanyala sa ohubalisaanga mana haandi wababechaanga sa amaachi k'ohung'wa.

²¹Ohumalaho emyaaka amahumi kane amalaamba nibali mu siparara ewe wanyala ohubaberesaanga ebiindu byoosi bi badahaanga ohwehoonyeraanga; engubo chaabwe haba sichakofulaanga daawe, haandi amakulu kaabwe haba sikafwimbaangaho daawe, haandi si kabachunaangaho daawe.

²² Ewe wabakanyaanga sa nibanyala ohuyiingiraanga ebyaalo, neende obwaami bukabuhaane, amaloba kasibiraane neende akaabwe. Banyalaanga ohuyiingira ebyaalo bya Hesibboni, yi Sihooni yatukaanga, haande neende eloba lya Bbasaani, li Ogu yali omutuki walyo.

²³Ewe wabakabaanga sa abaana abaandi koti eng'ining'ini echiri hu kulu, haandi waabanyalira ohuyiingiraanga haandi bamenyaanga mu maloba ka walichiingi niwasuubisa bakuuka yaabwe oti ochia ohubaberesaanga.

²⁴Banyala ohuyiingira esyaalo sya Kanani; ewe niiwe owabanyiingirira abaandu baba nibamenya mu bweene omwo. Ewe waberesa abaandu bao obunyala bw'ohuhola buli syabasangasaanga neende abaandu neende abatuki ba Kanani.

²⁵Abaandu bao banyala ohuyiingiraanga ebiko byasitwa neende engoba, amaloba malayi, enyuumba cheechula obuyiinda, esulo chamala ohuyabwa hale, emiseituuni, emisaala ky'ebyaamo, neende emisabbiibbu. Balichaanga byoosi-byoosi bi badahaanga mani bahomera; besaangasaanga neende buli siindu silai syoosi si wababechaanga.

²⁶ “Kata katyo, abaandu bao bano bajeema baahaya ohuhutya daawe; boobba sa Amalako kao emikoongo. Betaanga sa abanabbi babalabulaanga, abababooleraanga ohukobola yooli; bahunyekaanga butoli-toli,

²⁷mani waalehaanga abasuku baabwe bosi nibanyala ohubayiingiraanga nibabatukaanga.” Mani nibali mu madinyu kaabwe ako, haandi bahulangaanga obahoonye, wesi haandi obakobolaangamo nooli yooli muukulu. Mu sisa sihunuufu syao, ewe haandi wabaleeteraanga abeemeresi banyalaanga ohubanunula ohutula mu mahono masuku kaabwe.

²⁸Haandi omuleembe nikwafunyaangao, bononaanga haandi, haandi walehaanga sa abasuku baabwe banyala ohubayiingira. Nae kata katyo ni banyalaanga ohweyolobya bahusaba ohubaonia, muukulu eyo ewe wanyalaanga ohuwulira, mani buli siha wanyalaanga ohubanunulaanga mu sisa syao sihunuufu.

²⁹Ewe wabalabulaanga ohutichaanga enjekesa chao, nae mu suunga yaabwe bajwang'aanga sa amalako kao, kata neende nibiri mbwe mu hwooseresa Amalako kao nihwo engira yichia enabulamu. Obwoomu bw'emitwe hwaabwe neende esyeejo syaabwe, by'abakayiraanga ohunyala ohuhutiichaanga.

³⁰ Buli mwaaka, wabalabulaanga neende ohwesimiirisa ohuungi. Ewe waninaanga abanabbi bao mani banyala ohulomaloma, nae kata katyo, abaandu bao nabo balichiingi sa koti abadiimbe, mani haandi obalehaanga nibayiingirwa neende ebyaalo biindi.

³¹Kata katyo, ohweema koti esisa syao siri esihunuufu, ewe haba si wanyalaanga ohubajwaang'a, kata sa ohubasihirisaanga daawe. Ewe oli Nasaae w'esibooyi haandi ow'esisa sibitiirifu!

³² “Ewe Nasaae, Nasaae weefwe, nga oli omuhunuufu! Nga oteengiyia, nga oli ow'amaani! Ewe oli omweesikwa owoseresaanga ebisuubise by'Endagaano yao. Otwiichulisira elalira hu biha bi batuki ba Asiria bali batwiihaliraho, kata ohwoolera elalira hu nyaanga yino, hwahasaanda luleeyi! Abatuki beefwe, abeemeresi beefwe, abalaamisi beefwe neende abanabbi beefwe, bakuuka yeefwe, alala neende abaandu beefwe boosi bahasaanda muno. Yichulisaho mani koti lu hwasaanda hutyo!

³³Ewe wahola bulai muno ohutusaandyaho; ewe obechaanga sa omweesikwa, kata neende efwe ni hwononaanga.

³⁴Bakuuka yeefwe, abatuki beefwe, abeemeresi, neende abalaamisi haba sibanyala ohuliinda Amalako kao daawe. Bahaya ohutekeeresa ebilagiro byao neende ohulabula hwao.

³⁵Ohweema hu habi chao, abatuki banyalaanga ohutukaanga abaandu bao kata neende nibamenyaanga mu loba tabaafu haandi elai li ewe wababechaanga; kata katyo bahaya ohutula hu syonoono baanyala ohuhuhalaabanira daawe.

³⁶Mani bulaanu mbano huli haandi abawaambe mu syaalo sino si ewe omweene watuberesa, eloba gimu lino elitulamo buli siindu si hudaha ohulya.

³⁷Buli siindu situla mu loba muno siri ohuchichaanga sa eyiri abatuki ba ewe omweene watudwiihaho olwohuba mbwe hwonoona. Bali sa ohutuholaanga koti lu badaha kata neende ebyaayo byeefwe byosi, mani huli mu ngisa yeene!”

³⁸Ohweema hu bino byoosi bityo ebyakwaao, efwe abaandu ba Yisiraeli fweesi, ano huli ohuhola Endagaano enyandiike y'elalira, alala neende abeemeresi beefwe, Abaleefi beefwe, alala neende abalaamisi beefwe huli ohutaaho emihono kyeefwe.