Read saamia Esita 3 Bible Online

Esita 3 - saamia bible

Esita 3

¹Ebyo nibyawa, Omutuki Ahasuera yaberesa Hamani obunyala bw'ohuhulira abahalaabani boosi. Hamani yali omwaana wa Hamedaata, omwibulanwa wa Agagi.

²Abahalaabani b'omutuki boosi abali mu siruwa sy'omutuki, beenamiraanga Hamani ohumwiisamo oluyaali koti omutuki lu yali n'alagiire. Nae Modekai n'ahaya ohumwiinamiraanga, haandi n'atamwiisamo oluyaali.

³Abahalaabani b'omutuki baandi nibateeba Modekai bati: “Lwasiina ojeemera esilagiro sy'omutuki?”

⁴Nae nibamala ohumubooleraanga buli ludaalo, n'ahaya ohubawulira, mani nibaboolera Hamani ohubona oba aneesimiirisa ebiima bya Modekai, olwohuba Modekai yali n'amalire ohubaboolera ati Muyudaaya niye, saanyala ohwiinamira Hamani haandi yamwiisamo oluyaali.

⁵Hamani yanyoolera muno niyamanya ati Modekai yali n'atachia ohumusigamira neende ohumwiinamira;

⁶haandi niyamanya ati Modekai yali Omuyudaaya, yaheengerao elalira ohusaandya muno Modekai yeeng'ene. Yachaaka ohuhola endekeha y'ohwiita buli Muyudaaya yeesi owali niyamenya mu bwaami bwa Ahasuera.

⁷Mani mu mwaaka kw'ehumi neende habiri okw'obwaami bw'Omutuki Ahasuera, mu mwoosi kuchaaka kweene, omwoosi kwa Nisani, Hamani yatusa omunwa ati eha yoobbwe (“puri” koti eha eyo yali niyilaangwa) ohumanya oludaalo lw'elalira lweene, neende omwoosi kweene, ku luhobo luno olwohusihirisiraho Abayudaaya boosi hu ludaalo lulala. Oludaalo lwaheengwao lwali olw'ehumi neende chidatu, olw'omwoosi kw'ehumi neende chibiri, omwoosi kulaangwa kuti Adaari.

⁸Mani Hamani n'aboolera omutuki oyo ati, “Luliwo oluyia luundi olw'abaandu abasalaanira mu bwaami bwao buno bwoosi, abanyoolehana mu buli bituundu by'esyaalo sino. Baloondakanaanga neende emiduunga kitafwaananaho neende eky'abaandu baandi boosi. Kata katyo, haba sibesaanga oluyaali mu malako k'obwaami buno, mani haba sisihuhoyere ewe ohwemeeda ohubesimiirisiraanga daawe.

⁹Nikali mbe sihusangaasa ewe ow'Oluyaali, tusa omunwa oti boosi basihirisibwe. Mani nooba noochia ohuhola otyo, ese naange nyomiisa endi mba njia ohuta etaani emia chidatu neende amahumi kataanu-na-kabiri neende chitaanu (375) ech'efeesa mu sibiihiro syao sy'obwaami ech'ohwehoonyeraanga mu hutuka obwaami bwao buno bwoosi.”

¹⁰Omutuki wuno yemao yefwaalula engila yae, eyehoonyerwaanga koti omuhuuri okuubbwa hu buli silaango hu syeemeo syeehole esihunuufu, mani naayidiisa omusuku w'Abayudaaya, Hamani omwaana wa Hamedaata, omwichuhulu wa Agagi.

¹¹Omutuki yaboolera Hamani ati, “Doong'a eseende, haandi hufukiriire ohole hu abaandu abo koti omweene oba noodaha.”

¹²Mani hu ludaalo lw'ehumi-na-hadatu, olw'omwoosi okwo, Hamani yachia mani n'alaaliha abaandiiki boosi ab'omutuki oyo mani n'abalomalomera esilaango esyo sikaluhanisibwe mu buli lulimi, neende engeri y'ohwandiika yoosi eyehoonyerwaanga mu bwaami obwo, mani nisiyirirwa buli mwiimirisi, gafana, neende omuhoongo yeesi. Syatuswa mu liita ly'Omutuki Ahasuera mani ni syuubbwaho neende omuhuuri kwae kweene.

¹³Abeeruhi b'embiro nibo abayira ohulaangirira hwae huno mu buli situundu sy'obwaami bwae obwo. Hwalimo enjekesa mbwe, hu ludaalo lulala lwoong'ene luti, nga endaalo ehumi neende chidatu ech'omwoosi kulaangwa Adaari, Abayudaaya boosi, abayere alala neende abahuluundu, abahasi neende abaana, boosi bali ab'ohwiitwa. Boosi bali ab'ohusiinjwa neende egiili haandi emyaandu kyaabwe kyoosi kibukulwe.

¹⁴Ebyali mu mulaanga kuno byali bihoyeerwe ohuteebwa mu moni w'abaandu boosi mu buli situundu sy'obwaami obwo, hu buli muundu yeesi anyale ohwetekehera oludaalo olwo nilwoola.

¹⁵Haandi ohweema hu silagiro sy'omutuki oyo, omulaanga okwo kwateebwa mu moni wa buli muundu owali mu buli siko sihunuufu sya Suusa esyo, mani abeembiro abo nibakiinga omulaanga okwo nibakuyira mu bituundu byoosi eby'obwaami obwo. Omutuki wuno alala neende Hamani nibeehala aasi mani nibachaaka ohung'wa, nae esiko sihunuufu sya Susa esyo syali nisiswaanire oluhero.