Read saamia Esita 4 Bible Online

Esita 4 - saamia bible

Esita 4

¹Mani Modekai niyawulira ebyo byoosi ebyali nibiholerwe, yataandula engubo chae choosi olw'esibeera. Yeemao yefwaala engubo ch'ebigunia, haandi niyeebaha omutwe kwae kwoosi ekohe, mani n'achaaka ohukeendaana mu siko omwo, niyoobba wuuwi lukali,

²ohwoola lu yoola hu mulyaango kwe'siruwa sy'edooho ly'obwaami. Yahaya ohuliingiramo olwohuba abulao omuundu yeesi owalichiingi niyefwaalire ebigunia owali naafukiirirwa ohwiingiraangamo daawe.

³Mu buli situundu sy'obwaami obwo bwoosi, buli abuundu yi silagiro sy'omutuki wuno yi syali nisimalire ohuwuliirihana yoosi, yaliyo ohulira huungi muno mu Abayudaaya boosi. Basiibaanga, nibalira, niboobba wuuwi, haandi abahiramo obuungi nibefwalaanga ebigunia haandi nibakonaanga mu kohe.

⁴Mani abahalaabani bahasi ba Esita alala neende abasaacha balade abo nibachia mani bamuboolera ebyo bi Modekai yali n'aholere, mani Esita n'achuunisibwe muno mu mwooyo. Yayirira Modekai engubo ch'ohwefwaala ataali ebigunia, nae n'ahaya ohuchifukiirira daawe.

⁵Esita mani n'alaanga Hataki, mulala hu basaacha balade abalichiingi mu dooho omwo owali niyadoolwa neende omutuki oyo ohuba omuhalaabani wa Esita, mani n'amutuma ohuchia eyiri Modekai amuteebe esyali nisikwiireo, neende esifune syeene.

⁶Hataki mani n'achia eyiri Modekai owali naali mu sipaapi sy'esiko esyo hu siruwa sy'edooho elyo.

⁷Modekai mani n'amuboolera buli siindu syoosi esyali nisimwoolereho, neende obuungi bw'eseende chi Hamani yali n'asuubiise ohuta mu sibiihiro sy'eseende esy'obwaami, nikali mbwe Abayudaaya boosi bachia ohusihiriswa.

⁸Modekai mani n'aberesa Hataki ebyali mu esilagiro syali nisitusirwe mu Susa mwoosi, ni silagira ohusihiriswa hw'Abayudaaya boosi. Modekai yamutuma ayiyirire Esita, amweekese bulai obulamu koti bwali nibuli, haandi asabe Esita achie abalirire eyiri omutuki, amwekweede anyale ohukwiira abaluyia ba Esita bano esisa.

⁹Hataki y mani n'achia n'aboolera Esita bi Modekai yali n'aboolere.

¹⁰Esita yesi yaberesa Hataki omulaanga ohuyirira Modekai, n'aboola ati:

¹¹“Niyibaao omuundu yeesi, omusaacha oba omuhasi, ochia mani yeengira mu lwaanyi lwomuukati omutuki n'atamulaangire, omuundu oyo wohwiitwa bwiitwa. Elyo nilyo elako li buli muundu yeesi yali n'amanyire, ohutulira elalira hu bakeraki b'omutuki ohwoolera elalira hu baandu boosi abamenya mu bituundu byoosi ebyomu bwaami obwo. Yaliyo engira ndala yoong'ene yi muundu anyala ohuwoneramo, omutuki n'amusingisira endabuhi yae y'obwaami ey'esaabbu, ao mani omuundu oyo haba saachia hwiitwa daawe. Nae malire endaalo amahumi kadatu nibataanaanga ohuchia eyiri omutuki.”

¹²Modekai niyawulira Esita bi aboolere,

¹³yesi yamutumira ohulabula huno huti: “Ewe otabaasaho oti mu Bayudaaya boosi, ewe niiwe onawonao daawe, olwohuba oli mu dooho ly'omutuki.

¹⁴Olwohuba n'owuleera mu siha sifwaana siti, Abayudaaya bachia ohunyoola obuhoonyi obwohuwonesebwa nibutula abuundu waandi, nae ewe neende ab'edaala lya lataao boosi muba muchia ohusihirira. Nae wiina omanyire awuundi waholwa ohuba omuhasi w'omutuki hulw'esiha sifwaana koti sino.”

¹⁵Esita mani n'akobola mu Modekai n'aboola ati:

¹⁶“Chia ohubuusa alala Abayudaaya boosi abali mu Susa; musiibe nimuundekongooyera eyiri Nasaae. Mutalyaaho esiindu syoosi, kata sa ohung'waaho esiindu syoosi, ohumala embaka y'endaalo chidatu neende ebiro bidatu. Ese neende abahalaabani bahasi bane, fwesi huchia ohuhola hutyo sa. Luunyuma, ese njia ohuchia eyiri omutuki, kata neende abyahaba nisitafukiirirwa neende amalako. Mani nikali mbwe ndi ow'ohufwa, njia ohufwa.”

¹⁷Modekai mani n'achia ohuhola koti lu Esita yamulagira.